Gəlyaɗe 38 - Bible en Guidar

Əkkam na ɗəf məs dəsən heslepe nani

¹ Gəlyanalva na Davit. Naɗɗumon an dətoŋgu.

² Yawe, kəta kədazga' su də ədagədəv ɓa; gəm is ərgu net herɗe ɓa.

³ Vi harɗe nok atoŋgoŋguk azawa, vok akrəkək akawa.

⁴ Petpet tay aka gəɓa zu ɓa: sən ədagədəv noko. Zəga moggon tay addivit sleŋsleŋɗe naw ɓa: sən mbərayən nawa.

⁵ Vi heslepeɗe naw adayaŋgək kiywa, va zəga gagdak təɓeltəɓeləŋ azawa.

⁶ Huwweɗ naw aŋgənaŋgək uffokoŋ vərãh: sən wətem nawa.

⁷ In tat sumbutto, kuɗopkuɗop hã diyɗa, tukummo pay pakə.

⁸ Kofforu tay difdif va offo, petpet tay aka gəɓa zu ɓa.

⁹ Nəɓrukko, zu baybay diyɗa, in tat ənɗəs sən birbir na makrawa.

¹⁰ Daya kəsənək an nəŋgələ, hoŋkorhoŋkor naw dəɗam abok ɓa.

¹¹ Makraw gbawgbawi, gbogboŋ naw appawəka, haraw dayday awla ɓa.

¹² Beyneŋgiɗu dit geleŋgiɗu addereŋgik səzet huwweɗ nawa, hilfiŋgiɗu pak biteŋ faraɗa.

¹³ En dəŋglaŋ əmta naw enslineŋgik bizwil abawa; məs met aka wəzəmsahã nawa, əŋglaŋ suwən tatwãh gəm əhẽw wən akawa pay pak ətuvuroŋ wən akawa.

¹⁴ Naw in tat va goryom, naprəmən ɓa; va məs hərzlumən arəm awpel ɓa.

¹⁵ In tat va ɗəf məs aprəm ɓa, məs amndan əpel ɓa.

¹⁶ Vi akoki əga nawa Yawe, Daya Maŋgəlva nawa, wakəzlani.

¹⁷ Vi nənahək na: Adanneken akaw ɓa kaka'ə, adawɓaygənən kiyit akaw pay nətaŋgbãy ɓa.

¹⁸ Vi go'o nan aza əzbəra, tatwãh naw tay abaw ɗayɗayə.

¹⁹ Vi wanərban an nəraygəni, haraw wasan kululu sən mambray nawa.

²⁰ Məzuzelɗe naw mederetiŋ, gboŋgboŋgu; məs dəzelwən ɗar diyɗaŋgə.

²¹ Məmndanən mbərayən agəla moggon tay əzelen suwəni, dəka in tat əzban əɗɗa moggoni.

²² Kəta kəzgaw firik ɓa Yawe. Kəta kəsok faraɗa səzaw ɓa Maŋgəlva nawa.

²³ Daya, əkõh nawa! Agəm zuk əbbah suwa.