Gəlyaɗe 37 - Bible en Guidar

Mokrok assok aka ərəh net məsdarawɗe ɓa

1 Səza Davit.

¹ Səza Davit. Herɗe aɗɗukun aket ɗiy məɗɗaŋ mbərayən ɓa, kotorok adaɗɗuk viyit məɗɗaŋ ɗarɗar ɓa:

² Vi waɓətaŋ va kevile gu'u, va kevile məkdəkan adaŋkəlaŋgə.

³ Aɗi əɗɗum nok aka Yawe, agəɗ moggoni, kəsokgən aka dəlva, kəssokgən zayə;

⁴ Anneken zuk addəv Yawe, wapsuk an mokrok aŋgələ.

⁵ Adaw dəka Yawe ka tive noko, aɗi əɗɗum nok akani, nan waɗɗa an naɗɗa.

⁶ Warban təstəs nok pasakə, əɗɗa zəga də tiven nok va tataŋpaya.

⁷ Asok ɓatɓat aza Yawe, aga səvani; herɗe adaɗɗukun aka ərəh na ɗəf ɓa, may aka ɗəf məgəɗ zəga net wil ɓa.

⁸ Appan ədagədəva, azget herɗe, mokrok asil ɗar ɓa, əɗɗa mbərayni ɗarə.

⁹ Vi kawzeti məɗɗaŋ zəga mbərayni, en dədawganən Yawe na, net dələv wasan ka neti.

¹⁰ Abe aŋ siɗikke na, məsdaraw tay ɓa; wakəkayan gəlani, kərəh na ɓa.

¹¹ Dələv wasan sit məs dəvoŋgənən kiyti wannekeŋ addəv zazay diyɗa.

¹² Məsdaraw tay ətuvur wən aka ɗəf an təstəsə, tay əhomtok man akani.

¹³ Ya Yawe tay əmas akani, vi awlak na pay nan tay əzzani.

¹⁴ Məsdarawɗe aptuwənək masalam, enslinnənək bəle vi kawbay məssahã də məzuraya, vi kawtaw wəlet ɗiy en təstəsə.

¹⁵ Ya masalam net divetdivet watilik gidivti, bəleɗe net waŋzlaŋgə.

¹⁶ Siɗikke nava ɗəf təstəs adayək ki arya net məsdarawɗe diyɗa,

¹⁷ vi gbogboŋ net məsdarawɗe wazə, ya Yawe tay ərma vet ɗiy en təstəsə.

¹⁸ Yawe, asənək pay net ɗiy təstəs-gərakə. An nawray vet wasan hã faɗə.

¹⁹ Arbaŋ na wil pay nawray ɓa, wabaŋ pay na mayã.

²⁰ Məsdarawɗe wazaŋgə, məzuzelɗe na Yawe waɓətaŋ va tərɗa nawra; va enene adahhiyaŋgə.

²¹ Məsdaraw wagəm dəmna, ya afaɗna ɓa, ɗəf an təstəs wawəl sasahã, wavələ.

²² Ɗiy en aɗɗa əzaɓ nan aketi, dələv wasan ka neti, məs mahanay aketi, wazaŋgə.

²³ An ədaw na ɗəf moggoni aba Yawe na, Daya wasɓan tələn addəv ədaw nani.

²⁴ An ataŋgbayək na, askot na ɓa, vi Yawe tay ərma vani.

²⁵ Nəsawək gawla hã in galgalə; nəwəl ɗah ɗəf təstəs məzgan ɓa, may kirtin əkayaŋ əzəm ɓa.

²⁶ Pay pak tay ula sasẽhit ɗiyi, tay əpsit dəmna, əzaɓ tay aket kirtini.

²⁷ Aɓaŋga faraɗa səza mambraya, agəɗ moggoni, wakəsok hã faɗə,

²⁸ vi Yawe zəga də tiven aŋgələ, awndol ɗiy nan mogget ɓa, tay əget pay pakə, ya mazlãlwẽt məsdarawɗe wazə.

²⁹ Dələv wasan sit ɗiy en təstəsə, wassoŋ akan hã faɗə.

³⁰ Maɗɗula tay ama ɗəf təstəs pay pakə, hərzlumən tay əgilgin zəga də tiveni,

³¹ mahenziŋ na Maŋgəlva nan tay a makrani, ədaw nan azlzlaɓ ɓa.

³² Məsdarawɗe tay əsekeɗnən ɗəf təstəsə, əkayaŋ tive nawbayni.

³³ Yawe appan na avet ɓa. Appan na wən ərman aba ətawwən ɓa.

³⁴ Aɗi əga nok aka Yawe, arma tive nani; dələv wasansuk ka noko, wakule va adawzetin məsdarawɗe.

³⁵ Nəwələk məsdaraw əsər met ɗiyi, aɗiyək zən va wəlaŋga metiŋgin dəndufu.

³⁶ Ətoŋ dədak na: tay əmpa ɓa; nəkayanka, nərəh ɓa.

³⁷ Awla ɗəf məza vurum ɓa, asəŋgləkan ɗəf məs sarra. Ɗəf na zazay na, mazlãlwãn wasani.

³⁸ En məɓoŋgit kawzeti pakgit sapə, mazlalwẽt məsdarawɗe wazə.

³⁹ Əkõh net ɗiy təstəs səza Yawe adazzani, təki nawɗam neti yi pay na tatwahã.

⁴⁰ Yawe wabbah siti, wabite, wabit səvet məsdarawɗe, wakõhgiti, vi azan adawɗamaŋgə.