Gəlyaɗe 35 - Bible en Guidar

Əɓuhma na ɗəf məs man bartata məkan aba ətawwəna

1 Səza Davit.

¹ Səza Davit. Yawe agay dit məzugayaŋ də iyna, alpə dit məzəlpaŋ də iyna!

² Arma baray muzliya də an metiŋgini, asil abbah suwa!

³ Aɓlan tulhõ də zlimbe nok aket məzərɓahawəni, anah su na: «Intə wəkõh noko!»

⁴ En məzukayanən zeŋgilewa, dərbaŋ wili, dəssoŋgən simbim simbimi! En dədaɗɗumoŋ aka wəray nawa, dəddereŋ dirɓe, dəssoŋ aket wili!

⁵ Dəssoŋgən va eslesle ammba səmyã fit pay maslay na Yawe adarɓeheti!

⁶ Tive net dəsan də guzli gəm də maslarkatay, pay maslay na Yawe adarɓeheti!

⁷ Tay nəgəɗ ɓa, anslinənək weŋge net viwa; tay nəgəɗ ɓa, aso'oŋ vov viwa.

⁸ Kəta əray dərih midigirzike, weŋge net dərme, dəskotoŋ addəv əray vani!

⁹ Wanənneken zu diyɗa addəv Yawe, wanənnek vi akõhguwa.

¹⁰ Masleŋsleŋgu pak wanah na: «Yawe, naway va is di? Məkõhgən məssahã səva məzuzel totokkprok məday kini; məssahã də məzuraya səva məzəppətti.»

¹¹ Məziwweɗe mbəreyit asilyoŋko, tay əssohõwən zəga məs nəsən ɓa.

¹² Mbərayən adamndagan suwən a gəla moggoni, in yakəŋ takərguwa.

¹³ Ya nawa, gala assoŋ gbəgba'a, lukut na sak nədawgulo nəvoŋgənək kiyu əɗɗa meme, əkkam məza arsla ɓa!

¹⁴ In təkastəkas va aka məlmuwa awaniɓa baynawa; in kpaŋ məgəɗ gəlabay nat mani.

¹⁵ Tay əkkalaŋ vi kannek aka əskot nawa, maŋgalɓeyeɗ kakalkakal akawa, nəsən vimi di ɓa, awɓətaŋ dawpel wən akaw ɓa,

¹⁶ sap dit məsdarawɗe, məmasaŋ aka ɗəf nadaka, tahəŋ əhomtok met akawa.

¹⁷ Daya, mbar kədawla wənəŋ di? Azargən zeŋgilew faraɗa səza əray netiska, gəɓa zu faraɗa səmet ɓooliɗiski.

¹⁸ Wanəɗi kiyuk addəv əkkal metiŋgini; wanəɗi kiyuk aba vanday net ɗiy ŋgboŋgu.

¹⁹ Kəta məzuzelwən ɗar adannekenin zit akaw ɓa; məzuseɓwən ɗar adawmbəslən heret akaw ɓa!

²⁰ Dəpeleŋ ɗah wən moggon ɓa, əhẽweŋ wən mbərayin aket ɗiy en zeŋgleŋge naka dəlva.

²¹ Met bakaka akawa, ndəɗaŋ kuɗok! Kuɗok! Ənahaŋ na: «haram awlaka.»

²² Yawe kulaka, kəsok ɓatɓat ɓa, Daya kəzar səzaw faraɗa ɓa!

²³ Afɗahə, asil akə wən ammbawa; aw Maŋgəlva Daya nawa, akə wən ambawa.

²⁴ Atawwən naw va təstəs nok asani; Yawe Maŋgəlva nawa, adannekenən zit akaw ɓa!

²⁵ Adawnahaŋ a mekret na: «Əh! Waməkkpum baram taka ɓa.» Adawnahaŋ na: «Məsɗəkka ɓa.»

²⁶ Wil dədenin mənnekenin zit vi əray nawa dəssoŋ simbim simbim abamə! Wil dəgulnin Məslanən kiyit akawa dəssoŋ simbim simbimi!

²⁷ Ɗiy mənnekenən zit də təstəs nawa, dəɗɗəlaŋ də wənneke, dənahaŋ ɗayɗay na: «Yawe metiŋgini, ndəni dədannek də əssa zay na gawla nani.»

²⁸ Asna maw wapel wən na təstəs noko də wəɗi kiyuk pay pakə!