Gəlyaɗe 32 - Bible en Guidar

Ənneki an mambray na ɗəf avvuyko

1 Səza Davit. Əpel-məmyã'ən.

¹ Səza Davit. Əpel-məmyã'ən. Ənneki aza ɗəf məs mambray nan dəvvuyu, məs mambray nan andəkə!

² Ənneki aza ɗəf məs Yawe dəŋɗan heslepe nan ɓa, may maɗɗula naɗɗa vurum tay akan ɓa!

³ An in tat ɓatɓatə, masleŋsleŋgu pak zamzamə, in ənɗəs hurruɓu.

⁴ Vi kapay də dəfəɗ pak vok gədaki yi akawa, memew asseɓeŋgək sən təki kakãh na təlapaya. Əziwe

⁵ Nərban sukuk mambray nawa, nəsərət ki heslepe naw ɓa. Nəmna: «Wanərban an nəraygən sən Yawe», yaŋ nok kəzgan heslepe naw də mambray naw səkawa. Əziwe

⁶ Sən aski ɗəf təstəs pak adakkomok də pay an dəslə. Iŋkile metiŋgit fiyõhoŋ dayday na, agapaŋ na azan ɓa.

⁷ Təki nawɗam naw kənani, is tat əgu səma əzəmsahã, də salalay nawbit kətərwəslwa. Əziwe

⁸ Wanəyogoko, wanərban suk tive məs kədazba, wanəpsuk pepete, wanəzi haraw akoko.

⁹ Kəssoŋ va pələs may koropələs məza aɗɗumoŋ ɓaŋ ɓa, an wawar də helze tay a met ɓa na awziweŋ ɓaŋ ɓa! Vasna zəga tay nawrəhkum ɓa.

¹⁰ Tatwãh diyɗa dədawga məsdaraw, ya ɗəf an dəppan zən aka Yawe na, moggon dətərwəsla.

¹¹ Mənneken zukum addəv Yawe, məɗɗələ, ɗiy təstəsə, məs mekret bar pak məŋgəsl vaŋvəl nanneke!