Gəlyaɗe 31 - Bible en Guidar

Yawe, istə məzeŋge nawa

¹ Səza daya net məyaŋgəlya. Gəlyanalva na Davit.

² Yawe, azok nədawɗama, vi nədarba wil ɗah ɓa! Akõhgu addəv təstəs noko;

³ Apak sləmok kəlazawa! Ade, abitu də kakara! Asok ka milɓe naw gədəŋgədəŋgə, gəla na korgu nawkõhguwa.

⁴ Istə, milɓe nawa, korgu nawa. Aka iya noko, wakədaw abawa, wakərban su tive.

⁵ Wakəprətu səka bizwil məs anslənan abawa, vi istə təki nawkõh nawa.

⁶ Addəv vok nədappan əmpəs nawa. Kəpəlwəka Yawe, istə Maŋgəlva gesiŋ.

⁷ In tat əzel məzəzbanən zəga ɗarə; naw aka Yawe nəppan ki zuwa.

⁸ Wanəskəl dənneken zu vi moggon noko, vi kulak əzəmsahã nawa gəm kəsənək tatwãh nawa.

⁹ Kəppaw ava məzuzel naw ɓa, kəziwguwək aka təlwa, kəɗiwək na kiywa.

¹⁰ Awlu sãhə Yawe, megenegenew aɓohko: tatwãh tay ərros harawa, giyorgiyor wəlawa gəm gədəvwa.

¹¹ Zeŋgilew tay əgrak addəv əssa ngulummo, əzvaɗe naw addəv əŋɗəsa. Vi mambray nəgəɗi yi, əɓap naw tay əddak sən heslepe nawa sleŋsleŋɗe naw tay iyyumoŋgə.

¹² Nəkkpaŋgək zəga na əra net məzuseɓɗe nawa, nəkkpaŋgək zəga narba wil an faɗ azet meggeŋgiɗwa; masənkeɗ naw ageslne'eŋgik viwa: en duluwən appaka na, ənzoŋ suwəni.

¹³ Məzgəti kiyu va ɗəf məmtən kaɗɗumi akan ɓa, in tat va zəga məzəhhəya.

¹⁴ Vi nəprəmək ɗiy diyɗa əpel mbərayən akawa: «Geslne tay kiyu suləkə.» Tay əsapaŋ ətuvuroŋ wən akawa, aynanənək met akaw kawzan zeŋgilewa.

¹⁵ Ya naw akok nəppan ki zuwa Yawe. Yaŋ nəmna: «Istə Maŋgəlva nawa.»

¹⁶ Ənziya naw pak addəv voki yi; akõhgu səvet məzuzelɗe nawa gəm en məzərɓahawəni!

¹⁷ Appar horok akawa, in gawla noko, akõhgu də moggon noko!

¹⁸ Yawe, kəta nədarba wil vi nəyuk ɓa! Wil dədenin məsdarawɗe, dəpurkoŋ məɓaɓatit a təki net mimtiti!

¹⁹ Met muwaŋ wən dəmsə məpeleŋ wən nawku aka ɗəf təstəs də əɗi kiziti gəm də əzele!

²⁰ Moggon nok diyɗa yi məs kəɗi ta' ammbet məzugeslne'eŋ sukuni! Kəpsitik ɗiy dədaddoŋ əɗam azoko, abet ɗiy gboŋgu.

²¹ Is tat əɗamet a təki kədawɗaman horoko, faraɗa səza bizwil net ɗiyi. Is tat əɗamet a guɗuk faraɗa səza əpel mbərayən.

²² Soko sən Yawe, vi moggon nan agəɗ səwək sekene, addəv walaŋgəla-metiŋ na korgu.

²³ Yaŋ naw nənah addəv əttap naw na: «Məzawi səma horoko.» Mbara na kəprəmək əkkam naw gala nəhəm suk nabbah suwa.

²⁴ Məŋglu Yawe, munokum ɗiy nan en gesiŋ! Ɗiy en dətafaŋ na, Yawe tay əgeti, sən məgəɗ fərkã na, tay əfaɗ sən dayki an dəslə.

²⁵ Məssoŋ gboŋgboŋgu, məsɓan mokrokum mənokum məzugaŋ səva Yawe pakə.