Gəlyaɗe 22 - Bible en Guidar

Maŋgəlva nawa, vimi kəzgaw di?

¹ Səza daya net məyaŋgəlya, aka «Mune na bapummo». Gəlyanalva na Davit.

² Maŋgəlva nawa, Maŋgəlva nawa, vimi kəzgaw di? Vimi kəsok faraɗa di? Vimi kawkõhgu ɓa di? Vimi kaprəm ənɗes naw ɓa di?

³ In iyuk də kapaya, kawzlan su ɓa Maŋgəlva nawa; də dəfɗa, nawɓəta ɓa.

⁴ Istə Salala: Kəsok aka mazaŋga na məlyã, istə nawɗi kiyuk a Israyel!

⁵ Efiŋgiɗəm akok aziynən hereti; akok aziynən hereti, kəkõhgitike.

⁶ Ahəmaŋ sukunko, kəbitke; akok aziynən hereti, dərbaŋ wil ɓa.

⁷ Ya naw tentiwilge nənani, ɗəf nənan ɓa, nəkkpaŋgək zəga na əra net ɗiyi, məzelin net ɗiyi.

⁸ Məzuluwən pak tahəŋ əmasaŋ akawa; əŋgirɓiɓnin meti, əɓlanən kiyti:

⁹ Ənahaŋ na: «dəkkpaŋ aza Yawe vani! Dəpəlgən kana, dəmohgəni, adan aŋgluwəkəŋka!»

¹⁰ Istə kəgilgu səddəvət əmma, yaŋ kəɗiyu a met bide kutuku.

¹¹ Səza nəgil səddəvta, suk məpsukwa; Səddəvət əmma ləŋgə, istə Maŋgəlva nawa!

¹² Kəzar səzaw faraɗa ɓa, vi tatwãh go'o yi, ya məzəbbah su tay ɓa.

¹³ Medgeɗgeɗe diyɗa atakawənka, zəgeɗ nawra na Basan akaraŋgək kiywa.

¹⁴ Akolunək met akawa va ɓoolu dawpiwen zəga də əbay gəgay,

¹⁵ Gəɓa zu akkpa'ək va iŋkile; mesleŋsleŋgu pak vitviti. Dadawaw məstaka də timbe, tay ənwẽsl addəvwa.

¹⁶ Gbogboŋgu aŋkələk va galmayã, hərzlumu tip aza geŋɗetwa. Is tat əvoŋgu addəv burɗuk namta.

¹⁷ Kirɗe atakawənka; vanday net ɗiy mbəreyit akarək kiywa: atilikinək vaw də təlwa.

¹⁸ Wanəɓap əŋɗet sleŋsleŋɗe naw pakə; ɗiy əggbokən hereti, uluwəni.

¹⁹ Tahəŋ uɗeketin lukutɗe naw ka neti, gəm əɗɗaŋ vẽpəlu aka lukut nawa.

²⁰ Kəzar fara' ɓa Yawe! Istə gbogboŋ nawa, agəm zuko ade əbbah suwa!

²¹ Akõhgən zeŋgilew səma masalam gəm gəɓa zu səma kəra;

²² amohũ səma ɓoolu, gəm səba mohẽt təgənəɗe. Kəzlansuka!

²³ Wanərban iya nok sit milmiŋgiɗwa gəm wanəɗi kiyuk addəv ŋgboŋ net ɗiyi.

²⁴ Mənokum məgeslne'eŋ sənən Yawe, məɗi kini! Mənokum zev Yakob pak məgagdakani! Mənokum zeŋvit mə Israyelɗe pak mokrokum dəzlah səni!

²⁵ Dəzelen məssahã may əzgan addəv sahã nan ɓa; dəɗaman haran viyən ɓa; ahəm səni, aprəm səni.

²⁶ Əɗi kiya naw səzok ade! Addəv əkkal metiŋgini, in tat əknahan an maw aynə abet məgeslne'eŋ sənəni.

²⁷ Məvoŋgənən kiyit wazəmaŋ kpe'i; məzukayanən Yawe, waɗiynən kini. «Mokrokum, dənnek hã faɗə!»

²⁸ Dələv dəwənnan waɗɗumoni, wamndan aza Yawe; daŋgla net ɗiy-ɗar dəwənnet wappu'oŋ abani:

²⁹ Vi məlĩ na Yawe yi! Məlĩ yi aket dəlveŋge na guw pakə.

³⁰ Ɗiy gugriɗe naka dələv pak azəmaŋka, yeŋ uppu'oŋ abani! En nammba burɗuk pak mederetiŋ ɓa, agdukoŋguk abani.

³¹ Mazlalwã tay nawgəɗ sən wəza sən Yawe; kawpeli wən nan sən sayit ɗiyi;

³² wazzoŋgu, warbanən təstəs nan sit ɗiy nawa, aka an agəɗə.