Gəlyaɗe 20 - Bible en Guidar

Əkkam ammba məlyã

¹ Səza daya net məyaŋgəlya. Gəlyanalva na Davit.

² Kəta Yawe dəzlan suk pay tatwãh aruhko; Iya na Maŋgəlva na Yakob dəzeŋ aroko!

³ Waslən suk əbbah səddəv gəla nani, warma vok hã sə Siyon!

⁴ Waɗɗumon əvəl nok pakə; wataf əvəl nawzla kurmbuɗuk nokum! Əziwe

⁵ Wapsuk va na mokroko, waknəh suk an kəɗɗum pakə!

⁶ Waməŋgəzl vaŋvəl də wənnek aka əska wəla noko, waməsilgən gabaganarba aka iya na Maŋgəlva namə. Wəssõh nok pak Yawe waɗɗa suko!

⁷ Kakaŋ nəsənək na: Yawe akõhgənək mesiya nani; wazlan sən səddəv gəla salala nan sə disiŋ, də gurom na van dəzəŋ məskə wəla.

⁸ Meɓɓet aket mawteɗ nawgay appanən ziti, meɓɓet tamə, aket pilseŋge, ya nam na, aka iya na Yawe Maŋgəlva nami: anan mədawya.

⁹ Net aɓe'eŋke, askotoŋko, ya nam na, misilik ziwi.

¹⁰ Yawe, apsən əska wəla sən məlyã! Dəzlan səmgən pay mədawyani.