Gəlyaɗe 19 - Bible en Guidar

Gagdak na Maŋgəlva aka dəlva, mahenziŋ na Yawe

¹ Səza daya net məyaŋgəlya. Gəlyanalva na Davit.

² Disiŋ tay əpel wən na gagdak na Maŋgəlva, təki berŋgiŋ tay ərban wəza na vani.

³ Əsɓəta dəpaŋ tay ərban əsɓəta an pummo, Dəfəɗ aŋ tay ərban dəfəɗ an dədazzani.

⁴ Wən tay ɓa, əpel tay ɓa, wəlet aprəm ɓa.

⁵ Wəsler net ammbatək aka dələv pakə əpel net ammbatək a təki dələv abaymani. Maŋgəlva aherik gizlirke sən pay adaka,

⁶ va gawla dəɗi guluk dəgil sə giziŋ ananda, zən nek va gambara nanzan aka tive.

⁷ Sə metteɓ ma disiŋ agili, ndən kpaŋ a metteɓ man mbərən, zəga tay nawkõh səma əzla nan ɓa.

⁸ Mahenziŋ na Yawe təstəs-gəraki yi, apsən zeŋgile sən ɗəfa; an Yawe aɗi naɗɗa sesseli yi, apsən maɗɗula sən ɗəf ɗarə.

⁹ Wəsəɓ na Yawe sarra yi, wanneken makra ɗəfa; an Yawe aɗi naɗɗa nzoŋnzoŋgi, awkol hara ɗəf bodoŋgu.

¹⁰ Geslne na Yawe kotaki, wasan faɗə; wətawwən na Yawe gesiŋgi, pakgit təstəsəŋgə.

¹¹ Moggoni dayki meleŋge, dayki meleŋge saksak kpewi; gəŋɗəti dayki amama, dayki seɓe na amama!

¹² Wakol sənənən hara gawla nok pak bodoŋgu; watər sən wəray diyɗa dawɓesiti.

¹³ Naway nawla heslepe nan di? Askoɓu səza an nəraygən məs nəsən ɓa!

¹⁴ Azargən balam nok səret məɗiyaŋ kiziti: adaskanən wəlaw ɓa, vasna, wanəsaw təstəsə, wanəsaw maw bartata səza mambray diyɗa.

¹⁵ Ataf əpel na mawa də ŋgburŋgbur na makraw aboko, Yawe, milɓe nawa, məzubitwa!