Gəlyaɗe 147 - Bible en Guidar

Məgagdakan Maŋgəlva sən an agəɗə

¹ Məɗi ki Yawe! Vi lewi əlvan Maŋgəlva nam də gəlya, vi lewi nawɗi kiyən təstəsə!

² Yawe məs dərkan Yerusalem, wakkelet en məsimgit sə Israyel!

³ Ndəni məzənzeɗ məs mekret dəɓohu gəm məzugip huweɗ neti.

⁴ Tay əŋɗet ŋgərzleɗi; ndən iyet pak də iya neti.

⁵ Daya nam metiŋgini gboŋgboŋgu; wəsən nakan meŋge nan tay ɓa.

⁶ Yawe tay əbbah sit ɗiy məddekti, tay əɓegit məsdarawɗe hã afuŋ burusu.

⁷ Məgagdakan Yawe də əfet akani, məlvan Maŋgəlva nam də gaŋgara;

⁸ ndəni dədawsərət slaybuwən a disiŋ, dədawzi buwən aka dəlvafuŋ, dədawgilgit kevile aket mossorgoɗe gugriɗe.

⁹ Tay əpsit əzəm sit zəgeɗ memeyẽɗi, sit kirtit gaŋgrekeɗ an tay əhəmaŋgə.

¹⁰ Gbogboŋ na pələs annek zən ɓa, anneken zən də gurom na ɗəf ɓa.

¹¹ Ya Yawe tay ulasahã aket məgeslne'eŋ sənəni, aket məzuganən moggon nani.

¹² Mə Yerusalemɗe, mətibiren Yawe! Mə Siyonɗe, məɗi ki Maŋgəlva nokum.

¹³ Vi asɓetik təbzeŋge nawslakat maddembeɗe noko; aɗɗak əzaɓ aket kirtuk anokda.

¹⁴ Ndəni dədawɗi dələv nok addəv zazaya, tay əbok də gəpa kukuɗ na haykəmari.

¹⁵ Ndəni dədawslən əpel nan aka dəlvafuŋ, də kakara əpel nan adabbala.

¹⁶ Ndəni dədaggbo' ɓeɓrezlerizze bar va zeŋze, tay əndol ɓeɓrezleɗ va moŋglo.

¹⁷ Ndəni dədakrepet ɓeɓrezleɗ əndolit pesek peseki; naway nawziw aba zazay nan di?

¹⁸ Tay əslən əpel nani, tay əlyuɓti; tay əɓlan səmyã, iŋkile ədawaŋgə.

¹⁹ Tay əboton wən nan sən Yakob, wən net əsərəkɗe nan dit ətawwənɗe nan sən Israyel.

²⁰ Dəgəɗ vas sit ɗiy-ɗar ɓa, dəsinnin ətawwənɗe nan ɓa. Məɗi ki Yawe!