Gəlyaɗe 146 - Bible en Guidar

Yawe, məzuzeŋ net ɗiy məddekti

¹ Məɗi ki Yawe! Megenegenewa, aɗi ki Yawe!

² Wanəɗi ki Yawe an in tat madarawa; madambərgən pay nawa, wanəlvan Maŋgəlva.

³ Kəɗiynən kiykum aket ɗiy gugriɗ ɓa, may aka ɗəf titir məs əkõh tay avan ɓaŋ ɓa.

⁴ An əmpəs nan agilke, wamndan aka dəlvafuŋ a gəlani, pay nan na, an arəm naɗɗa pak wazə.

⁵ Əzaɓ aza ɗəf məs Maŋgəlva na Yakob asan məzəbbah nani, məs dədawgan səva Yawe Maŋgəlva nani!

⁶ Ndəni dəzəməɗ disiŋ də dəlvafuŋ, pehe gəm zəgeɗ naddəvit pakə, gegesiŋ avani hã faɗə.

⁷ Tay əka wən ammbet ɗiy məsər meti, tay əpsit way sit məs may adawda; Yawe tay əpil məfərsəneɗi,

⁸ Yawe tay əkol heret daŋgarɗe, Yawe tay əsilgit məs dəɓe'eŋgi, Yawe tay iŋgliw ɗiy en təstəsə,

⁹ Yawe tay əge molhõyẽɗi, tay əbbah sən mitiwe dət gagəbaya, tay əslokoron tive net məsdarawɗe.

¹⁰ Yawe wazəm məlĩ hã faɗə. Maŋgəlva noki is Siyon aza va sayit ɗiy amə' pakə! Məɗi ki Yawe!