Gəlyaɗe 145 - Bible en Guidar

Yawə əzəm məlĩ nok faɗi yi

1 Wəɗikiya. Səza Davit.

¹ Wəɗikiya. Səza Davit. Maŋgəlva nawa, məlĩ nawa, wanəɗi ki iya noko, wanəfet aka iya nok hã faɗə.

² Pay pak wanəfet akoko, wanəɗi ki iya nok hã faɗə.

³ Yawe metiŋgi yi, agapək nawɗi kiyən diyɗa; mẽmẽtiŋ nan aggbeŋ na ɓa.

⁴ Va sayit ɗiy agəɗ pak kawgagdeketi wəzeɗe noko, kabbalani sləmet wəzeɗe gugriɗ en kəgəɗə.

⁵ Gagdak na məlĩ nok mẽmẽtiŋgi, wanəsɗeket sekeneɗ noko.

⁶ Kawpeli wən nawɓap net sekeneɗ noko, wanəpel wən net wəzeɗe gugriɗ noko.

⁷ Waɗɗumon aka moggon nok diyɗaŋka, waɗɗəlaŋ aka təstəs noko.

⁸ Yawe məgəɗ mbəlembəle yi, muwəl sasãhĩ, awdagədəv go' ɓa, moggon nan man awsla ɓa.

⁹ Yawe moggoni azet ɗiy pakə, ulasasãh nan tay aka wəza nan pakə.

¹⁰ Yawe, wəzeɗe nok pak waɗiynən kiyko, məs dətafkun wafeteŋ akoko.

¹¹ Wapelnən wən na gagdak nawzəm məlĩ noko, wapeleŋ aket wəzeɗe na sləma noko,

¹² karbet wəzeɗe na sləma nok sit ɗiy, gəm gagdak nok metiŋ nawzəm məlĩ noko.

¹³ Əzəm məlĩ nok əzəm məlĩ an faɗi, əzəm məlĩ nok wasan aka sayit ɗiy va asan pakə. Daya aziwik ɓəlɓəl aka əpel nani, məwəlsãhã addəv wəza nan pakə.

¹⁴ Yawe yi mərəm vet məzəzbəraŋ pakə, tay əsilgit məs dəɓe'eŋ pakə.

¹⁵ Heret ɗiy pak akoki, əgan səvoko, is tat əpsit əzəm də pay nani;

¹⁶ is tat əkol vok əbet ɗiy mederet kəŋgəl pakə.

¹⁷ Yawe təstəsi aka tive nan pakə, moggon nan tay aket wəzeɗe nan pakə.

¹⁸ Yawe tay go'o azet məzuyanən pakə, məzuyanən an gegesiŋ pakə.

¹⁹ Tay əɗɗa əŋgla net məzugeslne'eŋ sənəni, tay əprəm əhəm neti, tay əkõhgiti.

²⁰ Yawe tay əge məzəŋglunən pakə, ya wazet məsdarawɗe pak hara.

²¹ Maw waɗi ki Yawe, məzəmpəs pak wafet aka iya nan salala hã faɗə!