Gəlyaɗe 139 - Bible en Guidar

Daya, kəsənək va nəsaw pakə

1 Səza daya net məyaŋgəlya; gəlyanalva na Davit.

¹ Səza daya net məyaŋgəlya; gəlyanalva na Davit. Yawe, kəkessenək an nazawa, kəsənka,

² kəsənək va nədawsawa, va nədawsilyewa; kəsənək əɗɗum naw səka faraɗa;

³ an in tat balbalə, an in tat əffete, kəsənək an nədaɗɗa pakə,

⁴ Tak əpel təttaka əzzan amawa, kəsənək kpekpe'i Yawe.

⁵ Dərɓagaw də dəbaw pak kətakawka, kəɗiyək vok akawa.

⁶ Wəsən na sekene dəday kiywa, kpumi day, nəɓap na əprəm gabban ɓa!

⁷ Kaddaw aŋga faraɗa səza əmpəs nok di? Aŋga nədanzaw faraɗa səbok di?

⁸ An nəpeŋgək a disiŋ, is tat adaka! Nəvoŋ aret ɗiy mimtiti, is yakənə!

⁹ An nəveŋgik a metteɓ ma dələv dəmmba pay nampum, awaniɓa an nəsawək a təki faraɗa dəmmba pay na moskoyo,

¹⁰ voki dədawku adaka'e, vok dəzəŋ dədarmuwa.

¹¹ Kəta nənah na: «Guzli dəsərətwa, dəfəɗ pak daŋdaŋgi azoko!»

¹² Guzli dayday guzli yi azok ɓa, dəfəɗ va kapay yi: guzli tay va təki daŋdaŋgə!

¹³ Istə kəzəməɗ kirit dəɓawa; is kəsɗəwu addəvət əmma.

¹⁴ Wanəɗi kiyuk vi va zəga na sekene kəzməɗwa, wəzeɗe nok sekeneɗiŋ, naw nəsənək lewlewi.

¹⁵ Sleŋsleŋɗe naw dəɗamaŋ ama horok gala kəzəməɗu də mahaɗamma ɓa, gala kəsɗəwu addəv həhədək na dəlvafuŋ.

¹⁶ Horok awlak va məlaku asani. Məvertiŋ pak addəv ɗerewel noko, məziwgiti əvoŋɗe nan tak əgap neti.

¹⁷ Maŋgəlva! Əɗɗum nok tuwãhi azawa, əŋɗa net diyɗa yi dayə!

¹⁸ In tat əŋɗeti, adayaŋgək ki hoyoŋko. In fəɗah na, in yakəŋ də is əmpa.

¹⁹ Maŋgəlva! Kəta abay məsdaraw kaka'ə! Azargit ɗiy məbayaŋ gəbay faraɗa səzawa.

²⁰ Məzuseɓɗe nok tahəŋ iyanən iya nok kawa wəna, tahəŋ iyanən vi kaɗɗa mbərayni.

²¹ Yawe, nəzelik məzuzelkuni. Maw tay aka ule məzusilyoŋ akok ɓa.

²² Wəzel an gərak nəzeleti, akkpaŋgaŋgək ka məzuzelɗe nawa.

²³ Maŋgəlva! Akkesen an nazawa, asən makrawa; asluwa, asən əɗɗumɗe nakawa.

²⁴ Awla kuzuŋ tive nawza nədawgəma, aku dəka tive an faɗə.