Gəlyaɗe 12 - Bible en Guidar

Əpel na Yawe addəv ənziya egge məraygəni

¹ Səza daya net məyaŋgəlya, də gəzləŋtəndəŋ məs helegen dodopoɗo. Gəlyanalva na Davit.

² Ade atərwa Yawe! Vi Məɗɗaŋ moggon agrakaŋka; vi ɗiy en təstəs ahhiyaŋgək səweleŋgit ɗiyi;

³ ɗəf də galan mbərayən adawpeleŋ aza ziti, hərzlumit nawlefe, əpeleŋ mekret sula sula.

⁴ Yawe dəɓot metteɓ met məzulefe, hərzlumit məpeleŋ zəgeɗ nawkuwa,

⁵ en dənahaŋ na: «Də hərzluməm mədaska wəla; metteɓ mam tay də mənamə; naway nawsan daya nam di?»

⁶ «Aka wən na wəsər met məssehẽŋɗe, əɓuhma net məzurayɗe, Yawe amna kakaŋ wanəsili, wanəɗi ɗəf adawtufoŋ mefɗe akan a təki nawkohõ.»

⁷ Əpel na Yawe əpel kotaki yi, va təbəz babar məhəsən ɗolok-ɗolok addəv kasli yi məɗaran təl buhulu.

⁸ Nok wakəziw aka əpel noko Yawe. Wakətərəm səva seyit ɗiyiŋ hã faɗə.

⁹ Məsdarawɗe tahəŋ ətiwileŋgi, zəga daryaw tay əday a weleŋgit ɗiy.