Gəlyaɗe 119 - Bible en Guidar

Mahenziŋ na Maŋgəlva moggoni sawɓa

¹ Əzaɓ aket məs dəssoŋ təstəs-gərak addəv ədaw neti, gem məzəzbanən mahenziŋ na Yawe.

² Əzaɓ aket məzərmanən an aziwgini, dədawkayanən də mekret pakə.

³ Aɗɗaŋ vurum kpak ɓa, tay əzbanən tive nani.

⁴ Istə kəɗi wəsəɓɗe noko vi karmet lewlewi.

⁵ Kəta wədaw naw dəziw ɓəlɓələ karme əsərəkɗe noko;

⁶ vasna nərbə na wil də wəsəŋgləket ətəlmaɗe nok ɓa.

⁷ Wanəɗi kiyuk də makraw taka, də wəyagan ətawwənɗe də təstəs noko.

⁸ In tat ərme əsərəkɗe noko, kədappaw firik faɗ ɓa!

⁹ Mbarmbari wədaw na gawla adawsan təstəs di? Də wəsla zən va əpel nok anahə.

¹⁰ Nəkoyokuk də makraw taka, kədappaw əza faraɗa səzet ətəlmaɗe nok ɓa.

¹¹ Nərmak əpel nok a makrawa, vi nədaɗɗa mbərayən akok ɓa.

¹² Soko noko Yawe! Arbet su əsərəkɗe noko.

¹³ An kətaw də mok pak nəŋɗanəka.

¹⁴ Wəzban an kəziwgini, tay ənneken su zu va kəɓəs na in tat də aryeɗ pakə.

¹⁵ Wanəɗɗumet wəsəɓɗe noko, wanəsəŋgliket tiveɗ noko.

¹⁶ Zu neki dit mahenziŋɗe noko, nəzgət na ki əpel nok ɓa.

¹⁷ Amndan sən gawla nok də moggoni: nəsawgən madarawa, nərmagən əpel noko.

¹⁸ Akol su harawa, nəsəŋgləketgin sekeneɗ na mahenziŋ noko.

¹⁹ Molhõyõ nan aka dəlvafuŋ, kəɗemet su wəsəɓɗe nok ɓa.

²⁰ Maw sirsiri yi aka wən kətaw temtem va pay agəɗ pakə.

²¹ Kəhẽyẽtik məzukaɓaŋ məreygit məzuzaŋ faraɗa səzet wəsəɓɗe noko.

²² Awɗakaw səza wəra də wəzele, vi in tat əzban an kəziwgini.

²³ An ɗiy gugriɗ aslerinik met akaw daydayə, gawla nok tay əɗɗumet əsərəkɗe noko.

²⁴ An kəziwgin zəknan neki azawa, ndəni məzuvay pepete.

²⁵ In yakəŋ ɓəlohhõ aka burɗuku, aɗɗa nənzigən va aza əpel noko.

²⁶ Nəboton sukuk tive nawa, kəzlan suwəka, ayeget su əsərəkɗe noko.

²⁷ Aprəman su gebbet wəsəɓɗe noko ka nəɗɗumetgən sekeneɗ noko.

²⁸ Tatwãh agilgitik sin arawa; amndok asilgu va əpel nok anahə.

²⁹ Azargən tive na əwa wən faraɗa səzawa, agəɗsu moggon va mahenziŋ nok anahə.

³⁰ Nəwelik tive an dəslə azoko, nəzbanək wən an kətaw temtemi.

³¹ Nəsokuk zu aza an kəziwgini; Yawe, kədarbə su wil ɓa.

³² In tat ənzaw aka tive net əsəɓɗe noko, vi is tat əkol su kiywa.

³³ Yawe arban su tive net əsərəkɗe noko. Nərmegin hã ŋgbu'u.

³⁴ Aprəman suwa, nərmagən mahenziŋ noko, nərmagən də makraw taka.

³⁵ Adawgu aka tive net əsəɓɗe noko, vi dəndəni zu adanneke.

³⁶ Akkpaŋgan makraw dəza an kəziwgin temtemi, məza dəza wəndəreh ɓa.

³⁷ Akkpaŋgan haraw səka ula zəga ɗarə aɗɗa nəsawgən madaraw aket tiveɗ noko.

³⁸ Aɗɗa an kiynə sən gawla noko, vasna kawgeslne' suki.

³⁹ Azargən əra məs dədawzlahgən makrawa, vi ətawwənɗe nok lewiŋgə.

⁴⁰ Yaŋ na maw aket wəsəɓɗe noko; aɗɗa nənzigən addəv təstəs noko.

⁴¹ Kəta moggon nok dəde akawa Yawe, də wəkõh va kəpeli.

⁴² Vasna wanərah əzlan sən məzurawa, vi aka əpel nok nəziwi.

⁴³ Kədawzargən əpel na gegesiŋ faraɗa sə maw ɓa, vi ətawwən nok nədawga.

⁴⁴ Wanərma mahenziŋ nok ɗayɗayə, hã faɗə.

⁴⁵ Wanəbbal kiyu foŋgo, vi nəkayetik wəsəɓɗe noko.

⁴⁶ Wanəpel wən na an kəziwgin temtem abet milyeŋge, wil aduwən na ɓa.

⁴⁷ Wanənneken zu dit wəsəɓɗe nok en nəŋgəl sawɓeŋki.

⁴⁸ Wanəslan vaw kəlazet wəsəɓɗe nok en nəŋgəl sawɓeŋki, wanəɗɗumet əsərəkɗe noko.

⁴⁹ Aɗɗumon wən kənah sən gawla noko, məs kənah su nawga.

⁵⁰ Əffeten makraw səddəv əzəmsahã nawi yi, vi əpel nok məzədawgən ənziya nawa.

⁵¹ Məzukaɓaŋ amasaŋgək akaw diyɗa, ya nəmzlah ki mahenziŋ nok ɓa.

⁵² Nəɗɗumonək wətawwən nok temtem an farə Yawe, affetenək makrawa.

⁵³ Makraw tay əssaw aka wən net məsdarawɗe məzəppanən mahenziŋ noko.

⁵⁴ Əsərəkɗe nok akkpaŋgaŋgək gəlyanalva naw addəv gəla məs nəsaw molhõyõ.

⁵⁵ In tat əɗɗumon iya nok də dəfɗa Yawe, vi kazban mahenziŋ noko.

⁵⁶ Haran naw na, ərma wəsəɓɗe noki.

⁵⁷ Haran naw nənah na Yawe, ərma əpel noki.

⁵⁸ Nəkoluk makraw pak ka kihorok dəppargəni, awla sasãhũ va əpel nok anahə.

⁵⁹ Nəɗɗumonək ədaw nawa wanəmilgən təlu aka an kəziwgini.

⁶⁰ Nəgəmək zu məza ənziya ɓa, karme wəsəɓɗe noko.

⁶¹ Məsdarawɗe aɓrukwənək dit helegeɗ neti, ya nəzgət ki mahenziŋ nok ɓa.

⁶² Teteŋgit sin nədawsilyaw vi kawɗi kiyko, vi wətawwən təstəs noko.

⁶³ In tat əsap azet məgeslne'eŋ sukun pakə, məzərmenin wəsəɓɗe noko.

⁶⁴ Moggon nok tay əknəh dəlvafuŋ Yawe; ayeget su əsərəkɗe noko.

⁶⁵ Yawe, moggon nok kəgəɗ sən gawla noko, va əpel nok anahə.

⁶⁶ Ayagan su əɗɗa moggoni, maɗɗula gəm əsəna, vi nəppanək kiyu aket wəsəɓɗe noko.

⁶⁷ Tak əvoŋgən kiywa, nəsawək slorsloru; ya kakaŋ na, nərmak əpel noko.

⁶⁸ Lew kənani məgəɗ moggoni, ayeget su əsərəkɗe noko.

⁶⁹ Məsfərkeɗ attəpawənək dit tepelkeɗ neti, Naw, də makraw taka nədarme wəsəɓɗe noko.

⁷⁰ Mekret aleŋgək va səlhã; naw in tat ənneken zu də mahenziŋ noko.

⁷¹ Moggoni azaw məzəmgu sãhã, vi kaŋɗet əsərəkɗe noko.

⁷² Mahenziŋ dəgil səmok moggoni azaw dayki meleŋge də təbəz babar gabal gabalɗe.

⁷³ Voki dəzəməɗwa, dərkuwa; aprəman suwa, nəyegetgin wəsəɓɗe noko.

⁷⁴ Məgeslne' sukun uluwəni, zit wanneki, vi aka wəpel nok nəɗi əga nawa.

⁷⁵ Nəsənka Yawe, wətawwən nok təstəsi yi, gesiŋ də tiven kəvoŋgən su kiywa.

⁷⁶ Kəta moggon nok dəffeten makrawa, va əpel nok sən gawla noko.

⁷⁷ Kəta ulasasãh nok dəsan akawa, wanəsaw madarawa, vi mahenziŋ noki yi ənnek nawa.

⁷⁸ Kəta wil dəsan aket məsfərkeɗi, asərnənək maw dit tepelkeɗi; naw in tat əɗɗum aket wəsəɓɗe noko.

⁷⁹ Məgeslne'eŋ sukun dəmndoŋ azawa, en dəsənnən an kəziwgin temtemi.

⁸⁰ Kəta makraw dəsan təstəs-gərak aket əsərəkɗe noko, vi nədarba wil ɓa.

⁸¹ Nəyək dawga əkõh noko, in tat əga əpel noko.

⁸² Haraw ayək dawga an kənahə, dawnəh na: Dewe kədaffeten su makraw di?

⁸³ Kəta nəkkpaŋ sosrokko va kwenekwene aret enene zlaŋ, də as pak nəzgət kiyit əsərəkɗe nok ɓa.

⁸⁴ Pay gbaŋgbar gawla nok adanziya di? Dewe kədawtawwən aket məzərɓahawəniŋ di?

⁸⁵ Məsfərkeɗ aso'oŋguk vov abawa, məs awdawaŋ va mahenziŋ nok anah ɓa.

⁸⁶ Wəsəɓɗe nok pak gegesiŋgiŋ, tay əzbawən də uwawən ɗarə, abbah suwa.

⁸⁷ Siɗikke ɓa na agrakawənək səka dəlvafuŋ, ya nəppet wəsəɓɗe nok ɓa.

⁸⁸ Aɗɗa ənziya naw dəsangən va moggon nok asani, ka nərmagən an kəziwgini.

⁸⁹ Yawe əpel nok aziwik faɗ a disiŋ.

⁹⁰ Moggon nok dəsan va sayit ɗiy amə'ə: kəɗiyək dəlvafuŋ, aziwke.

⁹¹ Wətawwən temtem tahəŋ ziwziw hã dəpaŋka, vi an kəzməɗ pak nawgəɗ suk wəza yi.

⁹² Va mahenziŋ nok dənneken zu ɓa, kəta wanəzə addəv əzəmsahã nawa.

⁹³ Nəzgət na kiyit wəsəɓɗe nok kpak ɓa, vi addəvən kədappaw ənziya.

⁹⁴ Nok nani, akõhguwa, vi nəkeyetik wəsəɓɗe noko.

⁹⁵ Məsdarawɗe tahəŋ əsekeɗwən nawzawa, naw in tat əzga sləma aka an kəziwgini.

⁹⁶ Nəsənək na zəga moggon awandi pak tay də əgrak nani, ya əzga' nok meŋge nan tay ɓa.

⁹⁷ Nəŋgluwək mahenziŋ nok diyɗa, pay pak in tat əɗɗum akani.

⁹⁸ Wəsəɓ nok tay əkkpaŋgaw məs maɗɗula daykiyit məzuzelɗe nawa. Nərmak ka naw hã faɗə.

⁹⁹ In tat də wəsən daykiyit məzuyagawəni, vi əɗɗum naw aka an kəziwgini yi.

¹⁰⁰ In tat əsən əgohon wən daykiyit ɗiy məsɓet pakə, vi nərmek wəsəɓɗe noko.

¹⁰¹ Nəslak təlu səka tive na mambray pakə, vi nərmagən əpel noko.

¹⁰² Nəmzlah səka wən nok kətaw ɓa, vi istə kiyagawa.

¹⁰³ Wəpel nok neki yi a baraw day ki amama!

¹⁰⁴ Dit wəsəɓɗe nok nəsən wəgohon gabba zəga, vini nədawzelen tive na uwawən pakə.

¹⁰⁵ Əpel nok lalam iyi ammba təlwa, əkeɗeɗe aka tive nawa.

¹⁰⁶ Nəswayka, nəmpak təlu narma wən temtem məs kətaw də təstəsə.

¹⁰⁷ Məzəmguwi sãhã day, aga megenegenew va əpel nok anahə Yawe.

¹⁰⁸ Kamə ataf əvəl na əkkam nawa Yawe, ayagaw wətawwən nok temtemi.

¹⁰⁹ Pay pak zeŋgilew aka dagrakay vawi nawza, ya nəzgət na ki mahenziŋ nok ɓa.

¹¹⁰ Məsdarawɗe enslineŋgik bizwil abawa, ya ndaw slorslor faraɗa səzet wəsəɓɗe nok ɓa.

¹¹¹ An kəziwgin temtem zəga nəzəmgəla azan hã faɗəŋgə: Vi ənnek na makrawəŋgə.

¹¹² Nəppanək makraw kazbet əsərəkɗe nok hã ŋgbu'u.

¹¹³ In tat əzel makra sula sula, mahenziŋ nok nədaŋgla.

¹¹⁴ Təki nawɗam naw də baray naw na istə! Əga naw aka əpel noki yi.

¹¹⁵ Məɗɗaŋ mbərayin, məzar faraɗa səzawa, maw aka əzbet mahenziŋɗe na Maŋgəlva nawa.

¹¹⁶ Arma vaw va əpel nok anahə, nəsawgən madarawa; kərbə su wil də wəga naw ɓa.

¹¹⁷ Asɓawa, nəkõhgəni, nulegin əsərəkɗe nok ɗayɗayə.

¹¹⁸ Is tat əzel məzəggaraŋ kiyit əsərəkɗe nok faraɗa pakə, vi pepet net pak uwawəni yi.

¹¹⁹ Va pəlumovoto kəkkpeŋget məsdarawɗe naka dəlvafuŋ, vini nəŋglu an kəziwgin temtem pakə.

¹²⁰ Sluw zu tay əkker sən geslne noko, makraw tay əzlah sən ətawwən nok temtemi.

¹²¹ Nəgəɗək zəga də tiveni, təstəsə; kəppaw avet məzusərnən maw ɓa.

¹²² Asok məkə na gawla nok dəsansugən lewi; vi məsfərkeɗ adawsərnən maw ɓa.

¹²³ Haraw ayək dawga wəkõh səvoko, gəm əkayan əpel na təstəs noko.

¹²⁴ Agəɗ sən gawla nok va moggon nok asani, gəm ayeget su əsərəkɗe noko.

¹²⁵ Gawla nok nənani, aprəman su əgohon gabba wəna, nəsəngən an kəziwgin temtemi.

¹²⁶ Pay na Yawe agapəka: tay əggaraŋ ki mahenziŋ noko.

¹²⁷ Vini nəŋgliw mahenziŋɗe nok day ki meleŋge, day ki meleŋge an saksakə.

¹²⁸ Vini nədawla wəsəɓɗe nok pak təstəsə; nədawzelen tive na əwa wən pakə.

¹²⁹ An kəziwgin naɗɗa temtem pak naggət aketiŋ, vini kiyu arme.

¹³⁰ Ərəh gabba əpel nok awkol ki ɗəfa, tay əprəman sit ɗiy en məza əsən ɓa.

¹³¹ Nəhã'ək maw hã' in əpel nok gbuɗok gbuɗokku, maw sirsir aket wəsəɓɗe noko.

¹³² Awəl dəzawa, awla sasãhwa, va ətawwən nok anah sit en dədaŋglunən iya noko.

¹³³ Təlu asəɓək va kənahə, kəppan mbərayən awandi pak əday kiyu ɓa.

¹³⁴ Apəlu səza uwawən net ɗiyi, nərmegin wəsəɓɗe noko.

¹³⁵ Kəta appar horok akawa, in gawla noko, ayeget su əsərəkɗe noko.

¹³⁶ Sin agilyoŋguk araw buwwa, vi dərmanən mahenziŋ nok ɓa.

¹³⁷ Yawe, təstəs kənani, wətawwən nok də tiveni.

¹³⁸ Də təstəs nok kərban an aziwgini, gəm addəv moggon nok gesiŋgesiŋ.

¹³⁹ Gala məzuseɓɗe naw azgətaŋ ki əpel noko, əŋgla hoɗhoɗ na makraw tay əzluwa.

¹⁴⁰ Əpel nok saksaki, gawla nok tay əŋgluni.

¹⁴¹ Də nəsaw muzliya, də məzelew zlaŋ, nəzgət kiyit wəsəɓɗe nok ɓa.

¹⁴² Təstəs nok təstəs an faɗi yi, mahenziŋ nok gegesiŋgi yi.

¹⁴³ Tatwãh də wəzəmsahã armuwənka, ya mahenziŋɗe nok annekinək zuwa.

¹⁴⁴ An kəziwgin na təstəsi yi hã faɗə; avay əsən nawgohon gabba wəna, nəsawgən madarawa.

¹⁴⁵ Də makraw taka nəyuko, azlan suwa, Yawe nərme əsərəkɗe noko.

¹⁴⁶ Nəyukko, akõhguwa, nəzban an kəziwgin temtemi.

¹⁴⁷ Tak bapummo, nəkkamək nabbaha; aka əpel nok nədawgani.

¹⁴⁸ In kim haraw ɗozloŋgo, vi kaɗɗumon əpel noko.

¹⁴⁹ Aka moggon noko, aprəm wəlawa Yawe; aga zeŋgilew va aza ətawwən noko.

¹⁵⁰ Məzbanən zəga net wiliŋ tay əgapaŋgə, addereŋgik faraɗa səza mahenziŋ noko.

¹⁵¹ Yawe, nok go'o kənani, ya mahenziŋɗe nok pak gesiŋgəŋgə.

¹⁵² Nəsənək far na, kəɗiyək an kəziwgin temtem pak ka faɗə.

¹⁵³ Awla sasãhwa, abitwa, vi nəzgət ki mahenziŋ nok ɓa.

¹⁵⁴ Akə wən ammbawa, abitwa; aɗɗa nəsawgən madaraw va əpel nok anahə.

¹⁵⁵ Wəkõh faraɗa yi səzet məsdarawɗe, vi tay əkeyetin əsərəkɗe nok ɓa.

¹⁵⁶ Yawe, ulasasãh nok diyɗa yi, aɗɗa nəsawgən madaraw va aza ətawwən noko.

¹⁵⁷ Məzərɓahawən dit məzuseɓɗe naw diyɗaŋ, ya nəmzlah faraɗa səza an kəziwgin temtem ɓa.

¹⁵⁸ Nəwələk məzəmaŋkiya, yaŋ makraw assawa vi dərmanən əpel nok ɓa.

¹⁵⁹ Awla va nəŋgliw wəsəɓɗe noko, aɗɗa nəsawgən madaraw va aza moggon nok asani, Yawe.

¹⁶⁰ Ki wən nawpel nok gegesiŋgi yi; ətawwən nok pak təstəsi hã faɗə.

¹⁶¹ Ɗiy gugriɗ arɓahawənək ɗarə, ya əpel noki makraw adawgeslne' səni.

¹⁶² In tat ənneken zu də əpel noko, va ɗəf dərah zəga nawrəh səma wəgay diyɗa.

¹⁶³ In tat əzel tepelke, nawlan va zəga ɓa, mahenziŋ noki nəŋgələ.

¹⁶⁴ Nəɗiyək kiyuk təl buhulu addəv əsɓəta, vi ətawwən temtem nok təstəsə.

¹⁶⁵ Zazay metiŋgin viyit en dəŋglunən mahenziŋ noko: net zəga tay nattepet ɓa!

¹⁶⁶ Əkõh nok nədawga Yawe nəzbetik mahenziŋɗe noko.

¹⁶⁷ Nəzbanək an kəziwgin temtem pakə, nəŋgluwək diyɗa.

¹⁶⁸ Nərmek wəsəɓɗe noko gəm an kəziwgin temtemi, vi tiveɗ naw pak abokəŋgə.

¹⁶⁹ Kəta əhəm naw dəgap aboko Yawe, avay əsən nawgohon zəga va aza əpel noko!

¹⁷⁰ Kəta əɓuhma naw dəgap aboko; abitu va əpel nok anahə!

¹⁷¹ Kəta maw dəgilgən əpel nawɗi kiya, vi is tat əyeget su əsərəkɗe noko.

¹⁷² Hərzlumu diya gəlya də əpel noko, vi mahenziŋɗe nok pak təstəsəŋgə.

¹⁷³ Kəta vok dəbbah suwa, vi wəsəɓɗe nok nəwelike.

¹⁷⁴ Maw aka əkõh noko Yawe, mahenziŋ nok dədanneken zuwa.

¹⁷⁵ Kəta nəsaw madaraw nawɗi kiyko, wətawwən temtem nok dəbbah suwa.

¹⁷⁶ Slorslor nan va time məzani akayan gawla noko, vi nəzgət kiyit mahenziŋɗe nok ɓa.