Gəlyaɗe 109 - Bible en Guidar

Əkkam na məs dolgoy akan

1 Səza daya net məyaŋgəlya; gəlyanalva səza Davit.

¹ Səza daya net məyaŋgəlya; gəlyanalva səza Davit. Maŋgəlva məs nədawɗi kiyən kəsok ɓatɓat ɓa,

² vi məsdaraw gəm məwəwən tay əparən na met akawa, apeleŋ suwənək də hərzlumit na uwawəna;

³ asərngəslwənək də əpel nawzele, tahəŋ əkklopoŋ suwən ɗarə.

⁴ A gəla əŋgla nawa, əkiyaŋ suwən dolgoy; ya naw in əkkama.

⁵ Mbərayən aɗiyaŋ suwən a gəla moggoni, wəzel a gəla əŋgla nawa.

⁶ Aɗi məsdaraw nawgay dəndəni, məkədolgoy dəziwgin aka dəzəŋ nani.

⁷ Pay mətawwən nani, wən dərma, wəkkam nan dəkkpaŋgən mambraya,

⁸ kəta ənziya nan dəsan duɗukko, ɗəf maɓɓan dəgəm wəza nani,

⁹ kəta kirtin dəssoŋ mitiwɗeŋge, ɗak nan təsat gagəbaya,

¹⁰ kəta kirtin dəssoŋ slorsloru, məŋgleŋge, dəbbəkaŋ faraɗa səzet ki məskiyɗe neti,

¹¹ kəta məs dəmən nan dərma arya nan pakə, kəta ɗiy ɗar dəllamnən ərəh nani.

¹² Kəta ɗəf taka dayday adawŋgəl sən moggon ɓa, kəta ɗəf adawla sasẽhit mitiwɗeŋge nan ɓa.

¹³ Kəta zeŋvin dəhhəyə, kəta iya nan dəvvuy səra sayit ɗiy nazzani.

¹⁴ Kəta dəɗɗumon sənən mambray net efiŋgiɗin sən Yawe, kəta heslepe nat man adavvuy ɓa.

¹⁵ Kəta es pak dəssoŋ ama hara Yawe, dəzangən iya net səka dəlvafuŋ!

¹⁶ Vi dəɗɗum naɗɗa moggon ɓa, arɓahanək məssahã, məzuraya gəm ɗəf məddakən, abeye.

¹⁷ Əray aŋgələ, yaŋ əray nak ade səni, man tay aka əzaɓ ɓa, yaŋ azar səzan faraɗa.

¹⁸ Aguluk əray azan va lukutu, yaŋ atoŋ addəv zlemzən va iŋkile, addəv sleŋsleŋgin va mẽlẽ.

¹⁹ Kəta dəsan sən va lukut azan silipi, ka maslapa an adayna agzen ɗayɗayə!

²⁰ Aski əfaɗ na Yawe sit məkiyaŋ dolgoy amawa, dit məpeleŋ mbərayən akawa.

²¹ Ya nok na Daya Yawe, akə wən ambaw vi iya noko. Vi moggon nok lewi, akõhguwa.

²² Vi məssahã gəm məzuray nani, addəv kpukpum naw na, in tat əzəmsãhã.

²³ Va zeŋgile adazzek nədaddawa, tay ərɓahawən va zaray.

²⁴ Takpraw tay əslakat vi nəzəm ɓa; gəɓa zu aggraka, nətarka.

²⁵ Naw nəkkpaŋgək ka zəga na əra neti; an awluwənka, ndəɗaŋ əɓlan kiyti.

²⁶ Abbah suwa Yawe, Maŋgəlva nawa! Akõhgu ammba moggon noko;

²⁷ dəsənnəngən na, aŋ voki yi as van istə kəɗɗa, Yawe!

²⁸ Net əɗɗaŋ mefɗeke; nok əɗɗa əzaɓa. Asilyoŋ suwənka, akkpaŋgək wil aketi, ya gawla nok wanneken zən hara.

²⁹ Kəta ərba wil dəde aket məkiyaŋ dolgoy amawa, wil net dəsan azet va lukutu!

³⁰ Wanəɗi ki Yawe dayadaya, wanəgagdakan a waleŋgit ɗiy diyɗa.

³¹ Vi tay iziw aka va dəzəŋ na məzuraya, kawkõhgən səvet mətawaŋwən mbərayən akani.