Gəlyaɗe 107 - Bible en Guidar

Gəlyeɗe en masle'eti ( GLƊ 107—150 ) Soko sən Maŋgəlva məzubite

¹ Məɗi ki Yawe, vi lewi yi, vi moggon nan tay hã faɗə.

² En Yawe abit dəpelenəni, en məs abit səva məzuseɓe,

³ en məs akkelet hã səket dəlveŋge, nammba pay nampum gəm na moskoyo, səkəla disiŋ gəm sə dohoŋ.

⁴ Meɓɓet azaŋgək slorslor dəka tive na kapta-muyã, dərahaŋ walaŋgəla-metiŋ dit ɗiy ɓa.

⁵ May ədeti, meme armeninke, gəɓa zit addakka.

⁶ Ahəmaŋgək sən Yawe addəv əzəmsahã neti, akõhgitik səka tatwãh neti:

⁷ Akek aka tive an sarra nawmbat a walaŋgəla məs ɗiy assoŋgu.

⁸ Dəɗinən ki Yawe vi moggon nani, viyit sekeneɗ nan ammba ɗəf titire!

⁹ Vi alɓanək giyorgiyor məs meme adaŋgə gəm aknəhək beret məs may adə də zəga moggoni.

¹⁰ Meɓɓet ara guzli adassoŋgu, ka məfərsəneɗ ara guzli tiɗimtiɗim dit ngiyamɗe,

¹¹ vi aɓoŋgoŋgək aka an Maŋgəlva apeli, azelenənək əɗɗum na Məsəɗəɗə.

¹² Adoɗuk kiyit də əzəmgit sahã, ataŋgbayaŋka, ɗəf tay dədabbah sit ɓa.

¹³ Ahəmaŋgək sən Yawe addəv əzəmsahã neti, akõhgitik səka tatwãh neti:

¹⁴ Agilgitik səra guzliyo, səra guzli tiɗimtiɗimi, aŋzliwik ngiyamɗe neti.

¹⁵ Dəɗinən ki Yawe vi moggon nani, viyit sekeneɗ nan ammba ɗəf titire;

¹⁶ vi aŋzliwik maddambeɗe na təbəz pepreŋge, apoŋ məslakataɗe na təbza.

¹⁷ Meɓɓeti, atemeŋ sən mambray nawɓoŋ neti, aka heslepe net atoŋgoŋ addəv tatwãhã.

¹⁸ Zəga nawzəm pak tay nek a met ɓa, tahəŋ əddakaŋ hã va namta.

¹⁹ Ahəmaŋgək sən Yawe addəv əzəmsahã neti, akõhgitik səka tatwãh neti:

²⁰ Aslənək əpel nani, anzeɗke akõhgitik səddəv magamas neti.

²¹ Dəɗinən ki Yawe vi moggon nani, viyit sekeneɗ nan ammba ɗəf titire.

²² Dəzaɓaŋ-Maŋgəlva nawɗikiya, gəm dərbetin wəzeɗe nan də wəɗɗəla nanneke.

²³ Məzumbataŋ aka pehe dit bəlayɗe, məzəɗɗaŋ wəza net aket iŋkile gugriɗe,

²⁴ Net awletinik wəzeɗe na Yawe gəm sekeneɗ nan aka pehe.

²⁵ Apelke, asilgitik barkataŋɗe asilgitik vovolumɗe.

²⁶ Azlahaŋgək a disiŋ, aprikeŋgik a təki kpukpumo, kiyit rimme;

²⁷ Kiyit viwwe ətotrokoŋ va məs mbazla abayə maɗɗulet pak ahəhəɗəkka.

²⁸ Ahəmaŋgək sən Yawe addəv əzəmsahã neti, akõhgitik səka tatwãh neti:

²⁹ Aɓətgitik barkataŋɗe, vovolumɗe aɓətaŋka.

³⁰ Zit annekik sən əɓəta neti, Maŋgəlva akek ama buzgum nawziw na bəlay an na mekreti.

³¹ Dəɗinən ki Yawe vi moggon nani, viyit sekeneɗ nan ammba ɗəf titire.

³² Dətibirenən addəv əkkal net ɗiyi, dəɗinən kiyən addəv əsap net ɗiy məsɓeti.

³³ Waɓap əkkpeŋget məlpeŋge ka kapta-muyã, heret iŋkile ka dələv net meme,

³⁴ dələv məs ba'ar ka təki mukuro, vi mbərayən net ɗiy nakani.

³⁵ Waɓap əkkpaŋgan kapta-muyã ka bobok net iŋkile gəm dələv net meme ka heret iŋkile.

³⁶ Wapsit təki nassa sit məzəmaŋ maya, waɗiyaŋ walaŋgəla-metiŋ ka nassa.

³⁷ Tay əzlgenin gulyeŋge, əmpenin megezlembirkeɗi, awaŋgək nawɓuho.

³⁸ Aɗɗak əzaɓ aketi, tay uwanən kiyit diyɗa, arrehet zəgeɗ memeyẽɗ net ɓa.

³⁹ Arreheŋ gəm adarbaŋ wil na sən tatwãh gəm sən əzəmsãhãy yi.

⁴⁰ Tay əggbo' əzel aket ɗiy en tekteki, gəm ndən əzet slorslor a muyã məza tive ɓa.

⁴¹ Ya tay əge məzurayɗe səza əzəmsahã tay əɓaygən gəla net va gazlaŋɗe.

⁴² Ɗiy təstəs wawlanəni, wannekeŋgi, mbərayən pak wampan mani.

⁴³ Məsmaɗɗula dərme zəgeɗis pakə, gəm dəwelet wəzeɗe na moggon na Yawe.