Gəlyaɗe 106 - Bible en Guidar

Əggbak ma na Israyel, də moggon na Maŋgəlva

¹ Alleluya! Məɗi ki Yawe, vi moggoni. Vi moggon nan tay hã faɗə.

² Naway nawɓap əpel wən na makra nan may əprəman əɗikiya nan pak di?

³ Wəzaɓ azet mərmanən mahenziŋ nani may məɗɗaŋ zəga təstəs pay pakə!

⁴ Aɗɗum akaw pay kədaɗɗa moggon sit ɗiy noko, Azəg sləma akaw pay kədawkõhgit ɗiy noko,

⁵ nulagən əzaɓ net muweleɗe noko, kaprəm ənnek net ɗiy noko, gəm kawɗakan ənnek dit en nawray voko.

⁶ Məgəɗək mambray va net efiŋgiɗmə, məmzlahka, məraygənəka.

⁷ Afiŋgiɗim a Eziptə, dəsənən gabbet sekeneɗ nok ɓa. Dəɗɗumonən moggon nok diyɗaŋ ɓa, aɓoŋgoŋguk ama pehe, pehe net vəlarɗe.

⁸ Də as pak akõhgitik aka wən na iya nani, vi karban əɓap nani.

⁹ Ahãyãnək pehe net vəlarɗe, ndən sa'ãtə; atoŋgit dəddak məlpa va də kapta-muyã.

¹⁰ Akõhgitik səva məzuzeleti, abitik səva məzuzele.

¹¹ Iŋkile asulupinik məzuseɓɗe neti, dəpəl səret taka dayday ɓa.

¹² Atafənək əpel nani, abbalanənək əɗikiya nani.

¹³ Azgətaŋgək kiyit wəzeɗe nan go'u, dəganən an aɗɗum naɗɗa dərɓagan ɓa.

¹⁴ May na zəga armek a kapta-muyã, aslanənək Maŋgəlva a muyã.

¹⁵ Apsitik an assohõŋgu, zəga navviret aslən sit hara.

¹⁶ Aɗɗaŋgək kotorok na Moyis a dibirgidiki, gəm na Aron ɗəf an Yawe aweli.

¹⁷ Dələv akolko, asɗək Datan, asiritik ɗiy nammba Abiram.

¹⁸ Offo azlak ngaɓa neti, hərzləm offo azimik məsdarawɗe.

¹⁹ Azaɓaŋgək wət wasli a Horeb; appu'oŋguk aba zeŋgile zəga na təbəz məhəsni,

²⁰ Addəɗanənək Maŋgəlva dəsan gagdak net də zeŋgile wasli məzəm kiste!

²¹ Azgətaŋgək ki Maŋgəlva, məkõhgiti, məs dəgəɗ zəgeɗ gugriɗ a Eziptə,

²² sekeneɗ aka dələv na Kam, zəgeɗ na seserge ama pehe net vəlarɗe.

²³ Anahək nawzeti, va Moyis məwele nan dəziw a təki məɓzluwən aban kaffetet herɗe nan nawzet ɓa ɓa.

²⁴ Azelenənək dələv na sləma, dətafnən əpel nan ɓa,

²⁵ aɗɗaŋgək ŋgburŋgbur addivit gizlirkeɗe neti, dəprəmnən ma Yawe ɓa.

²⁶ Aslanək van aket nawbeyit a kapta-muyã,

²⁷ kawtərayet aket dilveŋge, kawbay zeŋvit a waleŋgit ɗiy-ɗarə.

²⁸ Asapaŋ sənənək Ba'al na Pe'or, yaŋ azəmaŋ əzaɓ-Maŋgəlva sən maŋgəlva məzəmta,

²⁹ Adan sənənək gədəv Daya də wəɗɗa neti, yaŋ gəbay metiŋ ade aketi.

³⁰ Yaŋ Pinhas aziw atawwən nani, gəbay aziwi.

³¹ Məŋɗan səni as ka wəza təstəsə, va aza sayit ɗiy amə' pak hã faɗə.

³² Adan sənənək gədəv Maŋgəlva a met iŋkile na Meriba, ndəni dəkkpaŋ əray aza Moyis aka wən neti,

³³ adan atemeŋ aka əɗɗum nani, Moyis apelək məza ɗuɗumgən sa ɓa.

³⁴ Dəzetin ɗiy en məs Yawe anah sit ɓa.

³⁵ Aslãhaŋgək dit ɗiy ɗaɗarɗe, ayaganənək zəga naɗɗa neti.

³⁶ Aɗɗaŋgək wəza sit meŋgilveɗ neti, kpaŋgaŋ ka bizwil abeti.

³⁷ Azabaŋgək-Maŋgəlva dit kirtit mezeŋgleketi, gəm kirtit muguluŋgit sit tuyeŋge.

³⁸ Aggbo'inik mbel net ɗiy en slamma, mbel net kirtit mezeŋgleket dit muguluŋgiti azaɓaŋ-Maŋgəlva sit meŋgilveɗ net mə Kana'anɗe, yaŋ dələv arnok dit mbel lokloku.

³⁹ Arnokonənək zit də wəza neti gəm azbetinik meŋgilveɗ meɓɓeti.

⁴⁰ Yawe akiyək herɗe aket ɗiy nani, azelik ɗiy nawray nani.

⁴¹ Appetik avet ɗiy-ɗarə, yaŋ məzuzeletin azəmaŋ məlĩ aketi;

⁴² məzuzelɗe asərnənək meti, yaŋ avoŋgənən kiyit abeti.

⁴³ Təl ɓaɓay akohgit səvet ɗiyi, də as pak tahəŋ hərək hərək də əggbak ma neti, aguloŋguk də metiŋgin addəv heslepe neti.

⁴⁴ Awlak əzəmsahã neti, gala aprəm əhəm neti.

⁴⁵ Yaŋ aɗɗumon wənmiyna nan dənɗaŋgə, aɗiyək marava va aza mẽmẽtiŋ na moggon nani.

⁴⁶ Akkpaŋganək mekret ɗiy en dərmenin duletingin sãhə.

⁴⁷ Akõhgəmə, Yawe Maŋgəlva namə: akkalam səret ɗiy-ɗarə. Vasna waməɗi ki iya nok salala, waməgagdakan zəm də wəɗi kiyko.

⁴⁸ Soko sən Yawe Maŋgəlva na Israyel, far na sete hã dugurmuku. Ɗiy pak wanahaŋ na: «Dəsan vaska! Məɗi ki Yawe!»