Gəlyaɗe 105 - Bible en Guidar

Alabara na moggon na Maŋgəlva

¹ Məɗi ki Yawe, miya iya nani, mərban an agəɗ naggət akan a weleŋgit ɗiyi.

² Miyə sən gəlya, məlvani; məɗɗumet sekeneɗ nan pakə.

³ Məɗi ənnek nokum aka iya nan salala, mənneken zukum mənokum məkayanən Yawe.

⁴ Məkayan Yawe də gbogboŋ nani, məkayan ula haran pay pakə.

⁵ Məɗɗum aket teteleɗe en agəɗə, sekeneɗ en agəɗ gəm wətawwən an dəgil sə mani,

⁶ Mənokum zev Abraham gawla nani, mənokum kirtin Yakob məs aweli!

⁷ Ndəni Yawe Maŋgəlva namə, məzuzəm məlĩ aka dələv gboŋgu.

⁸ Tay əɗɗumon wənmiyna nan pay pakə, wən məs aɗi sən sayit ɗiy gabalə,

⁹ an aynə də Abraham, dərbə də əsway sən Isak.

¹⁰ Aɗiyək va mahenziŋ sən Yakob, ka wənmiyna sən Israyel hã faɗə,

¹¹ gala anah na: «Wanəpsuk dələv na Kana'an, hara dələv nokumi!»

¹² Tahəŋ dədaya ɓa, ŋgbəra'əŋ aka adaddoŋ va molhõyẽɗ aka dəlva.

¹³ Ətiwileŋ aka dələv temtemi, aka va net məlyeŋge temtemi,.

¹⁴ Ya appan ɗəf dəsərgən met ɓa, azgasitik milyeŋge aka wən neti:

¹⁵ «Kədawrəŋgitin en məpeslit naw ɓa; kədaɗɗaŋ mbərayən sit məskəleŋɗe naw ɓa.»

¹⁶ Akiyək may aka dəlva; araygənək way neti.

¹⁷ Aslənək ɗəf abeti, Yosef, məvələn ka balam.

¹⁸ Məslakatni tələn dit ngiyamɗe, məgul səni təbəz awlan va everzle məbaya;

¹⁹ hã gap pay an apel akan aknahə Yawe arban na tay an agəɗ ɓa.

²⁰ Məlĩ aɗiyək wən nawpəlni, daya net ɗiy apəlka.

²¹ Aɗiyək daya aka gəla nani, daya aket zəgeɗ nawray nan pakə,

²² vi kawsepet ɗiy gugriɗ nan azani, gəm dəpsitgən maɗɗula sit ɗiy məsɓet nani.

²³ Yaŋ Israyel atoŋ a Eziptə, Yakob asim aka dələv na Kam.

²⁴ Maŋgəlva akkpeŋgetik məzuwaŋ diyɗa, apsitik gbogboŋ daykiyit məzuseɓɗe neti.

²⁵ Akkpaŋganək mekret mə Eziptəɗe, vi dəzelningin ɗiy nani, dəɗɗaŋgən vurum aket gewleɗ nani.

²⁶ Aslənək gawla nan Moyisi, gəm Aron məs aweli.

²⁷ Aɗiyənək zəgeɗ nawsənən azan a waleŋti, gəm teteleɗ aka dələv na Kam.

²⁸ Aslənək guzliyo, guzli adeke, dəɓogoŋ sənən əpel nan ɓa.

²⁹ Akkpaŋgetik iŋkile net ka mbeli, abeyik kilfeŋge neti.

³⁰ Eŋgeleŋɗe hõslõ' hõslõ' aka dələv neti, hã addəvit giziŋɗe net milyeŋge neti.

³¹ Maŋgəlva peli, yaŋ ɓaɓaramɗe dit birteŋɗe awaŋ aka dələv net pakə.

³² Maŋgəlva ta sit ɓeɓrezleɗ a gəla buna, offo dəsəɗ nzilimnzilim aka dələv neti.

³³ Maŋgəlva ambrohik megezlembirkeɗ dit sokoyeɗ neti, yaŋ aŋzlet wəleŋɗe naka dələv neti.

³⁴ Maŋgəlva peli, zaray payə dit sesɓekeɗ aŋɗaŋ ɓa.

³⁵ Azəmənək kevile naka dələv net pakə, agrakənək əzəm naka dələv net pakə.

³⁶ Abeyik magaziɗe naka dələv pakə, uwa na maddaabəŋ neti.

³⁷ Agilgitik ɗiy nan də təbəz babar gəm meleŋge, tay dəkker səret mahəlfaɗe nan ɓa.

³⁸ Zə Eziptə annekik dawgilya neti, vi geslne net armaka.

³⁹ Aweɗik slaybuwən ka məzlzlara, gəm offo, kawkekeɓe' dəfɗa.

⁴⁰ Aka əssõh net aki sit gbegberwekɗe; abet də way na disiŋ.

⁴¹ Akoluk milɓe, iŋkile adawaŋka, adawaŋgək a kapta-muyã va məlpa guzlo.

⁴² Aɗɗumonək əpel nan salala apel sən gawla nan Abraham.

⁴³ Agilgitik ɗiy nan addəv ənneke, ɗiy muwelit nan də vaŋvəl nanneke.

⁴⁴ Apsitik dəlveŋge net ɗiy-ɗarə; agəmənək ətərwəray na wəza net ɗiy ka neti.

⁴⁵ Vi dərmanəngən əsərəkɗe gəm dəzbetingin tiveɗ nani. Məɗi ki Yawe!