Gəlyaɗe 104 - Bible en Guidar

Soko sən Maŋgəlva Məzəməɗə

¹ In tat əsokon Yawe! Yawe Maŋgəlva nawa, matuŋguk kənan sawɓa! Kəguluk gagdak gəm əwiɗe,

² Kəmbəkək əkeɗeɗe azok va lukutu kəpparək disiŋ va gabaga.

³ Is tat əzargasl gəleɗe nok aket iŋkile na disiŋ; kəɗiyək slaybuwən ka mawta nawgay noko; aka persleke səmyã kədabbala.

⁴ Səmyã yi ka maslənɗe nani, hərzlum offo, ka məɗɗaŋ wəza nani.

⁵ Kəɗiyək dəlvafuŋ aka gabbani, aɓəl na ɗah ɓa faɗə.

⁶ Kəsərətək də pehe va də lukutu; iŋkile asəkəkaŋgək hã aket mossorgoɗe gugriɗe.

⁷ Vi wəhãy noki yi anzoŋgu, sən wəhãy na buwən noki agəmən ziti,

⁸ əkarmaɗaŋ aket mossorgoɗe gugriɗe, əprikeŋ a walaŋɗe də təki kəɗi viyti.

⁹ Kəɗi sitik meŋge məs adaggaraŋ ɓa; amndoŋ na əsərət dəlvafuŋ əmpa ɓa.

¹⁰ Is kədakol heret iŋkile a məlpa: aweleŋgit mossorgoɗe gugriɗ adawdawaŋgə;

¹¹ zəgeɗ nawra pak adak adawsaŋgə, korɗe nawra adak adawbaynən meme neti.

¹² A meti biŋgeɗ na disiŋ adassoŋgu əhəmaŋ addəvit gaslembeɗi.

¹³ Hã səŋgil anokda kədalɓet mossorgoɗe gugriɗe, dəlvafuŋ tay əba dit wəzeɗe noko.

¹⁴ Is tat əgilgin kevile sit zəgeɗ memeyẽɗi, əgilgin zəga an ɗəf adense, vi ɗəf səka dəlvafuŋ adawrəh əzəm nani,

¹⁵ gəm mbazla məzənneken mekret ɗiyi, də mẽl məwiɗgən heret ɗiyi, gəm zəga nawzəm məpsit gbogboŋ sit ɗiyi.

¹⁶ Wəleŋɗe na Yawe abaŋka, wəleŋɗe na Liban en ampə.

¹⁷ Adak biŋgeɗ adawzaɓaŋ gəla neti, gəla na wəlamoygoy aket goŋgyomɗe yi.

¹⁸ Mossorgoɗe gugriɗ məɓeyit adak gilew nawra adassoŋgu, milɓeɗiŋ təki nawɗam net koyɗoŋɗe.

¹⁹ Aɗɗa təla na, vi kawɗi pay na wəzləra, pay asənək ətəpa nani.

²⁰ Kəɗi guzliyo, ndəni dəfɗa zəgeɗ nawra pak addəvni adawkayaŋ əzəm neti.

²¹ Ɓooliɗ tahəŋ əhəmaŋ ammba zəga nampər neti, əssohõnən əzəm net ama Maŋgəlva.

²² An pay tay əgilye, ndəɗaŋ əzaraŋ ədawvoŋgoŋ a bətəŋ anetda,

²³ ɗəf wagil ama wəza nani, ama inse nan hã moskoyo.

²⁴ Wəzaɗe nok diyɗaŋgə, Yawe! Də maɗɗulok kəɗɗe pakə, dəlvafuŋ aknahək dit zəgeɗ en kəzəməɗə.

²⁵ Pehe yaŋka, metiŋgin weɗweɗ təki pakə, məzəɓlaŋ addəvən aŋɗaŋ ɓa, zəgeɗ memeyẽɗ memeɗeŋɗe dit gugriɗe.

²⁶ Adak bəlayɗe adabbalaŋgə, gəm heŋzle məs kəgəɗ adasmayaŋgə.

²⁷ Ndəɗaŋgis pak səvok adawgaŋ əzəm neti kəpsitgən də pay nani.

²⁸ Is tat əpsiti, ndəɗaŋ ətafəni; an kəkoluk voko, ndəɗaŋ əbaŋ də zəga.

²⁹ An kəɗamanək horoko, ndəɗaŋ əzaŋgə; an kəgəmək əmpəs neti, ndəɗaŋ əmtaŋ əmndoŋ addəv burɗuku.

³⁰ An kəpsitik əmpəs noko, ndəɗaŋ əzəməɗaŋgə, is əkkpaŋgan dələv meleketeni.

³¹ Gagdak na Yawe dəsan faɗə, Yawe dənneken zən dit wəzeɗe nani!

³² An awla dəlvafuŋ, asna dələv əkkere; An arəŋgitik mossorgoɗe gugriɗe, enene tirliŋgi.

³³ Waniyə gəlya sən Yawe pay naw pakə, wanəlvan Maŋgəlva də gəlya, pay ənziya naw egge.

³⁴ Kəta gəlya nawɗi kiya naw dəsan sən neki! Naw wanənnek də Yawe!

³⁵ Kəta məs mambrayɗe dəgrakaŋ səka dəlvafuŋ, məsdarawɗe adassoŋ əmpa ɓa! Naw anəsokon Yawe! Məɗi ki Yawe!