Gəlyaɗe 103 - Bible en Guidar

Gəlya nawsokon Yawe

1 Səza Davit.

¹ Səza Davit. In tat əsokon Yawe, wanəfe aka iya nan salala!

² In tat əsokon Yawe, nəzgət ki moggon nan agəɗ pakəŋ ɓa!

³ Ndəni məzəvvuyon heslepe nok pakə, ndəni məzənzeɗ gbəgbaɗe nok pakə.

⁴ Ndən dədawbituk səma magamasə wagəɗ suk moggon diyɗa, wawəl sãhã akok diyɗa.

⁵ Ndəni dədawban ənziya nok dit zəgeɗ moggeti, tay əkkpaŋgok gawla va gazla.

⁶ Yawe tay əɗɗa wəzeɗe nan də təstəsə, wakə wən ammbet ɗiy məsər met pakə.

⁷ Arbannək tive nan sən Moyis sit mə Israyelɗe tam, wəzeɗe gugriɗ nani.

⁸ Yawe muwəl sasãhĩ, məgəɗ mbəlembəle, awdagədəv go' ɓa, məgəɗ moggoni diyɗa.

⁹ Azban əraygən sit ɗiy ɓa, arma wən a makran ka faɗ ɓa.

¹⁰ Awgəɗ səm va aza mambray nam ɓa, amndagan səm va aza heslepe nam ɓa.

¹¹ Va disiŋ asan aka dəlvafuŋgu, moggon nan adayək aket məgeslne'eŋ sənəni.

¹² Va mammba pay nampum asan faraɗa səza an na moskoyo, vas adawɗi əggbak ma nam səzam faraɗa.

¹³ Va afit kirin adawla sasẽhit kirtini, vas Yawe adawla sasẽhit məzugeslne'eŋ sənəni;

¹⁴ vi nan asənək va məzəməɗmə, aɗɗumon na, burɗuk mənani.

¹⁵ Pay na ɗəf titir anzi na ɓa va kevile; waffuy va əffuyeɗi.

¹⁶ An səmyã atoŋguk dəkani, tay ɓa ləŋ, gəlan awsən əmpa ɓa.

¹⁷ Ya moggon na Yawe, farfari, wasan hã faɗə. Tay aket en dədawgeslne'eŋ sənəni, təstəs nan sit kirtit kirtiti yi,

¹⁸ sit məs dərmanən wənmiyna nani, məzəɗɗumoŋ əɗɗa an aɗi naɗɗa.

¹⁹ Yawe aɗiyək mazaŋga na məlĩ nan a disiŋ, məlĩ nani yi aka zəga pakə.

²⁰ Məsokon Yawe, mənokum maslayɗe nani, gbogboŋɗe muwelit naka wəza nawpel nani, məzəprəmən əpel nani.

²¹ Məzəlpaŋ nan pakə, məgəɗ soko sən Yawe, mənokum naka wəza nan məɗɗaŋ əŋgla nani.

²² Məgəɗ soko sən Yawe, mənokum məs azəməɗ pakə, akki kəssoŋ aka va nan pakə. Naw pak wanəgəɗ soko sən Yawe.