Galatiyen 5 - Bible en Guidar

Əssa na məkristu na kiyən gəm wəza nani ( 5:1—6:10 ) Kədawzanən əssa na kiykum ɓa

¹ Ka məsamgən na kiymi Kristu apəlmə, məziw kan ɓəlɓələ. Ɗəf adakkpaŋgokum belemɗe əmpa ɓa.

² In Pol yakəŋ nədawnah sukum, an kətafənək əskəlawra, Kristu atərna wəray azokum ɓa.

³ In tat əpel maw taŋtaŋ sən ɗəf pak dətaf əskəlawra əmpa na: aynanək kiyən nazban mahenziŋ də wən nani.

⁴ Kuɗaŋkaŋgək də Kristu, munokum məzukayaŋ əssa təstəs də mahenziŋ, kəbətaŋgək səddəv mbəlembəle.

⁵ Vi namə, əga na təstəs nam səza Əmpəs ade də ətafa, mənam tat əgan ɗəhərra.

⁶ Vi addəv əsap də Yesu Kristu na, əskəlawra də əssa gayã atəraŋ na wəray abbər ətaf məzərba də əŋgla ɓa.

⁷ Kənzoŋguk lewlewi, ya naway dətakkum dawɓe' sən gegesiŋ di?

⁸ Ədoɗkiya vanəs dəde səza an məs dəyukum ɓa.

⁹ Wuɗo siɗikke wahəs gəpa məvorun pakə.

¹⁰ Naw nəsənək ənziya nokum addəv Daya, tay kədaɗɗumoŋ temme ɓa. Ya ɗəf an dəzlzlaɓokum, dəsan nawa zlaŋ, kawtawi wən akani.

¹¹ Ya naw na, milmiŋgiɗwa, va in tat ətəlma əmpa aka wən na əskəlawra na, vimi əmpa məsər maw di? Asna, kəta məzliwrihe zəga nawtaŋgbayəŋ asan na ɓa.

¹² Məzlzloɓokumən vetis dətawən bet van tərŋgbəkə an aŋglaŋka.

¹³ Məlmiŋgiɗwa, nokum, kassa na kiykumi məyukum. Ya hara na, əssa na kiykum adakkpaŋ ka zəga nazban əngla na gəɓa zukum ɓa, məssoŋ belemɗe a walaŋ zukum də əŋgla dərəŋgə.

¹⁴ Vi mahenziŋ də wən nan pak asapə addəv əpel taka, ndəni: Kəŋglugən meggok va kəŋglu kiyko.

¹⁵ An mənokum tat əharanən zukum, mənokum tat əzəm zukum. Məzi zukum vi kədawzanən zukum ɓa.

Ədaw də Əmpəsa məza də əŋgla na gəɓa zə ɗəf ɓa

¹⁶ Nəɓsukum na: Əmpəs dədawgukum, asna, kəɗɗaŋ əŋgla na gəɓa zə ɗəf kpak ɓa.

¹⁷ Vi əŋgla na gəɓa zə ɗəf awsler də Əmpəs ɓa, Əmpəs tam awsler də gəɓa zə ɗəf ɓa. Masaŋ a walaŋ ziti, vi an kəŋglaŋ naɗɗa na kədaɗɗanən ɓa.

¹⁸ Ya an Əmpəs dədawdawgukum, asna, ammba təl mahenziŋ kənanaŋ ɓa.

¹⁹ Wəzaɗe na gəɓa zə ɗəf yeŋki: polkoyo, harammba, ɗarɗarə,

²⁰ əzban zəgakamaŋgəlva, təfiya, əzele, əgaya, kotoroku, makra, masa, mawanawana, uɗaka,

²¹ əsim zəga, əsa mbazla day, golvoŋgu. Zəgeɗ zeŋvit veskiski, in tat ənah sukum dafsən va nənah sukum səkay, məzəɗenin zeŋvit zəgeɗiski, arəhaŋ na məlĩ na Maŋgəlva ɓa.

²² Ya uwa na Əmpəs na ndəni: Əŋgla, ənneke, zazaya, əɓəsa, ulasahã, əɗɗa moggoni, ətafa,

²³ makra zazay, ərma zuko; zeŋvit zəgeɗ veskiski, mahenziŋ dətek ɓa.

²⁴ Ɗiy en də Kristu akkpa'ənək gəɓa zit də əŋgla nani gəm də əsim zəga nani.

²⁵ An madaram mənan də Əmpəsa, mədawsəm va an dəslə də Əmpəsa.

²⁶ Mədawsam məzukaɓaŋ ɓa, mədawkay mama aza zəm ɓa, mədawsim zəga aza zəm ɓa.