Galatiyen 4 - Bible en Guidar

¹ Aŋki nədawnəha: Aka məzəmgəla tay muzliya tagay, duɗak də balam ɓa, də zəga pak asan nan zlaŋ.

² Ammba avet ɗiy məs məppan gəla aveti gəm mərmaŋ arya asan hã gap pay məs Afən aɗiyə.

³ Vaski nam'e, aka məsam məmeɗeŋɗe, belemɗe na əmpəsɗe naka dələvəŋ mənani.

⁴ Ya adan pay nan agapə, Maŋgəlva aslənək Wətəni, muwani dət gulku, dənzi də mahenziŋ.

⁵ Vi kawmet ɗiy səmmba mahenziŋ, vi mərahgən əkkpaŋ kirtin Maŋgəlva.

⁶ Vi kəssoŋ kirtin gesiŋ. Maŋgəlva aslənək Əmpəs na Wətən amkaramə, Əmpəs məzuɗi geŋgere na: Abba, Əbba!

⁷ Vas kan na balam kənan əmpa ɓa, wətən kənani. Adan wətən kənani, asna məzəmgəla kənan də əŋgla na Maŋgəlva.

Geslne' na Pol aka wən net mə Galatɗe

⁸ Lahəŋka, kəsənən Maŋgəlva ɓa, belemɗe net meŋgilveɗ məza gesiŋgiŋ ɓa kənanəni.

⁹ Adan kakaŋ kəsənənək Maŋgəlva, awaniɓa na, Maŋgəlva asənkumko, mbari əmpa kədawmilyoŋ azet maŋgəlveɗ məddekit məs məvvirtiŋ di? Mokum aka əkkpaŋ balam net əmpa sa?

¹⁰ Munokum tat əɓe sit əsɓəteɗi, təleɗe, paya, gəm əzveɗe meɓɓeti.

¹¹ Geslne tay ədu aka wən nokum, vi wəza naw vikum adawsan ɗar ɓa.

¹² Məssoŋ va iyna, adan naw pak va mənokum nənani. In tat əkkamokum milmiŋgiɗwa, tay məs kəraygən suwən ɓa.

¹³ Kəsənənka, gbəgba' dəɗɗa ka nətəŋgən ərban sukum Alabara Neneke.

¹⁴ Gbəgba' naw wasan azokum va əslukum, də as pak na kəzelewən ɓa, kərɓahwən ɓa. Ya kətafwənək va maslay na Maŋgəlva, va Yesu Kristu.

¹⁵ Ŋgay ənnek nokum nak kan di? Vi aka moggon nokum nədawpele. Va wagəɗ na wakəkdəhən horokum kapsu kəta.

¹⁶ Vasna nəkkpaŋgək məzuzel nokum vi nədawnah sukum gegesiŋ sa?

¹⁷ Ɗiy meɓɓet tahəŋ əgayaŋ zit soksok vikum, ya vi zay nokumi ɓa met aka uɗakokum də iyna, vi kəzbetingin zukum soksoku.

¹⁸ Əsok zə ɗəf əɗɗa zəga moggon na, zəga moggon pay pakə, ya adawsan karaw pay nəsaw anokumda kaka ɓa.

¹⁹ Kirin nawa, sahã nədamsak əzəm va ɗak dawa, hã gap an Kristu arbək va asan addəvkum.

²⁰ Nəŋgələk kəta in tat anokum da kakaŋka, nərahgən zev wəlaw nawpel sukum, vi gəreŋ nan aka wən nokum.

Agar dət Sara

²¹ Mənah suwa, munokum məŋglaŋ əsban mahenziŋkəŋkə: Kəprəmən an məs mahenziŋ adarban ɓa sa?

²² Məverni na: Abraham arahək kirtin sula mezeŋleketi, taka wətət balamkə, taka wətət ɗak məza balaməktə ɓa.

²³ Ya an məs nat balamkə, də gəɓa zə ɗəfi muwani, an nat məza balamək ɓa, də iynama muwani.

²⁴ Tay an dəsan məɗamən addivit zəgeɗiski: Gil sules wənmiyna sulaŋgə: Taka sə mossorgo metiŋ na Sinay təde, kawa balamə, ndəttə Agar.

²⁵ Ya Agar, ndəttə mossorgo metiŋ na Sinay a Arabi, tat əsla də Yerusalem an kakaŋkəŋka, vi tat balamək dit kirtəta.

²⁶ Ya Yerusalem an na disiŋ, balamək təɓa, ndəttə mamə.

²⁷ Vi məverni na: Anneki, ndarzlaykə, məs tawa ɓa, Aɓah sən ənneke gəm aŋgəsl vaŋvəla: is məs kənan əssa na əɓay uwa ɓa. Vi kirtət akəŋ məzgat wassoŋ diyɗa, daykiyit en nat guluk də zile.

²⁸ Ya nokum, milmiŋgiɗwa, kirin na iynama kənanən va Isak.

²⁹ Va agəɗ lahəŋ, wiyən məs muwan də gəɓa zə ɗəf asər ma an muwan də Əmpəsa, vaski yi'e kakaŋka.

³⁰ Ya mbari Əver anah di? Arɓəhət balamək də wətəta, vi sessel, wətət balamək adawzəmgəla sap də wətət ɗak məza balaməktə ɓa ɓa.

³¹ Vas kan na milmiŋgiɗwa, kirtət balamək mənan ɓa, kirtət ɗak məza balaməktə ɓa mənani.