Galatiyen 1 - Bible en Guidar

Ətoŋ addəvən ( 1:1-10 ) Əsɗa

¹ Pol, maslən, məza net ɗiy ɓa, məza sə kəlaza ɗəf ɓa, ya səza Yesu Kristu gəm Maŋgəlva Afəni, məs dəsilgən səret ɗiy mimtiti,

² sap dit milmiŋgiɗu məs dədassoŋ də in pakə, sit gəleɗe net məzutafaŋ na Galat.

³ Mbəlembəle də zazay na Maŋgəlva Afəmə gəm Daya Yesu Kristu,

⁴ ndən məs dəppan ki zən ammbam vi mambray namə, vi dəmõhumgən səza ənziya egge mbərayən kakaŋkəŋka, va aza əŋgla na Maŋgəlva Afəmə.

⁵ Ndən məs gagdak asan hã dugurmuk. Amin.

Alabara Nenek təttakayi kaka'ə

⁶ Agəɗ suwək gərəŋ vi kəkkpaŋgaŋ go'ləŋ səza an dəyukum də mbəlembəle na Kristu kəlaza alabara nenek maɓɓani.

⁷ Zeŋvin na tay maɓɓani yi ɓa, vi ɗiy meɓɓet tay əzlzlaɓokuməni. Tay əŋglaŋ əkkpaŋ Alabara Nenek na Kristu.

⁸ Ya kəta dəsan mənamə, awaniɓa maslay dəde sə disiŋ, dərban sukum Alabara Nenek temme səza an məs mərban sukum, əray dəsan akani.

⁹ Va mənah lahəŋka, in tat əmsak ənah sukum kakaŋka'e: An ɗəf tay ərbə sukum Alabara Nenek temme səza an məs kətafaŋgə, əray dəsan akani.

¹⁰ Kakaŋ na, əŋgla net ɗiy nədawkayan sa, na Maŋgəlva? Awaniɓa an nanneken zit ɗiy nədawkayan sa? Va zit ɗiy nədanneken na, wanəsaw məgəɗ wəza na Kristu əmpa ɓa.

Gagdak na Pol assan va maslən ( 1:11—2:21 ) Va Pol akkpaŋ maslən

¹¹ In tat əprəman sukum milmiŋgiɗwa, Alabara Nenek məs nərbə sukuməŋka, səza ɗəf titiri ɓa.

¹² Vi səza ɗəf nərəh ɓa, ɗəf dərban su ɓa, də hənhən na Yesu Kristu iyi.

¹³ Vi kəprəmənək ədaw naw an lahəŋ addəv əzban net mə Yudeɗi. Va nəmpə ɓəɓəl əsərmet ɗiy na Maŋgəlva, nədawkay əzeti.

¹⁴ Nəmbatək abe abe addəv əzban net mə Yudeɗi; nədayək ki vadaysa net geleŋgiɗu en naka saywa, nəsawək ɓəɓəl aka matuya net efiŋgiɗwa.

¹⁵ Səza Maŋgəlva dəwelu səddəv maw awla lewi, ayu də mbəlembəle nan,

¹⁶ vi karban su Wətəni, ka nərbangən Alabara Nenek nan a walaŋgit ɗiy en ɗar go' məza əssoh ma ɗəf ɓa.

¹⁷ Məza əpeŋ a Yerusalem azet maslənɗe en daabəŋ kiyu ɓa, yaŋ nəmbat a Arabi, siske nəmil əmpa a Damas.

¹⁸ Dərɓagan əzva hoku, nəpeŋ a Yerusalem vi kawsən Kefas, nəsawək dəndən əvoŋ kəlaw kiyən sle.

¹⁹ Nəwəl maslən maɓɓan abbər Yakob məlmən Daya ɓa.

²⁰ An nədawver sukuməŋka, aba Maŋgəlva iyi yaŋka, uwa wəni ɓa.

²¹ Siske na, nəmbatək aka va na Siri də Silisi.

²² Ya məzutafaŋ na Kristu na Yude dəsənwən ɓa.

²³ Aprəmənək kaka na, Kakaŋ na, məzusər mam lahəŋ nak, tay ərban Alabara Nenek na ətaf məs adawzan lahəŋ naka.

²⁴ Yaŋ agagdakanən Maŋgəlva viwa.