Filipi 4 - Bible en Guidar

¹ Milmiŋgiɗu na makrawa, maw aka ulukum, mənokumtə ənnek gəm gagadak nawa, vasna məziw ɓəlɓəl addəv Daya bayneŋgiɗwa.

Wən məɗiyən temtemi

² Ewodiya dət Siŋtike in tat əkkamokum, məssoŋ əɗɗum taka addəv Daya.

³ Is məgəɗ wəza gesiŋgesiŋ də inkəŋkə, in tat əkkamoko, abbah siti, vi agayaŋgək ərban Alabara Nenek də ina, vaska' Kəlemaŋ dit ɗiy dambərgit məɗɗaŋ wəza də ina, iya net tay məverin addəv ɗerewel na zeŋgile.

⁴ Mənneken zukum addəv Daya pay pakə, in tat ənah əmpa mənneken zukum.

⁵ Kəta ɗiy pak dəsənnən moggon nokum. Daya go'oy əzzani.

⁶ Kədattapaŋ ɓa, mərban wəray nokum pak aza Maŋgəlva də əkkama, əppu'o gəm də əffete.

⁷ Zazay na Maŋgəlva dədayki zəga məs ɗəf adawɓap əsən pak waga mokrokum də əɗɗum nokum addəv Yesu Kristu.

⁸ Milmiŋgiɗwa, aŋki məs dəmbərə: an moggon, an nawgagdakani, an təstəsə, an saksakə, an naŋgla, an na sləma, an nawtafa gəm an nawɗi kiyni, zəgeɗis dəssoŋ aka maɗɗulokum.

⁹ Məs kəyakaŋgə, məs kərahaŋgə, məs kəpremaŋ sə mawa də məs kulaŋ səzawa, zəgeɗis pak məgəɗ wəza dənɗaŋgə. Maŋgəlva afən zazay wasan də munokum.

Pol gəm beyneŋgiɗin ɗiy na Filipi ( 4:10-20 ) Pol tay əsoket məs Filipiɗe aka əvəl neti

¹⁰ Nənekək diyɗa addev Daya, vi kəɓapənək ərban əŋgla nokum viyu əmpa. Munokum tat də əɗɗum nani, ya kərəhaŋ va nan ɓa.

¹¹ Nənah vasna vi tay dəkkpap suwi ɓa. Vi naw nəyagan əsa zu nek də va nəsawa.

¹² Nəsənək əssaw addəv sahã, nəsənək əssaw addəv əba. Addəv zəga pak gəm aŋga pak nəyaganək əssaw addəv əba gəm addəv mayã, əssaw addəv ərəh zəga diyɗa gəm addəv wəraya.

¹³ Də gbogboŋ nan addəv zəga pak vi Kristu tay əvay əɓapa.

¹⁴ Ya kəɗɗaŋgək moggon də əbbah su addəv əzəm sahã nawa.

¹⁵ Kəsənnənka, munokum mə Filipiɗe, də ətəŋ na Alabara Neneke, səza nəgil sə Makedoniya, əsap net məzutafaŋ tay dəbbah su də əvay zəga an munokumtə kaka ɓa ɓa.

¹⁶ Vi aka nəsaw a Tesaloniki, kəslənaŋ suwənək zəga an wərayu azan təl taka gəm təl masulani.

¹⁷ Əvəl nədawkayan ɓa, ya arya məs dədawɓay ka ərəh nokum nədawkayani.

¹⁸ In tat də an wərayu asan azan pakə, addəv əba nani, tay məs dəkkpap su səza Epafroditus aki su an səvokum ɓa, tay va əvəl məs də məŋgənən neki. Əzaɓ-Maŋgəlva məs Maŋgəlva atafi, neki azani.

¹⁹ Maŋgəlva naw dəknahan sukum wəray nokum pak də Yesu Kristu va aza gagdak nan metiŋgini.

²⁰ Gagdak na Maŋgəlva Afəmə hã faɗə. Amin.

Əgrakən ( 4:21-23 ) Əsɗa bayma faɗə

²¹ Məsɗet ɗiy na Maŋgəlva pakə də iya na Yesu Kristu. Milmiŋgiɗəm məs dəssoŋ də in asɗokumənka.

²² Mə kristuɗe nahəŋ pak asɗokumənka, sasak en neŋgil ana Kaysara da.

²³ Mbəlembəle na Daya nam Yesu Kristu dəsan də munokum pakə.