Filipi 3 - Bible en Guidar

Əgay dit məzuzelɗe gəm tatwãha ( 3:1—4:9 ) Tive nassa təstəs ara Maŋgəlva

¹ Kakaŋ na milmiŋgiɗwa, mənneken zukum addəv Daya. Nəppan na gabba əver sukum zəga məs nəver sukum səkay ɓa, wasɓokum.

² Məsla zukum səzet kirɗe, məsla zukum səzet məɗɗaŋ mbərayən, məsla zukum səzet məɗiyaŋ ki əskəlawra.

³ Vi mənamtə migil əskəlawra, en məzuɗinən ki Maŋgəlva də Əmpəs nani gəm dəɗinən ənnek net addəv Yesu Kristu məza aka gəɓa zə ɗəf ɓa.

⁴ Ya intə kəta nawɓap əppan əɗɗum naw aka ki zuwa, an ɗəf maɓɓan tay əɗɗum nappan ki zən aka gəɓa zən na intə dayə.

⁵ Naw də əvoŋ ma dodopoɗon nəskəlawra, zeŋvit mə Israyelɗe nani, mahəlfa na Benyamin, mə Ibri nani, dəwəl sən mahenziŋ mə Farisa nani.

⁶ Dəwəl sən əsok zu na, məsər met məzutafaŋgə, dəwəl sən əssa təstəs addəv mahenziŋ na, məza heslepe ɓa.

⁷ Ya zəgeɗis məs dəssoŋ suwən va ərəh lahəŋkəska, nule va zəga ɗar vi wən na Kristu.

⁸ Arbək na, in tat ula zəga pak ɗarə, vi nərahək zəga an na sləma dayə: Əsən Kristu Yesu Daya nawa. Aka batamni nətaf əzgan zəga pakə, in tat ula zəga pak va dagərgiya ɗarə, ka nərahgən Kristu.

⁹ Vi nədawsaw aban də təstəs na kiyu məs dəde səza mahenziŋ ɓa, abbər an dəde səza ətaf Kristu, təstəs dəde səza Maŋgəlva dəziw aka ətafa.

¹⁰ Ka nəsəngən Kristu də əɓap na əsilye nan səka əmta, nəsapgən dəndən addəv əzəmsahã nani, nəsawgən va ndən addəv əmta nani.

¹¹ Va wagəɗ na, nəgapgən aza əsilye səka əmta.

Ənza a təki nawrəh zəga

¹² Nərəhək səkay awaniɓa gərrak nani ɓa, ya in tat əzban ənzawa, va wagəɗ na nərəhgəni vi Yesu Kristu armuka.

¹³ Milmiŋgiɗwa, naw nəɗɗum naw nərəhək səkayi ɓa. Ya zəga taka na, in tat əzgət kiyit zəgeɗ na dərɓe, haraw sek aket zəgeɗ nabe.

¹⁴ In tat əzban ənzaw haraw sek a təki nawrəh zəga, vi nərəhgən zəga məs Maŋgəlva ayəm akan hã sə disiŋ də Yesu Kristu.

¹⁵ Mənam kən məs məsɓam addəv əmpəsa, məsam səm də əɗɗuməska. An mənokum tat də əɗɗum temme, Maŋgəlva warban sukum.

¹⁶ Va agəɗ pak, a təki məgapəŋ na məzban səm ədaw sap haraw sek də təki taka.

¹⁷ Pakagukum milmiŋgiɗwa, məgəm təlwa, məzi horokum aket ɗiy məzudawaŋ va an kulan səzamə.

¹⁸ Nənah sukumək ɗayɗayə ya kakaŋ na də sin araw nədawnah sukum, ɗiy diyɗa tahəŋ ədawaŋ va meseŋgiɗ əmta na Kristu.

¹⁹ Əgrak net na əzay yi, gədəvti maŋgəlva neti, zəga net willi gagdak neti. Əɗɗum net na aka zəga negge yi.

²⁰ Vi namə, ɗiy na disiŋ mənani. Sədaki mədawga məzukõhgəm Daya Yesu Kristu ɗəhərra.

²¹ Ndəni dədakkpaŋgan gəɓa zəm məddaknəŋ va gəɓa zən na gagdaka də wəza na əɓap nan məzəpsən gbogboŋ nawsapan zəga pak ammba təlni.