Filipi 2 - Bible en Guidar

Əɓegən kiya də memetiŋ na Kristu

¹ An əsap nokum də Kristu tay əɓəlokum kana, əŋgla nan tay əsɓokum, kəsapaŋgək də Zeŋgile Salala, kəŋgluwənək zukum gəm ulasahã tay a walaŋkum,

² asna, mənneken su zuwa vi kəssoŋgən maɗɗula taka, əŋgla taka, megenegenekum taka, əɗɗum taka.

³ Kədaɗɗaŋ zəga də əɗɗum na əgaya awaniɓa də əgagdakan zukum ɗar ɓa, ya məɓe'gən ki zukum də ula ɗiy meɓɓet daykikum.

⁴ Ɗəf adaɗɗa an natər wəray sən kiyən kaka ɓa, ya an natər sit ɗiy meɓɓeti.

⁵ Məssoŋ də əɗɗum taka azokum, məs dəde səza Yesu Kristu:

⁶ Nan va Maŋgəlva yi asani, ya də as pak dula zən nawsla ki zən də Maŋgəlva ɓa.

⁷ Ya aggbukuk an asan dəndəni, agəmək əssa na balam, ndən kpaŋ va ɗiyi. Yaŋ arban zən va ɗəfa.

⁸ Aɓe'gənək kini, aprəmək ma Maŋgəlva, hã gap zamə, əmta aka məzliwrihe.

⁹ Vini Maŋgəlva aslan a disiŋ ki zəga pakə, apsənək iya na sləma dayki iya pakə.

¹⁰ Vi də iya na Yesu, ɗəf pak dukdukgən takpran abani na disiŋ, naka dəlva də nammba dələvafuŋ pakə.

¹¹ Ma pak dənahgən na Dayay Yesu Kristu, ka gagdak na Maŋgəlva Afəni.

Əwiɗ va əkeɗeɗe naka dəlva

¹² Bayneŋgiɗwa, pay nəsaw anokumda na, munokum tat əprəmən maw pay pakə. Ya adan kakaŋ faraɗa nan də munokum, məprəm mawa. Məɗɗa wəza nawkõh nokum də geslne də wəkkere.

¹³ Vi Maŋgəlva yi dədaɗɗan addəvkum, tay əpsukum əŋgla gəm əɗɗa wəza va an aziwgini.

¹⁴ Məɗɗa zəga pak məza də wərwər gəm əŋzla ma ɓa.

¹⁵ Vi kəssoŋgən məza də heslepe ɓa gəm bartata, kirtin Maŋgəlva məza wən aket a walaŋ sayit ɗiy mə slokorslor gəm mbəreytiŋ ɓa, məs kədawiɗeŋ a walaŋgit va offoɗe aka dəlva,

¹⁶ də ərma əpel na zeŋgile ɓəlɓələ. Wasan ənnek naw pay na Kristu, vi nənzaw ɗar ɓa, nəyə ɗar ɓa.

¹⁷ Ya an anəsaw va mbazla nawpesl aka əzaɓ-Maŋgəlva gəm aka wəza na ətaf nokum dayday na, zu neki, zu neki də mənokum pakgukum.

¹⁸ Vaski mənokumə'e, mənneki, mənnek də iyna.

Kuket net mãy Timote gəm Epafroditus ( 2:19-30 ) Timote də Epafroditus

¹⁹ In tat əɗɗum addəv Daya Yesu, wanəslən Timote azokum go'u, vi makraw dəffetgən an nəprəmək alabara nokum.

²⁰ Vi in tat də ɗəf maɓɓan məs nawɗakan əɗɗum naw ndəndən gəm nazga sləma aka wən nokum zən soksok va ndən ɓa.

²¹ Vi pak zəga sən kiya adawkayanəni, məza en na Yesu Kristu ɓa.

²² Ya kəsənnənək va Timote agəɗə, vi asanək va wiyən a maŋgava afəni, appanək ki zən də in aka wəza na Alabara Neneke.

²³ Ndəni nədaɗɗum nawslən sukum go'u, an nəsənək gabba wən nawa.

²⁴ Ya nəsənək gesiŋ addəv Daya na, in sən kiyu pak wanəde abeŋka.

²⁵ Nulak na, aslək nəsləngən Epafroditus məlmuwa, mədaw də in addəv wəza gəm addəv əgay azokum, ndən məs kəslənaŋ də əpsən an məs nawtər su wəray nawa.

²⁶ Vi man aka ulukum pakə, azəmək sahã sawɓa va kəprəmənən na gbəgba' armaka.

²⁷ Gesiŋ gbəgba' armak hã va namta, ya Maŋgəlva awlak sasahãni, sasahni kaka ɓa, ya də in paki. Vi adawsan su tatwãh aka tatwãh ɓa.

²⁸ Vini nəgəm zu nəsləna, vi an kulanənka, zukum wannek əmpa, gəm nəsaw na sãhsãh ɓa.

²⁹ Vi vaski mətaf kan də zukum nek addəv Daya, məɗi kiyit ɗiy zev en veskiski.

³⁰ Vi aka wən na wəza na Kristu akay əmta. Akay əzan zeŋgileni vi kawkisu əbbah məs kəɓapnən na əki su mənokum zək nokum ɓa.