Filipi 1 - Bible en Guidar

Ətoŋ addəvən ( 1:1-11 ) Əsɗa

¹ Pol də Timote belemɗe na Yesu Kristu, azet məweleɗe na Maŋgəlva addəv Yesu Kristu en na Filipi dit məzuteɗeŋɗe gəm məzəbbahaŋgə.

² Mbəlembəle də zazay na Maŋgəlva Afəmə də Yesu Kristu Daya nam dəssoŋ də mənokum.

Əkkam na Pol viyit məkristuɗe na Filipi

³ In tat əgəɗ sən soko sən Maŋgəlva naw pay nəɗɗum akokum pakə.

⁴ Addəv əkkam naw vikum pay pakə, in tat əkkam də enneke,

⁵ vi əsap nokum addəv ərban Alabara Neneke, təŋ səza pay maddaabəŋ hã kakaŋka.

⁶ Sessel nəsənək na, məs dətəŋ wəza moggon vas a mokrokum, wadaw dəndən hã gap aza əgraka, pay məs Yesu Kristu adazzani.

⁷ Aslək azaw nəɗɗumgən akokum pak vaska. Nəɗikumuk a makraw munokum pakə, addivit ngiyamɗe nawa, addəv əsok zu narban Alabara Nenek dəsangən ɓəlɓələ, kərəhaŋgək mbəlembəle məs Maŋgəlva avayə.

⁸ Maŋgəlva yi miziwe nawa, nəŋglukumək diyɗa də əŋgla na Yesu Kristu.

⁹ Aŋki əkkam nawa, kəta əŋgla nokum dəl abe abe əmpa addəv əsən zəga də əprəm gabba zəga pakə,

¹⁰ vi kəɓapəngən uwelen an moggoni, kəssoŋgən salala, məza heslepe ɓa, hã gap pay na Kristu,

¹¹ məknahən də zəga an təstəsə, məs dəde səza Yesu Kristu, vi gagdak na Maŋgəlva də əɗi kini.

An dətoŋ aka Pol zək nani ( 1:12-26 ) Zeŋgile na, Kristu wi

¹² Milmiŋgiɗwa, nəŋgəl na kəsənəngəni, an dərəhu na, abbahək addəv əɓaygən Alabara Neneki.

¹³ Vi gəla nawtaw wəna də madammbrigit ɗiy pak asənnənək na, nərmu aket ngiyamɗe na vi nədaɗɗa wəza sən Kristu wi.

¹⁴ Ərma naw aket ngiyamɗe azɓanək mekret milmiŋgiɗu naddəv Daya vadaysa, asokunək zit ərban əpel na Maŋgəlva məza geslne ɓa.

¹⁵ Ɗiy meɓɓet ərbanən Kristu də kotorok nawa də əɗɗum nawgaya, ɗiy meɓɓet tamə ərbanən də moggoni.

¹⁶ Ɗiy neti tahəŋ əɗɗanən də əŋgla, asənənək nəsaw aŋ na vi kawgay ammba Alabara Neneki.

¹⁷ Ɗiy meɓɓet tahəŋ ərbanən Kristu addəv əɗɗum nawgaya, də makret salalay ɓa, tahəŋ ənzlərgənən tatwãh naw aket ngiyamɗe.

¹⁸ Vi va agəɗ pakə, kəta əɗɗum mbərəŋ tay dərɓagani, kəta gegesiŋgi na, mərbani Kristu, sən aski nədanneke, wanənneki'e.

¹⁹ Vi nəsənək na, as pak wakkpaŋ əkõh naw ammba əkkam nokum də əbbah na Əmpəs na Yesu Kristu.

²⁰ Vi va aza əŋgla naw gəm əga nawa, zəga tay nədarba wil akan ɓa, gesiŋ va pay pak gəm kakaŋka, kawɗiyni ki Kristu addəv gəɓa zuwa, addəv zeŋgilewa awaniɓa addəv əmta nawa.

²¹ Vi naw na Kristu wi əssa madarawa, əmta tamə ərəhi.

²² Ya an əssa naw madaraw watər wəray addəv wəza na, nəsən an nədawel ɓa.

²³ Maɗɗulaw awɗakək sula: Nəŋgələk nəmbatgən kawsaw də Kristu vi ndəni moggon dayə,

²⁴ ya əssa addəv gəɓa zu ndəni də ətərwəray azokum dayə.

²⁵ Vi nəsənək lewlew na, wanəsaw də munokum gəm wanəsaw də mənokum pakgukum vi kabbah sukum kəddoŋgən abe abe, kəssoŋgən də ənnek addəv ətafa.

²⁶ An nəmilik anokumda əmpa na, ənnek nokum addəv əsap də Yesu Kristu waɓay vi nəsaw awalaŋkum.

Zeŋgile addəv Kristu ( 1:27—2:18 )

²⁷ Ənziya nokum dəslə də Alabara Nenek na Kristu kaka'ə, vi an nədek ulukum, kəta in tat ɓa zlaŋ na, nəprəmgən alabara nokum na, munokum tat təstəsə, maɗɗulokum taka, megenegenekum taka, mənokum tat əgayaŋ sap də ətaf dəziw aka Alabara Neneke.

²⁸ Addəv zəga pak kədawgeslne'eŋ sit məzuseɓɗe nokum ɓa, vi tay ərban əza neti, ya nokum, tay ərban əkõh nokum, as van səza Maŋgəlva ade.

²⁹ Kərahaŋgək mbəlembəle aka wən na Kristu, vi kətafəngən kaka'i ɓa, ya kəzəmaŋgən sahã vini yi'e.

³⁰ Əgay nam məstaka yi, va kulanən azawa, kakaŋ pak mənokum tat əprəmnən va nədawgaya'e.