Ezra 9 - Bible en Guidar

Mə Yudeɗ diyɗa dəkayaŋ gil molhõyẽɗi

¹ Səza as agrakə, ɗiy gugriɗ azzoŋgək azaw kawnah su na: «Ɗiy na Israyel, məsdəlveŋge gəm mə leviɗe duɗakaŋ dit ɗiy naka dəlvəŋ ɓa. Agəmənək tilit daɗɗa zəga daryaw va net mə Kana'anɗe, mə Hitɗe, mə Perziɗe, mə Yebusiɗe, mə Ammoniɗe, mə Mo'abɗe, mə Eziptiɗi gəm mə Amorɗe,

² ndəɗaŋ dit kirtit akayaŋgək gili, ɗiy na Maŋgəlva aslãhaŋgək dit ɗiy na dəlva. Ɗiy gugriɗ dit ɗiy na meŋgle ana məlĩ da dəkuwaŋ daabəŋ.»

³ Adan nəprəm wənəska, nəŋgaranək lukut naw də an metiŋgin səzawa, in muhur kiyu patpat dit eŋgemewa, in ɗew kiyu vẽhẽ.

⁴ En məzugeslne'eŋ sənən əpel na Maŋgəlva na Israyel pak, akkalaŋgək azaw aka wən na əku net ɗiy məket aka balam də ina, nəsawək ɗewwe, kiyu vẽhẽ, gap pay nawzaɓ-Maŋgəlva na moskoyo.

Ezra tay əkkam emmbet məs dəraygənəni

⁵ Pay nawzaɓ-Maŋgəlva na moskoy naka, nəgilik səddivit wil nawa, də lukut muzliya də metiŋ məŋgerit pak, in guduk, nətələk vaw kəlaza Yawe Maŋgəlva nawa

⁶ nəpsən na: «Maŋgəlva nawa nəttapka, wil tay ədəwən dawzlan haraw kəlazoko Maŋgəlva nawa, vi mambrayɗe nam awanənək zit akamə, mbərayən nam aɓayək ŋgbusl a disiŋ.

⁷ Səza pay net migilmə, gap dəpaŋka, mbərayən nam metiŋgini, vi mambrayɗe namə, mənamə, milyeŋge namə, məsdəlveŋge namə, məppami avet milyeŋge naka dəlvəŋka, sən masalam, əkəm aka balam, əmõhẽt zəgeɗ namə, gəm mbəgəm aket wil va dəpaŋkəŋka.

⁸ Ya kakaŋ na, mbəlembəle na Yawe Maŋgəlva nam tay pay siɗɗike vimə, apamə madaram mənam madambərgəm məkõhəm, də wəpsəm təki siɗɗike a təki salala nani; vaski Maŋgəlva namə, akol səm haram bodoŋgu, gəm apam madaram pay siɗikke aka balam namə.

⁹ Belemɗe mənani də məsam belemɗe dayday na, Maŋgəlva namə, dəppam ndol ɓa; abet milyeŋge na Persiya, aɗɗumək akam də wəɗɗa moggon nan dəpsəm zeŋgile, apsəmək tive narkan gəla na Maŋgəlva namə nawsilgit en dəɓəzlaŋgə, gəm dəpsəm zlava na dələv a Yuda gəm a Yerusalem.

¹⁰ Ya kakaŋ na, miy mədawnəh dərɓaga as di Maŋgəlva namə? Vi məzgetik mahenziŋɗe nok

¹¹ məs kəpəl də vet məɗɗaŋ wəza nok məskəleŋ, kənah na: “Dələv kədawtoŋgoŋ nawgəməŋ, ɗiy naka dələv van arnokonən də wəɗɗa zəgeɗ daryawɗe akan təh də haramba neti.

¹² Kakaŋ na, kədapsitin kirtukum muguluŋgit sit kirtit mezeŋgleket ɓa, kədawgəmaŋ kirtit muguluŋgit sit kirtukum mezeŋgleket ɓa'a, kədawkayanən wəsler də əssa nek net ɓa, vi kəsɓanəngən zukum, kəzəmaŋgən arya naka dələv vani, kəppanəngən sit kirtum faɗə.”

¹³ An dərəhəm pak mbara na vi wəza mbərayən gəm mambray metiŋgin nami, ya Maŋgəlva nok kəzga'səm aket mbərayənɗe nam meɓɓet ɓa, kəpələk səzam madaram yaŋka,

¹⁴ waməmndam ətəŋ əggar kiyit mahenziŋɗe nok, kawkay gil aka walaŋgəm dit ɗiy daryawɗeŋ əmpa sa? Kəki na herɗe akam, ka kawzam məza mbəksa taka dayday ɓa sa?

¹⁵ Yawe, Maŋgəlva na Israyel, təstəs kənani: dəpaŋkəŋka, mənam tat va madembirgit ɗiy məkõhti. Mənam yakəŋ abok dit mbərayənɗe namə, yaŋ na, kəta ɗəf tay nawziw abok də tive vaskəs ɓa.»