Ezra 7 - Bible en Guidar

Wəmilya na Ezra dit diy məket aka balam meɓɓeti ( 7:1—10:44 ) Məsdələv Ezra

¹ Dərɓeget wənɗes pak, aka pay na Artazerses, məlĩ na Persiya, Ezra, wətən Seraya, wətən Azariya, wətən Hilkiya,

² wətən Sallum, wətən Sadok, wətən Ahitub,

³ wətən Amarya, wətən Azariya, wətən Merayot,

⁴ wətən Zeraya, wətən Uzzi, wətən Bukki,

⁵ wətən Abisuwa, wətən Pinhas, wətən Ele'azar, wətən Aron, məsdələv metiŋgini.

⁶ Ezra van sə Babilon ade. Məzuver məs dəsən mahenziŋ na Moyis lewlew məs Yawe, Maŋgəlva na Israyel apsəni. Məlĩ apsənək an assohõn pakə, vi va Yawe Maŋgəlva nan tay akani.

⁷ Sə weleŋgit mə Israyelɗe, gəm sə weleŋgit məsdəlveŋge, mə leviɗe, məyaŋ gəlya, məgaŋ maddambeɗe dit məɗɗaŋ wəza, meɓɓet səret addoŋguk a Yerusalem, aka əzva mabuhulon na Artazerses aka məlĩ nani;

⁸ agap kan a Yerusalem aka təla məsle'eni; wəzva mabuhulon na məlĩ yi.

⁹ Gesiŋ nan na, aɗi pay na malaka van sən kiyən sə Babilon, də əvoŋ taka na təla maddaabəŋ, agap a Yerusalem də əvoŋ taka na təla masle'eni, vi va dəzəŋ na Maŋgəlva nan tay akani.

¹⁰ Vi gesiŋ nan na Ezra, appanək makran, aka wəkayan mahenziŋ na Yawe, wəzbani, gəm əyagan mahenziŋɗe sit ɗiy, gəm va asərəkaŋ əɗɗaŋ a Israyel.

Wəzaɗe en Artazerses apsin Ezra

¹¹ An naddəv ɗerewel an Artazerses averiŋ yaŋ apsən sən məsdələv Ezra məzuvere, məzuver əpel en Yawe aɗi wən net dit mahenziŋɗe nan aka batam wən net mə Israyelɗe:

¹² Artazerses, məlĩ net milyeŋge, aza məsdələv Ezra, məs dəsən mahenziŋ na Maŋgəlva na disiŋ, nəsɗokuko, gəm dəgil va ndəni.

¹³ Əpel naw nəɗi yaŋka: mə Israyel naka va naw pak, məsdəlveŋge dit mə leviɗe neti, məs man aka əmbat a Yerusalem, dəmbat adak də isi!

¹⁴ Gesiŋ nan na məlĩ dit mətawanən wən nan buhul, dəslənkuni: vi kakkesen wən na Yuda də Yerusalem, an tay va naddəv mahenziŋ na Maŋgəlva an navokəŋka;

¹⁵ Sissiŋ na kəkagən sən Maŋgəlva na Israyel, təbəz babar də meleŋge en məlĩ dit məzutawanən wən nabaw məɗi də makram paparə, məs təki nassa nan a Yerusalem əŋka,

¹⁶ Vaski ye'e təbəz babar də meleŋge kədawrəh səka va na Babilon pakə, də wəvəl an də makra papar məs ɗiy dit məsdəlveŋge adawkiyaŋ vi Gəla na Maŋgəlva net a Yerusalem.

¹⁷ Vasna, kəslagən zuk wəlbəh dit koɓeɗiŋ, medgeɗgeɗe dit ndargenyeɗi, kirit timeŋgiɗi, an dəslə nawvəl də uwa net wəleŋɗe, zəga nawsa neti; kəɗigən aka gəlamatuya naddəv Gəla na Maŋgəlva nokum a Yerusalem.

¹⁸ An dədawsan moggon naɗɗa dit madembirgit təbəz babar də meleŋge, is dit milmiŋgiɗko, kəɗɗanəngən va Maŋgəlva nokum aŋgəl hara.

¹⁹ Zəgeɗ napsuk vi wəza na Gəla na Maŋgəlva nokəŋka, azi aba Maŋgəlva na Yerusalem.

²⁰ An dəmber dəsan akok naɗɗa ammba Gəla na Maŋgəlva nok na, kəɗigən aka əŋɗa na təki nawzaɓ arya na məlyã.

²¹ In məlĩ Artazerses, in tat əɗiwən nan sit məzaɓaŋ arya na dəggar ki Efrat pak, kəɗɗanəngən təstəs va məsdələv na Maŋgəlva Ezra məzuver na mahenziŋ na Maŋgəlva na disiŋ adassohokum.

²² Gap zəga na təbəz babar kilo gabal hoku, haykəmari kilo gabal kaklaw hoku, mbazla na megezlembirke litir gabal poɗo, mẽl litir gabal poɗo gəm bətuwa, nan kawndan ɗarə.

²³ An Maŋgəlva na disiŋ aɗi wən nan pak, dəgəɗ təstəs ammba gəla na Maŋgəlva na disiŋ, vi wədagədəv nan adawsan aka dələv na məlĩ dit kirtin ɓa.

²⁴ Aka as əmpa na, in tat əprəman sukum ɗəf adawtaf zəga na makaryam, nzalaka gəm an napla tive nawtoŋ səvet məsdəlveŋge na Maŋgəlva, mə leviɗe, miyaŋ gəlya, məgaŋ maddambeɗe, məpsitin əzəm sit ɗiy dit məɗɗaŋ wəza abet ɗiy naddəv Gəla na Maŋgəlva ɓa.

²⁵ An dəwəl suk na Ezra, də maɗɗula Maŋgəlva apsuk əŋka, aɗi mətawaŋwəna, prefeɗe dətawanəngən wən sit ɗiy na dəgar ki Efrat, sit ɗiy en dəsənən mahenziŋ na Maŋgəlva nok pakə, kərbet singin ɗəf an dəsin ɓa.

²⁶ Ɗəf an azban mahenziŋ na Maŋgəlva nok ɓa, azban an na məlĩ təstəs ɓa na: ətawwən dərma, an əmtay, an ərbəsəni yi, an wətak zəga nani, awaniɓa wətoŋgə a fərsəna.

Ezra tay əfet aka Maŋgəlva

²⁷ Soko sən Yawe Maŋgəlva net migilmə, məs dəɗi əɗɗum a makra məlĩ, hara nawɗi ki Gəla na Yawe vaŋ a Yerusalem.

²⁸ Ama hara məlĩ dit məzutawanən wən nani, guromɗe naba məlĩ pakə, Daya arban suwək moggon nani; yaŋ nəmpa təlwa vi va Maŋgəlva tay akawa, nəkkeletik deyeɗe na Israyel meɓɓet vi dəmbataŋgən də ina.