Ezra 5 - Bible en Guidar

¹ Adan məskəleŋɗe may Haggay də Zakarya wətən Iddo aɗɗaŋ kəleŋ aket mə Yudeɗ naka dələv na Yuda gəm en na Yerusalem, də iya na Maŋgəlva na Israyel məs dəsan aketi,

² Zorobabel, wətən Salatiyel, gəm Yosuwa, wətən Yosadak, atəŋgənək ərka Gəla na Maŋgəlva a Yerusalem; məskəleŋɗe na Maŋgəlva tahəŋ əbbahaŋ sitini.

³ Pay nan na, Tatnay, guverner na dəggar ki Efrat, də Setar-Boznay, gəm geleŋgiɗit, azzoŋguk azeti, apsitin na: «Naway dəpsukum tive narka Gəlaŋ gəm nagrakan di?

⁴ Mədawnah sukum na: mbari iya net ɗiy məzərkanən gəlaŋ di?»

⁵ Ya hara Maŋgəlva net tay sekke aket ɗiy məsɓet net mə Yudeɗi: dawga wən nan dəgapgən aza Dariyus, dəmilgingə əzlan nan akani, mətekti dəɗɗa wəza ɓa.

Məzəmiyi kiyit mə Yudeɗ aza Dariyus

⁶ An naddəv ɗerewel an guverner Tatnay, Setar-Boznay, dit geleŋgiɗin, gəm ɗiy na Afarsak dəggar ki Efrat aslənaŋ sənən məlĩ Dariyus.

⁷ Aslənaŋ sənənək alabara məverin na: «Zazay sən məlĩ Dariyus dəwənnani!

⁸ Məlĩ dəsən na, məmbatək aka va na Yuda, addəv Gəla na Maŋgəlva metiŋ. Dit gərmeŋɗe məslmet adarkanəni, gəm dədəkeɗ gəsl gəsl addəvit en adarkaŋ veti. Wəza nan minya' minya' adawmbat aveti.

⁹ Yaŋ məssohẽt ɗiy məsɓet veti, mənah sit na: “Naway dəpəl sukum tive narka Gəlaŋ gəm nagrakan di?”

¹⁰ Mbəksa asna, məssohẽtik iya net vi karbet suk kəsəngəni, vi kawver iya net ɗiy en gugriɗ nareti.

¹¹ An azlan səmən yaŋka: Məɗɗaŋ wəza na Maŋgəlva na disiŋ də an naka dəlvafuŋ mənani, yaŋ mədarkan Gəla, mərkan wəzvaɗe kpototo, məlĩ metiŋgin na Israyel arkə avãh kini.

¹² Vasna, migilim dədan sənən gədəv Maŋgəlva na disiŋ, apsin ammba va Nabukodonozor, mə Kaldiya, məlĩ na Babilon, yaŋ aɓzlu Gəlaŋka gəm ake ɗiy vet a Babilon.

¹³ Də as pak na, wəzva maddaabəŋ na Sirus, məlĩ na Babilon, məlĩ Sirus aɗiyik wən nan narka Gəla na Maŋgəlva əŋka.

¹⁴ Mbəksa asna, zəgeɗ naddəv Gəla na Maŋgəlva, en na meleŋge, na təbəz babara, məs Nabukodonozor andə səddəv Gəla na Maŋgəlva na Yerusalem, vi kawkiyit addəv gəla na maŋgəlva na Babilon, məlĩ Sirus andek səddəv gəla na maŋgəlva na Babilon, apsin ɗəf adawyaŋ na, Sesbasar məs aɗi ka guverner na Yuda.

¹⁵ Anah sən na: ande zəgeɗiŋki ake dok azi addəv Gəla na Maŋgəlva na Yerusalem, karkan a gəlan təstəsə.

¹⁶ Yaŋ Sesbasar əŋ, ade wəɗi gabba gəla na Maŋgəlva na Yerusalem. Təŋ səzanəska hã dəpaŋka, gəla tay ərka, ya dəɓəl əvãh ɓa.

¹⁷ Kakaŋ kan na, an məlĩ atafəka, dəkayanən gabba wən nan addəv gəla nawɗi zəga na məlĩ a Babilon adaka, an məlĩ Sirus aɗiyik wən nan narka Gəla na Maŋgəlva a Yerusalem, dəslənaŋ səməngən va məlĩ aziwgən wənəŋka.»