Ezra 3 - Bible en Guidar

Wərkan Gəla na Maŋgəlva də wəkolni ( 3:1—6:22 ) Əɗi ki Maŋgəlva

¹ Adan təla mabuhulon na wəzva agapə, yaŋ mə Israyelɗe na walaŋgəleɗe gugriɗe, akkalaŋgək va ɗəf taka tuɓuk a Yerusalem.

² Yosuwa, wətən Yosadak, asilik dit məsdəlveŋge milmiŋgiɗni, də Zorobabel wətən Salatiyel dit milmiŋgiɗin, arkanən gəlamatuya sən Maŋgəlva na Israyel, kahhət sən zəgeɗ memeyẽɗi, va məverin addəv mahenziŋ na Moyis, ɗəf na Maŋgəlva.

³ Arkannək gəlamatuya aka gabban məs məɗini, vi geslne tay ərmet sit ɗiy naka dələv vani, ahhətaŋgək matuya sən Yawe, an nampummo də an moskoyo.

⁴ Siske aɗɗaŋgək wəzləra net gizlirkeɗe, va məver wən nani, dəhhətnəngən matuya va ɗaɗay aza təki addaŋ pakə.

⁵ Sissiŋgi matuya nahhət ɗayɗay atəŋgə, matuya nahhət na təlaper, də pay an na mahenziŋ na Yawe, gəm embet ɗiy məzuvəlaŋ mekret papar sən Yawe pakə.

⁶ Səza wəvoŋ taka na təla mabuhulon ləŋgə, atəŋgən matuya nahhət sən Yawe. Tak məɗini gabba gəla na Yawe tagay ɓa.

⁷ Dərɓagan na, apsitinik koɓeɗ sit məzəslmaŋ gərmeŋɗe, gəm sit məkpa'aŋ gəla, də zəga nawzəm gəm nawsa, may mẽl sit mə Sidonɗe dit mə Tirɗe, dəkiningin wəleŋɗe na muguguleɗ kəla pehe sə Liban a Yaffa, va Sirus, məlĩ na Persiya apəl sit tive.

⁸ Dukki na wəzva məs agapaŋ addəv Gəla na Maŋgəlva a Yerusalem, aka təla masulani, Zorobabel, wətən Salatiyel, də Yosuwa, wətən Yosadak, dit madembirgit milmiŋgiɗti, məsdəlveŋge, mə leviɗe, dit ɗiy dəmndoŋ a Yerusalem səka balam pak, atəŋ əɗinin mə leviɗe məs wəzva net kaklaw sula əmbat abe a gəlet vi nawdawgən wəza naddəv Gəla na Yawe.

⁹ Yosuwa tamə, kirtini gəm milmiŋgiɗin, Kadmiyel dit kirtini, kirtin Yuda, dəwənnet pak, aziweŋgik kadawgən məgəɗ wəza addəv Gəla na Maŋgəlva pakə, məza wəpel wən net kirtin Henadad, kirtiti gəm milmiŋgiɗti, mə leviɗe ɓa.

¹⁰ Yaŋ mərkaŋ gəla nek aɗiynən gabba Gəla na Yawe, yaŋ məki məsdəlveŋge dit lukutɗe na wəza, dit mohõɗe, vaski mə leviɗe kirtin Asaf dit ndayɗe, vi dəɗinəngən ki Yawe va Davit, məlĩ na Israyel aɗi wən nani.

¹¹ «Də wəɗi ki Maŋgəlva, də wəfet aka Yawe, ndəɗaŋ əddəɗanən əpel vaŋka: Lewi, vi moggon nan tay aka Israyel faɗə. Ɗiy pak aŋzlaŋgək vaŋvəl nawɗi ki Yawe vi gabba Gəla na Yawe məɗiyəni.»

¹² Diyɗa naret məsdəlveŋge, mə leviɗe dit migil gəleɗe məsɓet məs dulanən Gəla van lahəŋka, ahəmaŋgək wəlet koɓo'koɓo'u, gala adawɗiynən gabba Gəla vani. Ɗiy meɓɓet diyɗa dəda ənnekenən zit də wəlet koɓo'koɓo'u.

¹³ Kpaŋ ɗiy awɓap əgohonən, wəhəm də wənnek əmpa ɓa, ɗiy tay əŋzlaŋ vaŋvəl hã ɓaɓəlmet əprəm faraɗa.