Ezra 1 - Bible en Guidar

Wəmilya maddaabəŋ səka balam ( 1:1—2:70 ) Sirus apələk tive namsak ərka Gəla na Maŋgəlva

¹ Aka wəzva maddaabəŋ na Sirus, məlĩ na Persiya, vi wəpel na Yawe dəgəɗgən va məskəleŋ Yeremiya apeli, Yawe akoluk kiy Sirus, məlĩ na Persiya, vi kawtəl ma aka dələv nan pak, gəm də əver wən nan vi kaprəman na:

² Aŋki Sirus məlĩ na Persiya, apeli: Maŋgəlva Yawe apsiwik milyeŋge naka dələv pak ammba vawa, ndən sən kiyən, anah suwək nərkə səngən Gəla a Yerusalem na Yuda.

³ Sərokuməŋ na, naway naret ɗiy nan di? Maŋgəlva nan dəsan dəndəni, aslək dəlgən a Yerusalem na Yuda, ərka Gəla na Yawe, Maŋgəlva na Israyel, ndəni Maŋgəlva məs dəsan a Yerusalem!

⁴ A təki madembirgit mə Israyelɗe assoŋ pak, ɗiy nadak dərmanəngən vet də təbəz babara, meleŋge, aryeɗ meɓɓeti, zəgeɗ memeyẽɗi, wəvəl də makra papar, vi Gəla na Maŋgəlva a Yerusalem!

⁵ Yaŋ migil gəla na Yuda də Benyamin, məsdəlveŋge gəm mə leviɗe asilyoŋgu, məza kazzeken wən ɓa na, en məs Maŋgəlva akol kiyit nadda ərka Gəla na Yawe an dəsan a Yerusalem.

⁶ Meggeŋgiɗit pak, armannək vet də təbəz babara, meleŋge, aryeɗ meɓɓeti, zəgeɗ memeyẽɗi, zəgeɗ na sləma, mbəksa əvəl də makra papar vi Gəla na Maŋgəlva.

⁷ Məlĩ Sirus, akkeletik zəgeɗ naddəv Gəla na Yawe məs Nabukodonozor ande sə Yerusalem lahəŋ kawziyit addəv gəla net meŋgilveɗ nani.

⁸ Sirus, məlĩ na Persiya, anah sən Mitradat, mərəm arya nani, dəkkeletgini, dəpsingin Sesbasar, ɗəf metiŋ na Yuda.

⁹ Wəŋɗa net yaŋka: hiŋgiɗ na way na meleŋge kaklaw hoku, na təbəz babar gabalə, slohoŋɗe kaklaw sula kiyit vaytakə,

¹⁰ ŋgefleŋɗe na meleŋge kaklaw hoku, na təbəz babar an dəzban masula'a, səkat poɗo də kəlaw; Zəgeɗ meɓɓet gabalə.

¹¹ Sapgit zəgeɗ na meleŋge, dit en na təbəz babar pak, gabal sle' də səkat poɗo. Sesbasar akek pak, gala ɗiy mərmet adamndoŋ sə Babilon a Yerusalem.