Ezekiyel 4 - Bible en Guidar

Alabara nawzan Yerusalem ( 4:1—24:27 ) Ezekiyel də wəsərŋgəsl na Yerusalem

¹ Isi, wətən ɗəfa, agəm meneke, kəɗigən aboko, kəvergən walaŋgəla-metiŋ akani ana Yerusalem.

² Kəzigin meseŋgiɗit kiyən tərweslə, aso' vov nawɗam net məzəlpaŋgə, akkpot dələv ɗigitɗigit hã a disiŋ, kəziygən dibirgidikɗe net məzəlpaŋ dit zəgeɗ nawgay naŋgrof gəla kiyən tərwəslə.

³ Nok agəm təbəz sloprokko, kətukgən va zlava a walaŋguk də walaŋgəla-metiŋ, azi horok sek akani, dəsangən va məsərŋgəslni, kərbanək na məsərŋgəslni: zəga narba yi viyit mə Israyelɗe.

⁴ Nok avoŋ dəka zlaɓay, əvoŋ vaskəs na mambray net mə Israyel kədawɓəsa, gba əvoŋ kədassok ɗuffo vaskəska, heslepe net wasan akoko.

⁵ Naw wanəpsuk əvoŋɗe gba nawsla də əzvaɗe na heslepe neti, tay səkat hoku də kaklaw vaytakə; wakəslan heslepe net ɗiy na Israyel.

⁶ An kəgrakək aska; kəvoŋgən dəka vok dəzəŋ əmpa, wakəslan heslepe net ɗiy na Yuda: əvoŋ kaklaw poɗo, əvoŋ taka gba əzva nəɗi suko.

⁷ Kəɗigən horok ta' vok mekeleŋ dəka Yerusalem məsərŋgəslən, kəpelgən na kəleŋ akani.

⁸ In tat əklak suk helegeɗ yaŋ akoko; kəkkpaŋ na səka tukzlumuk aka tukzlumuk maɓɓan ɓa, hã gap an kəgrakək əvoŋɗe an məs kədawsərŋgəslən.

⁹ Nok agəm haykəmari, haykəmari dadabya, hĩyna net zeli, hĩyna, mətəpsa, hay-hərda, kəziygin a mesteɓe taka, ndəni nawsan zəga nawzəm noko gba pay kədawsok ɗuffo aka təkzlumko: əvoŋ səkat hoku də kaklaw vaytak anan kədawzəma.

¹⁰ Əzəm nok kədawzəm yaŋka: Aza əsɓəta pak kəzəmgən kilo taka ammba əvoŋ sle'i.

¹¹ Iŋkile dəsle kədawsa, kəsəgən litir taka aza əsɓəta pakə.

¹² Kəzəmgən peŋ-məslepreke taka, kədagən aka pəlu ɗəf kpewwe karet ɗiy pakə.

¹³ Yawe amna: «Vaski mə Israyelɗe adawzəmaŋ way na aramba a weleŋgit ɗiy-ɗar en nədarɓehet adaka.»

¹⁴ Yaŋ nəmna: «Aw! Daya Yawe, awle nərnokon zu ɗah ɓa; nəzəm zəga məmtən də an məbakan ɗah ɓa təŋ səka muzliyaw hã gap kakaŋka, slu na zəga nawsẽ' dətoŋ ɗah amaw ɓa.»

¹⁵ Yaŋ aɓsu na: «Nəpsukuk pəlwit wasliɗe a gəla pəlwit ɗiy, kədagən way nok akani.»

¹⁶ Yaŋ aɓsu na: «Wətən ɗəfa, wanərsla əzəm sə Yerusalem; əzəm məslan dəsle adawzəmaŋ də geslne, iŋkile məslet dəsle adawsaŋ də wəkkere.

¹⁷ Ha gap əzəm dit iŋkile dəkkpapaŋgəni, ɗəf pak dəssangən sleker slekeri, dəŋgənaŋgən addəv heslepe neti.»