Ezekiyel 3 - Bible en Guidar

¹ Aɓsu na: «Wətən ɗəfa, azəm an kərahə, azəm ɗereweləŋka; dok apel sit ɗiy na Israyel.»

² Yaŋ nəkol mawa, azəmgu ɗerewel məktəmən naka.

³ Yaŋ aɓsu na: «Wətən ɗəfa, azəm addəvko, aknəh godomblokuk də ɗerewel məktəmən nədapsukəŋka,» in nam əzəmən, asanək amaw gəŋɗət va amama.

⁴ Yaŋ aɓsu na: «Wətən ɗəfa, doko; agap azet ɗiy na Israyel, apel sit əpel nawa.

⁵ Vi azet ɗiy məs ma net tuwãh may əpel net gədak nədawslunuk ɓa; azet mə Israyelɗe yi.

⁶ Azet ɗiy diyɗa məs ma net tuwãh nədawslunuk may əpel net gədak ka kəprəm na met ɓa ɓa, sessel va azeti nəslənuk na, net waprəmnən mok kəta.

⁷ Ya ɗiy na Israyel net aŋgəmaŋ na kaprəmuk ɓa. Vi aŋgəmaŋ na əprəmwən ɓa yi; ɗiy na Israyel pak kiyit ɓəli yi, mekret kərtəhi.

⁸ Yaŋ nəkkpaŋganək kiyuk ɓəl səɗek va an neti, musukuk səɗek va an neti.

⁹ Wanəkkpaŋgan kiyuk va təbəz ɓəɓəla, day ki milɓe; kədawgeslne' sit ɓa, kədakker abet ɓa, vi zeŋvit ɗiy məɓoŋtiŋgə.»

¹⁰ Yaŋ aɓsu na: «Wətən ɗəfa, ataf əpel naw nəpel sukuŋ pak a mokroko, aprəm də sləmoko.

¹¹ Doko; kəlgən azet ɗiy məsimgiti, kirtit ɗiy noko, kəpel sitigini, is na: “Vaŋ Daya Yawe anahə” an waprəməni, an waɓoŋgoŋgu.»

¹² Yaŋ Əmpəs aslawa, nəprəm wəla ɗəf dərɓagaw dayadaya: «Soko sən gagdak na Yawe hã sə təki asani.»

¹³ Ɓaɓəlma persleket zəgeɗ mederet nak məzərgisleŋ aza ziti gəm ɓaɓəlma təlit mawteɗ də geŋgere metiŋgin aka təkzlumti.

¹⁴ Yaŋ Əmpəs asilguwa, mah əkuwa; makraw səkəkə, gədəvu mədani. Ya va Yawe armuwək ɓəlɓələ.

¹⁵ Yaŋ nəgap a Tel-Abib azet ɗiy məsimgit nek en dəssoŋ də gəla ama məlpa Kebar, a təki assoŋgu, nəsaw adak pay buhulu, mbagu gərəŋ a weleŋti.

Ezekiyel wasan məga net ɗiy na Israyel

¹⁶ Də əgrak na pay buhulu, əpel na Yawe ade suwək, dawnəh na:

¹⁷ Wətən ɗəfa, nəɗiykuk ka məzuga na Israyel, sə maw kədaprəm əpele, kəssak sit sugəni.

¹⁸ An nənah sənək məsdaraw na: Əmta kədamta, an kəssak sən ɓa, an kəpel nassak sən məsdaraw aka wən na tive nan mbərayən vi kawkõhgən ɓa, məsdarawəs wamtə addəv heslepe nani, mbel nan avok nədassohẽti.

¹⁹ Ya an kəssak sənək məsdaraw, an dəkkpaŋ səka daraw nan gəm səka tive nan mbərayəŋ ɓa, nan wamtə addəv heslepe nani, nok wakəkõhgən kiyko.

²⁰ An ɗəf təstəs azarək səka təstəs nani, wanəɗi zəga nawtaŋgbay abani: wamtə vi kəssak sən aka mambray nan ɓa; wamtə, kaɗɗumi aka wəza təstəs nan agəɗəŋ ɓa; mbel nan avok nədassohẽti.

²¹ Ya an kəssak sənək ɗəf an təstəs ka ɗəf an təstəs na adaɗɗa mambray ɓa, yaŋ dəgəɗ mambray ɓa, wasan madarani, vi məssak səni, nok wakəkõhgən kiyko.

Maŋgəlva aɗiyək pay nassa ɓatɓat sən Ezekiyel

²² Yawe aɗiyək van akaw adaka; yaŋ aɓsu na: «Asili, agil a walaŋ adak nədawpel suko.»

²³ In le' nəgil a walaŋ naka, gagdak na Yawe yaŋ adak ziwwe va gagdak nəwəl ama məlpa metiŋ Kebar naka. In ngbom də ma gədəvwa.

²⁴ Əmpəs ade akawa; ndən ziwgu aka təlwa. Apel suwa, aɓsu na: «Dok amsan mok eŋgil anok da.»

²⁵ Isi, wətən ɗəfa, kaklak suki helegeɗ yaŋka, waɓrukkən dənditi, kəgil na a weleŋgit ɓa.

²⁶ Wanətip hərzlumuk aza geŋɗetko, hərzlumuk wasan mərmani, wakəsok sit məzuhẽyẽt əmpa ɓa, vi zeŋvit ɗiy məɓoŋtiŋgə.

²⁷ Pay nədawpel suk na, wanəkol moko, kənah sitgin na: Vaŋ Daya Yawe anahə: An naprəma waprəma; an nawɓoŋgo waɓoŋgu, vi zeŋvit ɗiy məɓoŋtiŋgə.