Ezekiyel 2 - Bible en Guidar

Maŋgəlva tay əslən Ezekiyel azet mə Israyelɗe

¹ Aɓsu na: «Wətən ɗəfa, asil ziw aka təlko, nəpel sukgəni.»

² Əmpəs pay azaw gala adawpelsu naka; asilgu ziw aka təlwa, yaŋ nədaprəm ɗəf məzupel su naka.

³ Aɓsu na: «Wətən ɗəfa, nəslunuk azet mə Israyelɗe, azet ɗiy məɓoŋti, azet ɗiy dəɓoŋgoŋ akaw ndəɗaŋ dit efiŋgiɗit hã gap va dəpaŋkəŋka.

⁴ Kirin vet kiyit ɓəli, mekret ɓələ; azet nədaslənko, kənah sitgən na: “Vaŋ Daya Maŋgəlva anahə.”

⁵ An waprəm sukuni, an waɓoŋgoŋgu, vi zeŋvit ɗiy məɓoŋtiŋgə, vasna wasənnən na, məskəleŋ tay a weleŋti.»

⁶ «Is wətən ɗəfa, kədawgeslne' sit ɓa, kədawgeslne' sən əpel net ɓa, vi kiyit ɓəli gəm va gedirgeɗiŋ azoko, aket hərziyeɗ kədawsoko; kədawgeslne' sən əpel net ɓa, kədakker abet ɓa, vi zeŋvit ɗiy məɓoŋtiŋgə.

⁷ Kəpel sitgən əpel nawa, an waprəm sukuni, an waɓoŋgoŋgu, vi məɓoŋtiŋgə.»

⁸ «Is wətən ɗəfa, aprəm an nədawnah suko, kədassok məɓoŋguk va zeŋvit ɗiy məɓoŋtiŋ ɓa, akol moko, azəm an nədapsuko.»

⁹ In haraw sek na: Va ɗəf yaŋ təlla kəlazaw gəm ɗerewel məktəmən addəv vani.

¹⁰ Va ɗəf nak apparək ɗerewel nak abawa, məver akan dahãdahã; məverin akan na: wənɗəsa, wəɓuh ma gəm aw.