Ester 9 - Bible en Guidar

Əmpəlkiya net mə Yudeɗi

¹ Də əvoŋ kəlaw kiyən hoku na təla makəlaw kiyən sulani, məs adawyaŋ na, Adar, pay an naknahan əpel də mahenziŋ na məlĩ yi, ka məzuzelɗe net mə Yudeɗ dəzetingən naki. Pəla', wən nan pirvik, mə Yudeɗ dezetin məzuzelɗe net dərəŋgə.

² Mə Yudeɗ naka va na məlĩ Ahasuwerus gboŋ pak, akkalaŋgək addəvit walaŋgəleɗe gugriɗ məs assoŋgu, awakaŋ sitin ɗiy en dəɗɗumoŋ nawgəɗ sit mbərayən neki. Ɗəf tay dəziw abet təttaka dayday ɓa vi geslne net adek aket ɗiy pakə.

³ Ɗiy gugriɗ naka kivadələv temtem pakə, ɗiy naba məlyã, deyeɗe na kivadələv temtem dit məɗɗaŋ wəza naka dələv na məlĩ vet pak, ammbet mə Yudeɗ adawkaŋ wəna, vi tahəŋ əgeslne'eŋ sənən Mardokay diyɗa.

⁴ Mardokay ɗəf metiŋgini addəv gəla na məlyã, sləman tay ndundu aka va na məlĩ dəwənnani. Vi gagdak na Mardokay tay əɓay əmbat abe abe.

⁵ Mə Yudeɗ abeyinik məzuzelɗe net dit masalamɗe, aɗɗaŋgək va mekret aŋgəl dit məzuzelɗe neti, abeyinke, azetinke.

⁶ Mə Yudeɗ abayaŋgək ɗiy səkat sle'i sə walaŋgəla-metiŋ na Susan.

⁷ Gəm abeyinik may Parsandata, Dalfon, Aspata,

⁸ Porata, Adaliya, Aridata,

⁹ Parmaseta, Arisay, Ariday gəm Wayzata,

¹⁰ kirtin Haman kelaw, wət Hammedata məzuzel net mə Yudeɗi. Ya dəgəmaŋ zəga nawrəh na ma wəgay ɓa hara.

¹¹ Pay dəpaska'e ləŋ, mənah sən əŋɗa net ɗiy en məbeyit sə Susan sən məlyã.

¹² Ndəni kan, məlĩ affon sət wən nan sət ma'ãyək Ester, aɓsət na: «Walaŋgəla-metiŋgin na Susan kaka' mə Yudeɗ abayaŋgək ɗiy səkat sle', kirtin Haman kəlaw nek sap azeti. Is əɗɗumon na, gbəŋgbarəŋ abayaŋ sə təki maɓɓan temtem di! Əssoh nok miy əmpa maɓɓan di? Wanəpsuko. Miy kəŋgəl əmpa di? Wagəɗə.»

¹³ Ester təzlanəka, təmna: «An məlĩ gagdak atafək wən nan na, dəpəl tive sit mə Yudeɗ na Susan, dəɗɗaŋgən mazayin əmpa, va minan dəpaŋkəŋka'e, gəm dəlawəngən kigəbeyit kirtin Haman kəlawiŋ aka wəlaŋga.»

¹⁴ Məlĩ amna dəgəɗ vaska: məɗiyə mahenziŋ meleketen a Susan, məlewti kigəbeyit kirtin Haman kəlaw neki.

¹⁵ Mə Yudeɗ na Susan akkalaŋgək də əvoŋ makəlaw kiyən poɗon na təla na Adar əmpa, abayaŋgək ɗiy səkat hoku sə walaŋgəla-metiŋ, dəndanən zəga nawrəh na ma wəgay ɓa hara.

¹⁶ Mə Yudeɗ na təki temtem naka kivadələv na məlĩ, akkalaŋgək vi kawhãy ammba ziti. Abayaŋgək ɗiy gabal kaklaw buhul kiyit sle' səret məzuzeltini, ya dəndanən zəga nawrəh na ma wəgay ɓa hara.

¹⁷ Də əvoŋ kəlaw kiyən hoku na təla na Adar, wənəs agəɗə. Də əvoŋ kəlaw kiyən poɗo, affeteŋgi, pay dəpaska'e aɗɗaŋ əzləra də ənneke.

¹⁸ Vasna mə Yudeɗ na Susan, məs dəpəlnən kiyit də əvoŋ kəlaw kiyən hoku gəm kəlaw kiyən poɗo na təla na Adar, net affeteŋgək də əvoŋ kəlaw kiyən sle', dəpaski net azləraŋ də ənnek tamə.

¹⁹ Vaski kan mə Yudeɗ na kəlawra gəm na walaŋgəlaɗe gugriɗ azləraŋ pay taka, aka makəlaw kiyən mapoɗo'ən na təla na Adar: Azləraŋgək də waynabaya də zit ənneke, abbalanənək wəvəl a walaŋ ziti.

Wəɗi əzləra naɗɗumon an dətoŋgu

²⁰ Mardokay averik wən net zəgeɗ en dətoŋgoŋgəŋ pakə. Dərɓaga as aslən an aver temtem van sit mə Yudeɗ naka va na məlĩ Ahasuwerus, en go'o dit en faraɗa pakə.

²¹ Anah sit dəzləraŋgən ama əzva pak, aka təla na Adar də wəvoŋ nan makəlaw kiyən poɗon də makəlaw kiyən sle'eni.

²² Vi addəvit əvoŋɗeski mə Yudeɗ arəhnən kiyit səvet məzuzelɗe neti; aka təlaski əzəmsahã net agrakə, makret avoŋgu. Adahək dəɗɗumotingən wənɗes də wəda waynabaya, də əvəl a walaŋ ziti, də wəpsit zəgeɗ sit məzurayɗe.

²³ Mə Yudeɗ atafənək an Mardokay aver sit akani, akkpaŋgək zəga nazba neti.

²⁴ Vi Haman wət Hammedata zev Agag məzuzel net mə Yudeɗ pak, aɗɗumuk aket mə Yudeɗ nawzeti. Agəɗək vẽpəlu vi kazlzleɓet gəm kawzeti.

²⁵ Səza wən nan agap aza məlyã, averik wən nan dəver na: Əɗɗum nan mbərayən aɗum aket mə Yudeɗiŋki dəkkpaŋ akani; ndəni kan məlawən dit kirtin aka wəlaŋga.

²⁶ Vini yi adawyenin wəvoŋɗe na wəzləra vetis na purim, zəga adawyaŋ purim van na, əska piɗe yi. Sən aski, əpel naddəv letərəŋ pak, an awlaŋ aka wənəska gəm an dəgəɗ aketi,

²⁷ mə Yudeɗ aɗiyənək gəm atafənək pay sula meɗiynəs sən kiyti gəm sən mazlalwẽt dit ɗiy en dətafnən wən net pak adawtoŋ daɗɗa ɓa, va aza məverin gəm va aza pay məɗiyən ama əzva pakə.

²⁸ Əvoŋɗeski məɗumeti, məzbeti aza va sayit ɗiy amə' pakə, addəv mazlawã pakə, aka kivadələv va asan, walaŋgəla-metiŋ va asani. Pay na vẽpəlu van azə na sə waleŋgit mə Yudeɗ ɓa, əɗɗum aket dərslə sə weleŋgit mə Yudeɗ ɓa.

²⁹ Ester ma'ãyək wətən Abihayil də Mardokay mə Yuda, avereŋgək letər masula'ən əmpa də gagdak net pak vi kawɗi wən na purim.

³⁰ Məsləni əpel na zazaya gəm na gegesiŋ məverin sit mə Yudeɗ pakə, sən kivadələv temtem səkat də kaklaw sula kiyən buhul naka va na məlĩ Ahasuwerus.

³¹ Vi kawɗi əvoŋɗe na Purim iski də pay net məɗiyən va Mardokay mə Yuda gəm Ester ma'ayək aɗiynən wən nani, va aɗiynən əɗɗa meme gəm əhəm sən kiyit zək neti gəm sən mazlalwẽti.

³² Əpel nat Ester aziwginik wən na Purim, məverni addəv ɗerewel.