Ester 8 - Bible en Guidar

Mə Yudeɗ askannək wəlet meseŋgiɗti ( 8:1—10:3 )

¹ Pay dəpaska'e, məlĩ Ahasuwerus apsət gəla na Haman məs dədawak sit mə Yudeɗəŋ sət ma'ãyək Ester. Mardokay kan pay aba məlyã, vi Ester tərbanək na məs miyi nat di.

² Məlĩ ndama məs ataf səva Haman pərət əprətən apsən Mardokay. Ester mbagən gəla na Haman ammba va Mordəkay.

Əpəl na məlĩ ammbet mə Yudeɗi

³ Ester təpel sənək məlĩ əmpa, təzbər ammba tələn, təhəmə; təkkaman dətakgən daraw na Haman mə Agag gəm məs aynan nawgəɗ sit mə Yudeɗəŋka.

⁴ Məlĩ atəl sət zleŋge na meleŋge sət Ester, Ester le', təziw aba məlyã,

⁵ təmna: «An neki aza məlyã, an nərahək mbəlembəle səvani, an məlĩ atafəka, dəver nawbay wən net ɗerewelɗe na Haman wət Hammedata mə Agag, məs aver vi kawzet mə Yudeɗ səka va na məlĩ pakəŋka.

⁶ Mbarmbar nədawɓəs nulagən əray dədawrih ɗiy naw di? Mbarmbar nədawɓəs nulagən əza na mahəlfa naw di?»

⁷ Məlĩ Ahasuwerus azlan sət Ester də Mardokay mə Yuda na: «Yaŋkəŋ na, nəpsətək gəla na Haman sət Ester, nan məlawni aka wəlaŋga vi adawkay tive nawbey mə Yudeɗi.

⁸ Nokum məver sit mə Yudeɗ va kəŋglaŋ də iya na Məlyã. Məɗi ndama na məlĩ akani, an məɗiyi ndama na məlĩ akani, zəga tay nawbay wən nan ɓa.»

⁹ Dəpaska'e məye məzuvereŋ na məlĩ aka təla mohoko'ən, təla na Siwan əvoŋ nan kaklaw sula kiyən hoku. Məverni pak va Mardokay aɗi wən nan sit mə Yudeɗi gəm sit deyeɗe na bərzləŋ na kivadəlva, sit deyeɗe na kivadəlva deyeɗe naka kivadəlva səkat də kaklaw sula kiyit buhuliŋki təŋ sə Indiya hã gap a Etiyopi. Kivadələv pak va aza əver nani, ɗiy pak va aza ma neti, gəm mə Yudeɗi va əver neti gəm va aza ma neti.

¹⁰ Məverni aka iya na məlĩ Ahasuwerus, məɗi ndama na məlĩ akani, yaŋ məpsit məŋkoroŋ pilseŋge məwele na məlĩ dəketingəni.

¹¹ An məverin addivit na, mə Yudeɗ na walaŋgəleɗe gugriɗe naka dələv na məlĩ pak, dəkkalaŋgən dəhãyaŋgən ammba ziti. Məpəl siti tive, dəzetingin ɗiy en məzuzeletini, dəssoŋ mədəgaŋ di zlaŋ en dədawakaŋ sitin pakə. Dəbeyningin dit gil neti, dit kirtiti, dəndannəngən arya neti'e,

¹² addəv pay taka kaka' aka dələv na məlĩ Ahasuwerus gboŋ, də əvoŋ kəlaw kiyən hoku na təla makəlaw kiyən sulan adawyaŋ na Adar.

¹³ An məverin van wasan va mahenziŋ aka dələv pakə, kaprəman sit ɗiy pakə, vi mə Yudeɗ dəslanəngən zit vi pay nani, dəmpəlaŋgən kiya aket meseŋgiɗti.

¹⁴ Məpeŋgən pilseŋge məwele nek agulyoŋguk də kakara dəka əpel na məlyã, agəmen ziti. Məɗini mahenziŋ nan a walaŋgəla-metiŋ na Susan.

¹⁵ Mardokay agilik səza məlĩ də lukut na məlĩ pəreŋ-pəreŋgi gəm gabaga babara, kulpup memetiŋ na meleŋge, lukut məsilip na zeŋze na time pepreŋ ɗiwɗiwi, ndəni walaŋgəla-metiŋ na Susan adaŋzla vaŋvəl də ənneke.

¹⁶ Net mə Yudeɗ na, asan sitik pasakə, mekret avoŋguk sawɓa, zit annekik diyɗa, arəhaŋgək gagdaka.

¹⁷ Addəv kivadələv pak, may a walaŋgəla mawandi pak, təki əpel na məlĩ də mahenziŋ nan agap pak na, mekret mə Yudeɗ avoŋko, zit anneke, adaŋgək waynabaya may aɗɗaŋgək əzləra. Ɗiy diyɗa dəmanən zit ka mə Yudeɗi, vi geslne armek sit mə Yudeɗi.