Ester 7 - Bible en Guidar

Ərah ki tatrãh gəm əmta na Haman

¹ Məlĩ kan pay də Haman kawzəm dət Ma'ãyək Ester.

² Məlĩ aɓsət Ester əmpa aka pay masula'ən nawzəm na: «Mi kədassõ kana ma'ãyək Ester? Kapsuki. Mi kədawkay di? Gap wəɗak na dələv vanəŋ zlaŋ wagəɗə.»

³ Ma'ayək Ester təzlanka, təmna: «An nərahək mbəlembəle nok na, aw məlyã, an neki azok na məlyã, zeŋgilew dəkõhu, aski nədaŋgla gəm an net ɗiy nawa, anan nədawkayani.

⁴ Vi in dit ɗiy naw pak məvəlmi yi kawbaymə, kawzam kakãhə. Va ka belemɗe kaka' məvələm zel dit gil van na, kəta nəpel na ɓa. Vi tatwãh as dəgap gala nawyan məlĩ aka wən nan ɓa.»

⁵ Məlĩ Ahasuwerus apelke, aɓsət ma'ãyək Ester na: «Nawãy di, ŋgay ɗəf məs dəɗi a makran naɗɗa zəga vaskəs kpak di?»

⁶ Ester təzlan na: «Ɗəf məs əseɓ də əzel van na, Haman iyi. Ɗəf mbəraynəska!» Geslne armak Haman aba məlĩ dət ma'ãykə.

⁷ Məlĩ le' net herɗe sə təki nawzəma, al əsan a təki nazgəl wəleŋɗe na nanda. Haman bew vi kakkam nawkõhgən kiyən abat ma'ãyək Ester, awlak na, məlĩ aynanək nawgəɗ sən zəga mbərayən.

⁸ Məlĩ pay sə guli net wəleŋɗe nak əŋgil a təki nawzəma. Haman tay ɓəloho aka zəga nawvoŋ məs Ester təsat akani. Məlĩ amna: «Karmət ma'ãyək vat əmpa karaw əŋgil anawda sa?» Əpel əggrak səma məlĩ ləŋgə məsərətni hara Haman.

⁹ Harbona, taka naret mətawaŋkoyom naba məlĩ amna: «Wəlaŋga tay məs Haman azaɓ ammba Mardokay məs dəpel moggon ammba məlyã. Tay tukko əŋgil ana Haman da, əɓay nan metər kaklaw sula kiyən sle'i.» Məlĩ amna: «Məlaw akani!»

¹⁰ Alawənək Haman aka wəlaŋga an azaɓ ammba Mardokay naka. Yaŋ kan herɗe na məlĩ affeteŋgi.