Ester 6 - Bible en Guidar

Haman nawbayi ( 6:1—7:10 ) Mədoɗni ki Haman dəɓe' səngən Mardokay

¹ Dəfəɗ dəpas na, sin atrayaŋgək səra məlyã. Anah dəkisənəngən ɗerewel naɗɗumet wəzeɗe en dətoŋgoŋ də pay net də mabbər ki ziti, məŋɗet aba məlyã.

² Yaŋ mərəh əver aka an Mardokay apel dəwəlsən Bigtan də Teres, mətawaŋkoyom sula səret məgaŋ metive na məlyã. Ndəɗaŋ dəkayaŋ əslən əbay məlĩ Ahasuwerus.

³ Yas məlĩ amna: «Mi məɗɗa nawgagdakan may nawɓaygən Mardokay aka as di?» Gewleɗ na məlĩ en məɗɗaŋ wəza nan aɓɗaŋ na: «Zəga tay məgəɗ sən ɓa.»

⁴ Məlĩ amna: «naway a daŋglas di?» Daka' Haman adek a meŋgle ana məlĩ da vi kawnah sən məlĩ kawlaw Mardokay aka wəlaŋga məs azaɓ viyən naka.

⁵ Gewleɗ na məlĩ aɓsənən na: «Haman yaŋ ziwwe a meŋgle.» Məlĩ amna: «Dətoŋgu.»

⁶ Haman toŋgu, yaŋ məlĩ aɓsən na: «Mi naɗɗa sən ɗəf məs məlĩ aŋgəl əgagdakan di?» Haman adaɗɗum a makran na: «Naway məlĩ adaɗɗum əɗi kiyən balsu di?»

⁷ «Haman azlan sən məlyã, ɗəf məs məlĩ aŋgəl əɗi kiyən na:

⁸ ɗiy dəkiyaŋ lukut na məlĩ məs məlĩ agul kulo'sa azani gəm pələs məs məlĩ apeŋ peŋsa akani, gəm kawɗup sən kulpup na məlĩ akani;

⁹ kapsən lukut van də pələs pak sən ɗəf taka səret ɗiy en gugriɗ naba məlyã, məs də gagdak day; dəgulsəngən ɗəf məs məlĩ aŋgəl əɗi kiyən, dəpeŋgənəngən aka pələs van a kapta na walaŋgəla-metiŋ. Dəŋzlaŋgəŋ vaŋvəl aban na: Vaŋki adaɗɗaŋ sənən ɗəf məs məlĩ aŋgəl əɗi kini.»

¹⁰ Yaŋ məlĩ aɓsən Haman kan na: «Go', agəm lukut gəm pələs va kənahə, aɗɗa vas sən Mardokay, mə Yuda an məs dədawsan a meŋgle na məlyəŋka; kədappa zəga taka əbəta səra an məs kepel pakəŋ ɓa.»

¹¹ Haman lukut də pələs gəm, agul sən Mardokay, apeŋgin aka pələs a kapta na walaŋgəla-metiŋ. Ndən əŋzla vaŋvəl abani: «Vaŋki adaɗɗaŋ sən ɗəf məs məlĩ aŋgəl əɗi kini.»

¹² Mardokay bəryok a meŋgle na məlyã, Haman tam agəmək zən əmbat ananda zən so'or so'or, kiyən sərətta.

¹³ Haman abotonək an dəgəɗ akan pak sət ɗak nan Zeres gəm sit beyneŋgiɗni. Məsmaɗɗulet naban gəm ɗak nan Zeres aɓsənən na: «An Mardokay məs kətəŋ əzbər abanəŋ zevit mə Yudeɗi na, kəska na wəlan ɓa, əzbər kədazbər abani.»

¹⁴ Aka tahəŋ əzga meŋ dəndəni, belemɗe en mətawaŋkoyom na məlĩ gapaŋgə. Ndəɗaŋ zit gəm əka Haman əzəm waynabaya məs Ester tədə.