Ester 5 - Bible en Guidar

Ester aza məlyã

¹ Əvoŋ mohoko'ən na, Ester lukut nawzəm məlĩ kulo' azata. Ndət ziw a daŋgla na mahara gəla na məlyã. Məlĩ tay ɗewwe aka mazaŋga na məlĩ nan addəv gəla na məlyã, haran sek də metive.

² Adan məlĩ awlət Ester ma'ãyək ziwwe a daŋgla, tərahək ki nenek azani, məlĩ nak zleŋge na meleŋge dəsan ammba van təl səta. Ester azan dəder, tərəŋgən ki zleŋge vani.

³ Məlĩ aɓsət na: «Mi dəgəɗ di ma'ãyək Ester? Mi kəŋgəl di? Wəɗak na dələv zlaŋ kapsuki.»

⁴ Ester təzlan sən na: «Va Məlĩ waŋger na, kəta məlĩ dədegən də Haman dəpaŋ əzəm waynabaya məs nədawdə səni.»

⁵ Məlĩ amna: «Məki Haman dəde go' kaɗɗa an Ester təpeli.» Məlĩ kan pay də Haman əzəm waynabaya Ester tədə naka.

⁶ Aka adawsaŋ mbazla, yaŋ məlĩ aɓsət Ester na: «Mi kəŋgəl di? Wakərəha! Mi kədawkay di? Wəɗak na dələv zlaŋ karslani.»

⁷ Ester təzlanka, təmna: «Məs nəŋgələ gəm an nədawkayan na:

⁸ an nərahək mbelembəle səva məlyoffo, an məlĩ ananək nek nawtaf məs nəŋgələ gəm naɗɗa məs nədawkayani, asna məlĩ dədegən də Haman əzəm waynabaya məs nədawdə siti, pummo na wanəɗɗa va məlĩ apeli.»

Haman azaɓanək wəlaŋga nawlaw Mardokay akani

⁹ Pay dəpas na, Haman agilik də zən neki, makran avoŋko. Adan Haman adawla Mardokay a meŋgle na məlĩ na, nan awsilyen ɓa may akker sən ɓa, Haman aknahək dit herɗe aka Mardokay.

¹⁰ Haman armak makrani. Ndən mbat eŋgili, aslən iye beyneŋgiɗni gəm Zeres guluk nani.

¹¹ Haman kan apel sit aka araya nan gədakəŋka, may wən net kirtin diyɗeŋki, may va məlĩ aɓaygən aka wəza, va aɗi aket deyeɗe gəm məɗɗaŋ wəza naba məlyã.

¹² Yas Haman anah əmpa na: «Ma'ãyək Ester in kaka' təyə nadda də məlĩ əzəm waynabaya məs tədə.» Mazayən zlaŋ anaw təyə də məlyã.

¹³ As pak məksuwi ɓa an in tat ula Mardokay mə Yuda ɗewwe a meŋgle na məlyã.

¹⁴ Yaŋ Zeres guluk nani gəm beyneŋgiɗin pak aɓsənən na: «Ɗiy dəzaɓaŋ wəlaŋga məs əɓay nan metər kaklaw sula kiyən sle'i, də pummo na, kənah səngən məlĩ dəlawəngən Mardokay van akani, kedegən əzəm waynabaya də məlĩ də zuk neki.» Əpel van asanək nek aza Haman, yaŋ azaɓ wəlaŋga vani.