Ester 4 - Bible en Guidar

Mardokay tay ənah sət Ester tətoŋgən ara wən vani

¹ Mardokay asənək an məɗɗan gərakə, ndən lukutɗe səzan ngar ngarə, gabaga na sak azan kulo'u gəm aggbo' moŋglo akani. Agil a walaŋgəla-metiŋ, aŋgəsl vaŋvəl na sãhã dayadaya.

² Ndən gap hã a meŋgle na məlyã, ya ɗəf awgap aza məlĩ də lukut na gabaga na sak ɓa.

³ Kivadələv an əpel na məlĩ də mahenziŋ nan agap adak pak na, gəlabay metiŋgini azet mə Yudeɗi: əɗɗa meme, wəhəma may əɓuhma; gabaga na sakə may moŋglo dəssoŋ zəga nawvoŋ net ɗiy diyɗa.

⁴ Gorɗeŋge dit zel mətawaŋkoyom məɗɗaŋ wəza nat Ester azzoŋguk ənah səta. Ma'ãyək təttapək sawɓa. Yaŋ təslən lukutɗe nawgul sən Mardokay may kakgbuk gabaga na sak səzani, ya dətaf ɓa.

⁵ Ester dah iya Hatak taka səret zel mətawaŋkoyom na məlĩ məs aɗi abata. Yaŋ təslən aza Mardokay, kawsənən na, mi dəgəɗ di? Ammba mi di?

⁶ Hatak vit mbat aza Mardokay, tay a təki nakkal a meŋgle na məlyã

⁷ Mardokay anah sən an dəgəɗ akan pakə, gəm əŋɗa net koɓeɗ en Haman aynan nawɗi addəv ərəh na məlĩ ammba nawzet mə Yudeɗi.

⁸ Apsənək zev ɗerewel na mehenziŋ məverin məkan a Susan aka wən nawzet naka, dərban sətəgən Ester, dəboton sətgəni gəm dənah sətgən təlgən aza məlĩ əssõh mbəlembəle nani, təkkamangən ammbet ɗiy nata.

⁹ Hatak kan bəryok azat Ester, aman sət əpel na Mardokay.

¹⁰ Ester təpel sənək Hatak, təslən aza Mardokay na:

¹¹ «Gewleɗ na məlĩ beymeti, may ɗiy temtem naka kivadələv na məlĩ asənnənək na, ɗəfa awaniɓa gulku məs nawtoŋ aza məlĩ a daŋgla məza iya məyan ɓa na, mahenziŋ nan takayi, əbayni. Kar ɗəf an məlĩ atəlsən zleŋge na meleŋge nani, nan kappani madarani. Ya naw əvoŋ kaklaw hoku yaŋka, məyuwi nadda aza məlĩ ɓa.»

¹² Yaŋ anah sən əpel nat Ester sən Mardokay,

¹³ Mardokay aslənək ənah sət Ester na: «Kədaɗɗum na, nok wakəkõh takərguk səret mə Yudeɗ pak vi kəsok addəv gəla na məlĩ ɓa.

¹⁴ Vi an kəsokuk ɓatɓat aka pay va yaŋkəŋka, əkõh net mə Yudeɗ wade sə təki mbərən. Ya is də gəla na afuk na, wakəzaŋgə. Ya nawa dəsən di, kuzuŋ sən wən vaŋ vani kəgap ana məlĩ da.»

¹⁵ Yaŋ Ester təpel namndan sən Mardokay na:

¹⁶ «Dok akkelet mə Yudeɗ dəssoŋ a Susan baymeti, məgəɗ' meme viwa, əvoŋ hoku də əsɓəta hoku kədawsaŋ ɓa, kədawzəmaŋ ɓa. In dit belemɗe naw pak vas nədaɗɗa. Asna, wandaw aza məlyã də asan əzlah ki mahenziŋ zlaŋ; an wanəzə nəzə!»

¹⁷ Yas Mardokay ambatə, aɗɗa va an Ester təɗi sən wən nan pakə.