Ester 3 - Bible en Guidar

Ətuvur wən na Haman temtemi ( 3:1—5:14 ) Wən a walaŋ Haman də Mardokay

¹ Dərɓeget alabaraɗeski, məlĩ Ahasuwerus aɓaygənək Haman wətən Hammedata, zev Agag aka wəza; apeŋgənəka, aɗiyək aket ɗiy gugriɗ məs dəssoŋ dəndən baymeti.

² Məɗɗaŋ wəza a meŋgle na məlĩ pak na, əkdukoŋ, əppu'oŋ aba Haman, vi məlĩ dəɗi wən nan vas ammbani. Ya Mardokay na, agduk ɓa, appu' ɓa.

³ Ndəni gewleɗ na məlĩ en na meŋgle na məlĩ anəhaŋ sən Mardokay na: «Vimi kədaggar ki wən an məlĩ aɗi di?»

⁴ Pay pak tahəŋ əpeleŋ sənən aka wən nani, ya aprəm sit ɓa. Yaŋ anah sənən Haman, kawla an Mardokay van waziw aka əpel nani. Vi anah sitik na mə Yuda yi.

⁵ Haman awlak na, Mardokay agduk aban ɓa, appu' sən ɓa, gədəv Haman adək sawɓa.

⁶ Man tay aka əzan Mardokay kaka' ɓa, vi mərbet səni yi ɗiy na Mardokay. Ndəni Haman akay əzet mə Yudeɗ dəssoŋ aka dələv na Ahasuwerus baymet ndəɗaŋ ɗiy na Mardokay.

⁷ Də təla maddaabəŋ, adawyaŋ na təla na Nisan, addəv əzva makəlaw kiyən sula na Ahasuwerus aka məlyã, aza əvoŋgo gəm aza təla pak məɗɗay vẽpəlu adawyaŋ na purim aba Haman, vi kawsənən na, təla gəm əvoŋ awani nawsan puk di. Vẽpəlu abətək aka təla makəlaw kiyən sula, ndəni təla na Adar.

Haman tay ətuvur wən nawzet mə Yudeɗi

⁸ Haman aɓsən məlĩ Ahasuwerus na: «ɗiy tahəŋ net temmeŋ səzet ɗiyi, dətrayaŋ aret ɗiy aka kivadələv nokuŋ pakə. Mahenziŋ net temme səzan net ɗiy pakə. Azbanən mahenziŋ na Məlĩ ɓa. Dədah aza məlĩ dəppetigin effet ɓa!

⁹ An məlĩ atafək na, nawveri wən nawzeti. Wanəslə kilo gabal kaklaw hoku na təbəz babar kawziyən a maha na məlĩ sit ɗiy naka wəza.»

¹⁰ Yaŋ məlĩ aprət ndama məs lamba nan azan səka vani, apsən Haman wətən Hammedata, mahəlfa na Agag, məzuzel net mə Yudeɗi.

¹¹ Yaŋ məlĩ aɓsən Haman na: «Koɓeɗi, nokuŋgə, ɗiy veti, aɗɗa an kəwəl lew amahorok dənɗaŋ!»

¹² Yaŋ Məye məzuvereŋ na məlĩ aka təla maddaabəŋ də əvoŋ kəlaw kiyən hoku nani. Yaŋ məverin səɗek va an məs Haman aɗi wən nan sit daya na bərzləŋ na kivadələv na məlyã may deyeɗe na kivadələv temtemi, gəm sit deyeɗe net ɗiy pakə. Sən kivadələv pak də zev əver nani, sən mahəlfa pak də ma nani. Məverin də iya na məlĩ Ahasuwerus, mərga ndama na məlĩ van akani.

¹³ Mipsiti ɗerewelɗe vet avet maslənɗe duɗeknin aka kivadələv na məlĩ pakə, vi kawzet mə Yudeɗ pakə, kawbeyit kəkãh aka pay taka təŋ səza gawla hã aza mazza, kirni, gili, də wəsɓəta makəlaw kiyən hoku na təla makəlaw kiyən sula, ana təla na Adar, kawnda araya neti.

¹⁴ Ɗerewel van tay aka kivadələv pak va mahenziŋ naprəman sit ɗiy pak vi dəssoŋgən ɗəhərra əga pay vanəska.

¹⁵ Muɗakaŋ ɗerewelɗe agəmənək zit va məlĩ aɗi wən nani. Məŋɗani mahenziŋ van a walaŋgəla-metiŋ na Susan. Məlĩ də Haman kan kayaŋ təki gurom kawsa, mbagən walaŋgəla-metiŋ na Susan gərəŋgə.