Ester 2 - Bible en Guidar

Ester təkkpaŋgək ma'ãy na məlyã

¹ Dərɓaga əpeləska, səza herɗe na məlĩ Ahasuwerus affetke, yaŋ adaɗɗum akat Vasti də an təgəɗə, gəm an məziwgin aka wən nata.

² Gewleɗ na məlĩ məssoŋ aban aɓsənən na: «Məlyã, ɗəɗah əwel suk gorɗeŋge ŋgbuɓɓo ŋgbuɓɓo lelewɗe.

³ Aka kivadələv nok pak, aɗi deyeɗe nawel gorɗeŋge en ŋgbuɓɓo ŋgbuɓɓo, lelewɗe aza ula. Dəkiyigən addəv gəla na məlĩ a Susan, addəv gəla net gil nammba va Hege, mətawkoyom məgə gil na məlyã. Asna dipsitigin zəga nawbay gawla sən ziti.

⁴ Goruk akən təgəm horoko məlyã, ndəttə nawsat ma'ãyək a gəlat Vasti.» Əpel van annekək zə məlyã, aɗɗak vaska.

⁵ Ɗəf mə Yuda tay a walaŋgəla-metiŋ na Susan vani dawyanən na: Mardokay, wətən Yayir, wət Simey, wət Kis, mahəlfa na Benyamin.

⁶ Tay aret ɗiy məs Nabukodonozor, məlĩ na Babilon asimgit na gəgay sə Yerusalem, sap də Yekoniya məlĩ na Yuda.

⁷ Ndən dəzgələt Hadassa məs adawyaŋ na Ester, wətən madiyan, vi afət tay ɓa, mat tat ɓa. Waŋ vat moggottə sawɓa, badak zət lewi diyɗa. Dərɓaga əmta na afət dət mata, Mardokay agəmtək ananda va wətəni.

⁸ Səza məprəman əpel na məlyã də mahenziŋ nani, gəm səza məkkelet gorɗəŋge diyɗa a walaŋgəla-metiŋ na Susan aba Hege. Yaŋ məgəmət Ester məkət ana məlĩ da sən Hege məga net gili.

⁹ Waŋ vat təwiɗik aran sawɓa, ndəni tərah kinenek səvani. Agəmək zən əpsət zəga nawbay gawla sən zəta may nawzəma, gəm gorɗeŋge buhul məwelit dəwel səna məlĩ da kepsəta. Yaŋ asimgət dit gorɗəŋge nat vet a təki an moggon naddəv gəla net gili.

¹⁰ Ester tərbet ɗiy nat ɓa, migilət ɓa; vi Mardokay abayək mat na, tədarban ɓa.

¹¹ Pay pak Mardokay əbbal dəma gəla net gili, vi kawsən zay nat Ester gəm mbarmbar məɗɗa dəndət di.

¹² Pay nadda nat goruk taka səret pak adawgap nadda aza məlĩ Ahasuwerus na, an təsatək təla kəlaw kiyən sula va mahenziŋ net gil aɗiya. Vaŋki pay nawzleren zit van awɗakə: Təla sləre sən mẽl adawyaŋ na mir, təla sləre əmpa sən mẽl məfok neki gəm zəgeɗ nawbay gawla net gili.

¹³ Vaŋki goruk tədaddat aza məlyã: an təssõh pak kapsətiyi təlgən dəndən səddəv gəla net gil addəv gəla na məlyã.

¹⁴ Də moskoy tədaddata, də pummo, ndət əmndat addəv gəla net gil masula'ən ammba va Sasgas gawla an məga na məlyã, məs dədawge gəreŋgiɗin. Tamndat aza məlĩ əmpa an ma məlĩ yi akat ayət də iya nat ɓaɓa.

¹⁵ Adan pay nat Ester wətən Abihayil, madya Mardokay məs dəgəmət ananda va wətən agap naddat aza məlĩ tamə, zəga tay təssõh abbər an Hege gawla na məlĩ mətawkoyom məs dədawge gil arbə sət ɓaɓa. Kiyət Ester asanək nek avet ɗiy məs dulətən pakə.

¹⁶ Yaŋ məgəmət Ester məkət aza məlĩ Ahasuwerus addəv gəla nawzəm məlĩ nani, də təla makəlawən adawyaŋ na Tebet addəv wəzva mabuhulon nan aka məlyã.

¹⁷ Məlĩ aŋglutək Ester daykiyit gil pakə, tərahək kinenek də ulasahã nan daykiyit mambirgit gorɗeŋge ŋgbuɓɓo ŋgbuɓɓo vet pakə. Ndəni kan aɗup sət kupupu na məlĩ akata, aɗiyət ka ma'ãyək a gəlat Vasti.

¹⁸ Yaŋ məlĩ adə waynabaya sit ɗiy gugriɗ na wəza dit gewleɗ nan ka waynabaya nat Ester. Apsən əffet sən kivadələv nan temtem pakə, avəl məlĩ məlyã.

¹⁹ Gala məkkelet gorɗeŋge ŋgbuɓɓo ŋgbuɓɓo təl masula'ən, Mardokay tay ɗewwe a maddamba na məlyã.

²⁰ Ester tərbet migilət ɓa, ɗiy nat ɓa, va Mardokay aɗi sət wən nani. Ester təzbanək an Mardokay aɗi sət wən nan va aka təsat ammba vani.

Mardokay aprəmik ɗiy dawslerin meti

²¹ Pay nan dəpas na, Mardokay tay ɗewwe a meŋgle na məlyã. Yaŋ gewleɗ na məlĩ sula səret en mətawaŋkoyom məzugaŋ maddamba, anet may Bigtan də Teres gədivit adə diyɗa, akayaŋ tive nawbay məlĩ Ahasuwerus.

²² Yaŋ Mardokay asən wən vani, anah sət ma'ãyək Ester, Ester tənah sən məlĩ dəka iya na Mardokay.

²³ Məkosoni wən nani, mərəhni na gesiŋgi yi. Yaŋ məlewit sulegit aka wəleŋga, məverin kara məlĩ addəv ɗerewel net alabaraɗe də mabər ki ziti.