Ester 1 - Bible en Guidar

Ester təkkpaŋgək ma'ãykə ( 1:1—2:23 ) Waynabaya na məlĩ Ahasuwerus

¹ Aka pay na Ahasuwerus na, Ahasuwerus van dəzəm məlĩ təŋ sə Indiya hã gap a Etiyopi, kivadələv temtem səkat də kaklaw sula kiyən buhul.

² Pay dəpas na, məlĩ Ahasuwerus asanək aka mazaŋga na məlĩ nan a korgu adawyaŋ na Susan.

³ Addəv əzva nan mohoko'ən aka məlyã, adək waynabaya sit ɗiy gugriɗ na wəza nani gəm məɗɗaŋ wəza nan beymeti. Məzəlpaŋ na Persiya dit na Mediya gəm deyeɗe na kivadəlveŋge dit milyeŋge azoŋguk abani.

⁴ Yaŋ kan anzi zəga na əvoŋ səkat də kaklaw dədopoɗo aka ərban sit arya na gagdak na məlĩ nani, gəm memetiŋ nan naggət akanəŋka.

⁵ Dərɓeget əvoŋɗeski, məlĩ adək waynabaya ammbet wəleŋɗe na daŋgla nan sit ɗiy məs dəssoŋ a korgu na Susan baymet zəga na lumu taka, təŋ dit ɗiy en gugriɗe hã dit en ɗarə.

⁶ Gabagaɗe na helege na ŋgərayã bəbarɗe may en preŋpreŋ, tahəŋ mətokit dit helegeɗ bəbarɗe kukuɗɗe azet ndemeɗ na təbəz babar aket dədəkeɗ na ɗoro; argaŋguɗe na meleŋge gəm na təbəz babar tahəŋ pak pak aka təki məkkəɗən dit gərmeŋge məslmet məzuwiɗeŋgi, bəbarɗe, preŋpreŋgi may tuturɗe.

⁷ Məmbaɗani zəga nawsa addəvit hiliŋgiɗ na meleŋge məzeɓit temtemi. Mbazla keslkesl məlĩ məlyã.

⁸ Tive tay vi nawaydi pak dəsəgən məza ɗəf ədoɗ kiyən dədoɗ ɓa, vi məlĩ aɗiyək wən nan sit deyeɗe na magulo baymet dəzbanəngən əŋgla na ɗəf pakə.

⁹ Ma'ãyək Vasti pak tədək waynabaya van tam, sit gil ana məlĩ Ahasuwerus da vani.

An dərəhət ma'ãyək Vasti

¹⁰ Aka pay mabuhulon na, zə məlĩ annekik də mbazla. Yaŋ anah sit may Mehuman, Bizta, Harbona, Bigta, Abagta, Zetar gəm Karkas mətawaŋkoyom buhul məɗɗaŋ wəza aba məlĩ Ahasuwerus van na,

¹¹ dəkitən ma'ãyək Vasti aba məlĩ də kulpup nat ma'ãyək akata, karban lelew nat sit ɗiyi gəm sit deyeɗe. Vi moggottə aza ula.

¹² Yaŋ ma'ãyək Vasti nak təɓoŋ daddat va əpel məs məlĩ apel sit mətawaŋkoyom neki. Ndəni kan məlĩ atoŋ addivit herɗe, gədəven adək sawɓa.

¹³ Yaŋ məlĩ azgə meŋ dit məsmaɗɗulet məs dəsənnən wən na ənziya. Vi wən na məlĩ pak dəbet məsənaŋ mahenziŋ də an dəslə adawtoŋgo.

¹⁴ En go'o azan na, Karsena, Setar, Admata, Tarsis, Meres, Marsena, Memukan gəm deyeɗe buhul na Persiya də Mediya dədawlanən hara məlyã. Ndəɗaŋgə kiwən aka dəlva.

¹⁵ Aza mahenziŋ na, mi nawgəɗsət ma'ãyək Vasti adan təɗɗa məs məlĩ Ahasuwerus aɗi naɗɗa də met mətawaŋkoyom ɓaŋ di?

¹⁶ Memukan aɓ aba məlĩ dit ɗiy gugriɗ na: «Sən məlĩ kaka' ma'ãy Vasti təraygən ɓa, sit ɗiy gugriɗ dit ɗiy naka kivadələv na məlĩ Ahasuwerus paki.

¹⁷ Wən nat ma'ãyəkkəs waggar azet gil pakə, ka kawreɗit əzelet zilŋgiɗit ɗə ənah sit na: “Məlĩ Ahasuwerus anahək nawkiyət ma'ãyək Vasti abani, ya təde ɓa.”

¹⁸ Dəpaŋ dəpaŋkəŋka, gil net ɗiy gugriɗ na Persiya gəm na Mediya waprəmnən an ma'ãyək ga məlĩ təgəɗəska. Wazeletin zilŋgiɗit də əzlan sit vaska, asna kiyɓəɓəl net gil wasilgin gəgay net zeli.

¹⁹ An məlĩ arəhək lewi na, əpel na məlĩ dəgil sə mani, kaggari kiyən ɓa, kawverin addəv mahenziŋ na Persiya gəm na Mediya na: Vasti tədawziw ɗah aba məlĩ Ahasuwerus ɓa. Məlĩ dəpsətəgən gagdak na məlĩ nan sət galat akən təday kita.

²⁰ An məprəmni mahenziŋ van akava dələv nok va asan dəwənnan sloprokuŋka, gil pak wagagdeketin zilŋgitti, an metiŋ də an muzliya pakə.»

²¹ Wən van annekək zə məlĩ dit ɗiy gugriɗ na wəza nani, yas məlĩ ataf əpel na Memukan.

²² Yas kan aslən ɗerewelɗe akava dələv asan məlĩ takataka pak, məverit də wəver neti gəm də ma net ɗiy nadaka. Ɗerewelɗe vet tay ənahaŋ na: Ɗəf pak ndəni daya neŋgil ananda, dəziw aka əpel ma nan a daŋgla nani.