Efesus 6 - Bible en Guidar

Kirin dit migilti

¹ Kirni, məprəm met migilkum vi əsap nokum addəv Daya. Aski təsə.

² Agagdakan afuk dət moko, ndəni mahenziŋ an daabəŋ də iynama ammbani.

³ Vi kərahgən əzaɓa gəm ənziya diyɗa aka dəlvafuŋ.

⁴ Migilit kirni, kədawdanən gidivit kirtukum ɓa, məzgil də əsərikgiti gəm əzga sit də əpel na Daya.

Balamɗe dit deyeɗe neti

⁵ Balamɗe məprəm met deyeɗe na gəɓa zukum, də geslne də əkkere, də mokrokum taka, va sən Kristu.

⁶ Kədaɗɗaŋ ama heret kaka vi zit dənnekgen ɓa, va belemɗe na Kristu, məɗɗa əŋgla na Maŋgəlva də mokrokum taka.

⁷ Məgəɗ sit wəza də əŋgla nokum va sən Daya məza va sit ɗiy ɓa.

⁸ Məsən na, an ɗəf tay əɗɗa zəga moggon na, anani adawrəh səva Daya, ɗəf nan dəsan balami, awaniɓa ɗəf na kiyəni.

⁹ Munokum deyeɗe, məgəɗ sit vaska'e, məppan gagay, məsən na, ndəɗaŋ gəm mənokum pak, Daya nokum a disiŋgi, awɗeket ɗiy ɓa.

Zəga nawgay an Maŋgəlva adapsən ɗəfa

¹⁰ Əbayman na, mussoŋ ɓəlɓəl addəv Daya gəm addəv əɓap na gbogboŋ nani.

¹¹ Məgəm zəga nawgay na Maŋgəlva, vi kəɓapəŋgən əziw ɓəlɓəl abet kuket na diyabəl.

¹² Vi əgay nam də ɗəfi ɓa, dit ɗiy gugriɗe, ɗiy gagdakɗe gəm məlyeŋge nara guzliyəŋki, dit əmpəsɗe mbreyit na disiŋ.

¹³ Vi aski məgəm zəga nawgay na Maŋgəlva, vi kəɓapəngən əziw aba məzuzelkum pay an mbərayəni. An kətakənək wəla zəga pakə, asna akəziweŋ ɓəlɓələ.

¹⁴ Məziw ziw kana, miynan dadakkum də gegesiŋ, mugul təstəs ka lukut na təbəza,

¹⁵ məkpa' hensek də əŋgla nawpel Alabara Nenek na zazaya.

¹⁶ Pay pak məgəm ətaf ka baray məs kədawtanən offo net herɗe na ɗəf mbərayən dəndən.

¹⁷ Məɗup əkõh ka kulpup na təbza, gəm Əmpəs ka masalam, ndəni əpel na Maŋgəlva.

¹⁸ Pay pak məkkam addəv Əmpəsa, də əkkam awandi pak gəm əɓuhma. Sən aski, məssoŋ ɗezleŋge, məkkam ɗayɗay ammbet ɗiy salala pakə.

¹⁹ Məkkam ammbawa, vi nərahgən əpel məza geslne ɓa, an in tat əkol maw ərban məɗama na Alabara Neneke,

²⁰ məs nəsaw maslən nan addivit ngiyamɗe, vi nəpelgən məza geslne ɓa va dəslə nəpelgən wən nani.

Əbaymani ( 6:21-24 ) Əsɗa an bayma faɗə

²¹ Ka nokum pak kəsənəngən an dəwəl suwa də an nədaɗɗa na, Tikikus məlməm na makrawa, məgəɗ wəza na Daya də gegesiŋ wanah sukum pakə.

²² Ndəni kpak nəslən anokum da dənah sukumgən va məsam pakə, kəsənən wən namə gəm dəsɓangən mokrokum.

²³ Kəta Maŋgəlva Afəni gəm Daya Yesu Kristu, dəpsit zazaya gəm əŋgla də ətaf sit milmiŋgiɗmə.

²⁴ Mbəlembəle dəsan aket ɗiy məs dəŋgluwən Daya nam Yesu Kristu də əŋgla məs awray ɓa.