Efesus 5 - Bible en Guidar

Ənziya addəv əkeɗeɗe'e

¹ Məgəm təl Maŋgəlva kana va kirtin na makrani.

² Mədaw addəv əŋgla va Kristu aŋglumə appan ki zən sən Maŋgəlva ammbam ka əvəla gəm ka zəga mətaw wəlani, va tursan məs məŋgənən neki.

³ Polkoyo gəm ɗarɗar zev awandi pakə awaniɓa mamayã net koɓeɗi, wən nan dayday adawsan a waloŋkam ɓa, aski dəslə azet ɗiy en salala.

⁴ Wən net willi, əpel nawteme, əpel na dərwa awaniɓa əpel məs dəslə ɓa adawsan ɓa, məgəɗ soko dərəŋgə,

⁵ vi məsən lewlewi, məgəɗ ɗarɗarə, məgəɗ mambray awaniɓa məs mamayã na zəga, məzaɓ zəgakamaŋgəlva, arah əzəmgəla addəv məlĩ na Kristu də Maŋgəlva ɓa.

⁶ Ɗəf adawmbəɗokum də əpel mekeleŋ ɓa, vi aket wən net zəgeɗ weskiski ədagədəv na Maŋgəlva adazzan aket ɗiy məɓoŋti.

⁷ Kədassoŋ makkayet ɓa.

⁸ Vi lahəŋka ara guzli kənanaŋgə, ya kakaŋ na ara əkeɗeɗe kənanaŋ addəv Daya, mədaw va ɗiy nara əkeɗeɗe'e.

⁹ Vi uwa na əkeɗeɗe'e: ndəni moggoni, təstəssə də gesiŋ.

¹⁰ Məsən uwel an dədannek zə Daya.

¹¹ Kədawsapaŋ aka wəza nara guzliyəŋ awtər ɓaŋ ɓa, məpeset dərəŋgə.

¹² Vi zəgeɗ məs adaɗɗaŋ addəv mahaɗamaŋki, zəgeɗ net wiliŋ aza əpelin daydayə.

¹³ Ya zəgeɗ en məpeset pak, əkeɗeɗe warbeti.

¹⁴ An zəga arbanək zəni, wakkpaŋ əkeɗeɗe'e. Vini anah na: Afɗahə is məleŋguk kəŋkə, asil səret ɗiy mimtiti. Asna Kristu wakasako.

¹⁵ Məzi zukum kana, məssoŋ ɗeŋge aza ədaw nokum, məza va məs maɗɗula tay aket ɓa ɓa, məssoŋ də maɗɗula.

¹⁶ Məgəɗ an dəslə də pay nani, vi ənziya an kakaŋkəŋ mbərayni.

¹⁷ Vi vaski kədassoŋ dərweŋge ɓa, ya məsən na awani əŋgla na Daya di.

¹⁸ Mbazla adawbaykum ɓa vi ndəni məzlaɓan maɗɗula ɗəfa. Ya məssoŋ məknahkum də Əmpəs na Maŋgəlva.

¹⁹ Məpel sən zukum də gəlyanalva də gəlya na gagdaka, də gəlya na Əmpəsa, məyə gəlya gəm məɗi ki Daya də mokrokum taka.

²⁰ Məgəɗ soko pay pak vi zəga pak də iya na Daya nam Yesu Kristu sən Maŋgəlva Afəni.

Gili dit zeli

²¹ Məɓe' sən zukum addəv geslne na Kristu.

²² Gili məɓe' sit zel nokum va sən Daya.

²³ Vi ɗəf məzilini daya nat guluk, va Kristu asan daya na əsap net ɗiy na Maŋgəlva dəssoŋ gəɓa zəni, ndəni məzukõhgiti.

²⁴ Va əsap net ɗiy na Maŋgəlva adawɓe' sən Kristu, gili dəɓe'eŋ sit zel net addəv zəga pak vaska'e.

²⁵ Zeli, miŋgliw gil nokum va Kristu aŋglu əsap net ɗiy na Maŋgəlva, appan kizən viti.

²⁶ Vi kakkpeŋget salala də əzlzleyit aret iŋkile na əpel nani.

²⁷ Vi əsap net ɗiy na Maŋgəlva dərbəgən ama haran moggoni, məza də tellef azan ɓa, awaniɓa zən nosnos ɓa, awaniɓa məza heslepe ɓa, vi dəsangən salala, gəm məza nawpel akan ɓa.

²⁸ Vaski yi'e zeli, diŋgluwin gil net va aŋglunən ziti. Ɗəf məs dəŋgluwət goni, ana zən aŋgələ.

²⁹ Vi ɗəf tay dəzel ɗah gəɓa zən ɓa, dərəŋ na, wazəmgəni, wazək sləma akani, vaski yi'e Kristu də əsap net ɗiy na Maŋgəlva.

³⁰ Vi masleŋsləŋ na gəɓa zən mənani.

³¹ Vi vaski: Ɗəf wappan afən dət mani, kawtip azat ɗak nani, sulegit pak wakkpaŋgaŋ zit taka.

³² Wən məɗamas kpumi, ya naw in tat ənəh na, aka Kristu də əsap net ɗiy na Maŋgəlva adawpele.

³³ Ya də as zlaŋ na, taka taka nokum, ɗəf pak dəŋgluwət guluk nan va aŋglu zəni, guluk tamə, təɗi ki zəlta.