Efesus 4 - Bible en Guidar

Ənziya meleketen addəv Kristu ( 4:1—6:20 ) Əsap zə ɗəf taka

¹ In tat əhhaɗokum, in mə fərsəna aka wən na Daya kədawaŋgən va an dəslə aza iya an məyukum,

² addəv əɓegən ki zukum, addəv zazaya gəm addəv əɓəsa. Məɓəs sən zukum də əŋgla,

³ Məsok zukum ərma əsap taka əddəv Əmpəs məs diynokum sap də zazaya.

⁴ Gəɓa zukum taka gəm əmpəs taka yi, vaski yi'e məyukum aka zəga nawga taka an məyukum akani.

⁵ Daya taka yi, ətaf taka yi, baptem taka yi,

⁶ Maŋgəlva taka yi Afit ɗiy pakə, məs dəzəm məlĩ aket ɗiy pakə, tay əɗɗa wəza dənɗaŋ pakə, tay addivit pakə.

⁷ Naway di pak səram arahək mbəlembəle də əvəl na Kristu galan nani.

⁸ Vini anah na: Adan apeŋ a disiŋ, akek ɗiy mərmet avani! Apsitik əvəl sit ɗiyi.

⁹ Apeŋgik a disiŋ mbar aŋgəl ənah di? Aŋgəl ənah na, aprike'e ammba dəlvafuŋ, kpukpumo.

¹⁰ Məs dəpriki ndən vani'e dəpeŋ balsit disiŋɗe vi kaknahan zəga pakə.

¹¹ Əvəl an avələ, ndəɗaŋgə, maslənɗe, məskəleŋɗe, mərban wən neneke, məzuteɗeŋɗe, gəm mərbaŋzəga.

¹² Vi kazeɓet ɗiy na Maŋgəlva dəɓapaŋgən əknahan wəza nani, nawɓaygən gəɓa zə Kristu.

¹³ Hã gap məgapgən mənam pak addəv ətaf taka gəm əsən Wətən Maŋgəlva lewlewi, də əssa va ɗəf məsɓan nawsla addəv əɓay də gərrak na Kristu.

¹⁴ Vi mədawsam va kirin memeɗeŋɗe, məs səmyã adawka də təki aŋgəl pak poŋgolpoŋgol addəv əyak ɓa, məs adasmayamən kawmbəɗam də kuket net kawzam ɓa.

¹⁵ Ya də əpel gegesiŋ addəv əŋgla na, waməɓay addəv zəga pak kəlazani, ndən məs dəsan kiya, ana Kristu.

¹⁶ Dəndəni gəɓa zə ɗəf dəwən nan, asan slersler moggon gəm asap aza zən də met sleŋsleŋɗe va an dəsle azani, va hara wəza na naway pak aza əɓap nani, zən əɓay əmbat abe abe addəv əŋgla.

Zeŋgille meleketen net məkristuɗe

¹⁷ An nədawnah gəm nədawpel sukum akan də iya na Daya yaŋ kana, kədawdawaŋ va ədaw net ɗiy-ɗar məs əɗɗum net adawket a təki ɗarəŋ ɓa.

¹⁸ Maɗɗulet attirke, faraɗaŋ səza zeŋgile na Maŋgəlva sən əssa slamma neti, vi ɓəɓəl na mekreti.

¹⁹ Wil awdennin ɓa, appanənək zit sən əɗɗa zəga ɗarɗarə də mambray zev awandi pak də əzban əsim na gəɓa ziti.

²⁰ Ya nokum vaski kəyaganən wən na Kristu ɓa.

²¹ An əpel akan kəprəmaŋgə, an anani məyagan sukum dekdek də gegesiŋ məs naddəv Yesu,

²² muɗak də ɗəf məzvani, ana wəza nokum məzvanəŋka, məzuray də əsim zəga məmakan ɗəfa.

²³ Məppan əmpəs nokum də maɗɗulokum əkkpaŋ meleketeni.

²⁴ Mugul ɗəf meleketeni, məs məzəməɗən va Maŋgəlva aŋgəl addəv təstəsə gəm salala məs dəde səza gegesiŋ.

²⁵ Vi vaski məppan uwa wəna! Ɗəf pak dəpel gesiŋ aza meggeni, vi gəɓa zəm taka mənani.

²⁶ An gədəvkum adəka, kədaɗɗaŋ mambray ɓa, pay adawtəpa aka ədagədəv nokum ɓa.

²⁷ Kədapaŋ təki sən Satan ɓa.

²⁸ An ɗəf məhãlãy yi, adawhãl əmpa ɓa, ya ɗəɗah dərəŋ dəgəɗ wəza devan va an dəslə, vi dərahgən an napsən ɗəf an də wəraya.

²⁹ Əpel mbərayən adawgilyen səmokum ɓa, an tay na dəsan əpel moggoni, məs nawɓaygən ɗəfa, vi dəpsitgin mbəlembəle sit ɗiy en dədaprəməni.

³⁰ Kədawɗəkanən Zeŋgile Salala na Maŋgəlva, məs məɗɗa sukum lamba dəndən də əya əga pay nawmokuməŋ ɓa.

³¹ Wən nassa awan di pakə, herɗe, ədagədəva, əklopo, əra gəm əɗɗa an dəslə ɓa, as pak dəzə sə walaŋkum.

³² Ya məssoŋ neknek a walaŋ zukum, də ulasahã aka zukum, də əɗɗa mbəlembəle a walaŋ zukum va Maŋgəlva agəɗ sukum mbəlembəle addəv Kristu.