Efesus 3 - Bible en Guidar

Əslən an məpsən Pol viyit ɗiy-ɗarə

¹ Intə Pol, məfərsəna na Yesu Kristu aka batamkum munokum ɗiy-ɗarə.

² An kəprəmənək wən na mbəlembəle məs Maŋgəlva avay vi kaɗɗa an məs aynan vikum,

³ va hənhən arban su wən məɗama, vaski nəver duɗukko farə,

⁴ an kaŋɗanən na, wakəɓap əsənən zev əsən naw aka wən məɗama na Kristu.

⁵ Dərban məɗamas sən sayit ɗiy dətoŋ far va arban kakaŋ də Əmpəs sit maslən nan salala gəm sit məskəleŋɗe ɓa.

⁶ Vas na, ɗiy-ɗar vet məzəmaŋgəla sapə, gəɓa zit taka, asapaŋgək addəv iynama məstaka addəv Yesu Kristu də Alabara Neneke.

⁷ Məs nəkkpaŋ məgəɗ wəza va aza əvəl na mbəlembəle na Maŋgəlva an məvay va aza wəza na əɓap nani.

⁸ Su in məs nadəmmbet ɗiy en salala pak məvay mbəlembəle əŋ narban arya na Kristu məs akkpe' ɓa.

⁹ Nərbangən appaka ta' sit ɗiy pak va mbar Maŋgəlva adarban əɗɗum nan dəsan haɗamma farfarə, ndən məs dəzəmiɗ zəgeɗ pakə.

¹⁰ Vi maɗɗula na Maŋgəlva va asan temtem pak dərbəgən kakaŋ azet ɗiy gugriɗ gəm azet milyeŋɗe na disiŋ sə kəlazet ɗiy na Maŋgəlva.

¹¹ Va aza əɗɗum nan dəsan faɗ məs agəɗ addəv Yesu Kristu Daya namə.

¹² Ndəndəni, mərah əsən gesiŋ gəm ətoŋ aza Maŋgəlva kiyəm foŋgo də ətaf an mətafa.

¹³ In tat əkkamokum əmpa na, kədavirenən zukum vi sahã an nədawzəm vikuməŋ ɓa: Gagdak nokumi.

Əŋgla na Kristu

¹⁴ Sən aski, nədagduk takpraw aba Afəni.

¹⁵ Səzani daŋgla, na disiŋ də naka dəlvafuŋ pak arah iya nani.

¹⁶ Vi dəpsukumgən əɓap va aza arya na gagdak nani, kəssoŋgən gboŋgboŋ də Əmpəs nani, dəsangən ərəh na ɗəf na kəleŋgili.

¹⁷ Vi dəɗigən Kristu a mokrokum də ətafa, ka kəssoŋgən də slalwãkum ɓəlɓəl addəv əŋgla.

¹⁸ Vi kərahaŋgən gbogboŋ sap dit ɗiy salala naprəm gabba slosloproko, zezeke, əɓaya gəm kpukpum na əŋgla na Kristu,

¹⁹ gəm kəsənəngən əŋgla nan məs dəday ki əsən pakə, ka kəssoŋgən məknahkum də əzaɓ na Maŋgəlva.

²⁰ Sən anan məs dədawɓap əɗɗa daykiyit meŋge hã dayki an məs mədaŋgla gəm an mədaɗɗum də əɓap məs dədaɗɗa wəza addəvmə,

²¹ gagdak nani a walaŋgit ɗiy na Maŋgəlva gəm addəv Yesu Kristu, va sayit ɗiy amə' pak hã faɗə. Amin.