Efesus 1 - Bible en Guidar

Ətoŋ addəvən ( 1:1-2 ) Wəsɗa

¹ Pol maslən na Yesu Kristu dəka əŋgla na Maŋgəlva, sit ɗiy en salala gəm dəppanən kiyit sən Yesu Kristu na Efesus.

² Mbəlembəle gəm zazay na Maŋgəlva Afəmə gəm na Daya nam Yesu Kristu dəsan də mənokum.

Kristu gəm Gəla na Maŋgəlva ( 1:3—3:21 ) Moggon an Maŋgəlva apsəm də Yesu Kristu

³ Soko sən Maŋgəlva Afən Daya nam Yesu Kristu. Ndəni dəzaɓam də əzaɓ na əmpəs tutu' sə disiŋ addəv Kristu.

⁴ Vaski aweləm addəvən tak əzəməɗ dəlva vi məsamgən salala gəm məza də heslepe ama haran ɓa addəv əŋgla.

⁵ Awelmək dafsən kəlaza Yesu Kristu ka məsamgən ka kirtini, va aza moggon na əŋgla nani.

⁶ Ka məɗigən ki gagdak na mbəlembəle nan məs aknəhəm dəndən də Wətən an na makrani.

⁷ Addəvni mərah əbit kiyəm dit mbel nani, əvvuy net heslepeɗe, va aza mbəlembəle nan məza man awsla ɓa.

⁸ Awan səmək diyɗa, apsəmək maɗɗula də əsən pakə.

⁹ Arban səmək wən məɗama na əŋgla nan, va aza əɗɗum naɗɗa moggon məs aziwgin addəvni,

¹⁰ vi kaɗɗan an pay nan agapka, əsepet zəgeɗ pak addəv Kristu, en na disiŋ dit en naka dəlvafuŋ pak addəvni.

¹¹ Addəvni yi'e məweləm ka məzəmgəngəla, məwelmi dafsən va aza əŋgla na məzəɗɗa wəza də zəga pak va aza aŋgla nani.

¹² Vi məsamgən məzuɗi ki gagdak nani, en dəɗinən əga net dafsən addəv Kristu.

¹³ Addəvni yi'e kəprəmnən əpel na gegesiŋ, Alabara Nenek na əkõh nokum, addəvni yi'e kəɗiyən ətaf nokum, mənokum məs məɗi tampoŋ də Zeŋgile Salala na iynama.

¹⁴ Ndən vani an apsəm bas narban əzəmgəla namə, vi kawbit en məs albahə, ka kawɗi ki gagdak nani.

Əkkam na Pol

¹⁵ Sən aski, naw pak səza nəprəm wən na ətaf nokum addəv Daya Yesu də əŋgla nokum viyit ɗiy salala pakə.

¹⁶ Nappan əfet vikum ɓa, in tat əgulkum addəv əkkam nawa.

¹⁷ Kəta Maŋgəlva na Daya nam Yesu Kristu, Afən gagdak dəpsukumgən əɗɗum na maɗɗula gəm na ərba kəsənəngən gərakə.

¹⁸ Dəkekeɓe hara mokrokum vi kəsənəngən va an nawga dəde səza iya nan asani, va arya na gagdak na əzəmgəla asan a walaŋgit ɗiy salala.

¹⁹ Gəm va memetiŋ na əɓap nan asan vimə, mənam məs mətaf va aza wəza na gbogboŋ nani.

²⁰ Məs agəɗ wəza dəndən addəv Kristu, də əsilgin sə walaŋgit ɗiy mimtiti, aɗi aka va dəzəŋ nan a disiŋ.

²¹ A disiŋ kiyit ɗiy gugriɗe, məlyeŋge, məgil əɓapa, deyeɗe gəm aka iya an nawya pakə, an naka dəlvəŋki kaka ɓa də an naka dələv an dədazzanə'e yi.

²² Aɗiyək zəgeɗ pak ammba təlni, aɗiyək ka kiwən aka zəga pakə, ka Daya na əsap net məzutafaŋ,

²³ məs dəsan gəɓa zəni, ndəni əknah na an məzəknahan zəga pak addəv zəga pakə.