Ɗerewel na Daniyel Gərek 3 - Bible en Guidar

^1-23 ]

Əkkam na Azariya

²⁴ Gewleɗ hoku, Hananiya, Mikayel gəm Azariya, təŋgaŋ əsulək addəv movoro na offo, iyaŋ gəlyanalva sən Maŋgəlva, əɗiyən kiyən ka Daya.

²⁵ Yaŋ Azariya asil ziw addak offo akkam dayadaya vaŋka:

²⁶ Aw Daya, Maŋgəlva net dihiŋgiɗmə, mənam tat əgagdakoko gəm əɗi kiyko, kəta iya nok dəsan məgagdakan hã faɗə.

²⁷ Istat əgəɗ səm an dəslə azamə, addəv an kəgəɗ səm pak tay nawzelen suk ɓa; an kəkəmək aba ətawwəna, istat aka təstəsə.

²⁸ Təstəs kənan addəv tatwãhɗe məs kəki akamə gəm aka Yerusalem, walaŋgəla-metiŋ salala net dihiŋgiɗmə. Wən an kətaw akam aslək azet mambrayɗe namə.

²⁹ Məɓoŋ sukko, məktuhuk dəɓam suko, məs mambrayɗe mənan pakə.

³⁰ Məɗɗe zəgeɗ məs kəɗi səm wən net məɗɗegin ɓa. Va məɓe' sitik mahenziŋɗe noko, kəta waməɓayə.

³¹ Ya kakaŋ na ətawwən gəm əzga' məs kəki akaməŋka aslək azamə.

³² Kəppamək avet meseŋgiɗəm məs dəsənaŋ mahenziŋ ɓa, məzuzeleŋgi, mərmaŋ mama: avet milyeŋge en mambrayɗe day nammba dəlva.

³³ Yaŋ na, mənamkən məs mədawgagdokok pak mərbəsəmi wili; wil tay ədəmən diyɗa dawhã' mam əpele.

³⁴ Yaŋ na, ammba əŋgla na gagdak noko, kədappan an kinə də mənam kawndolum faɗ ɓa.

³⁵ Kədawtak ulasahã nok səkam ɓa. Arma iynama nok də Abraham məs kəŋgələ, də Isak gawla noko, də Yakob efit ɗiy nok salala mə Israyelɗe.

³⁶ Kinanək napsit uwa diyɗa va ŋgərzleɗ na disiŋ awaniɓa va hoyoŋko a məlpa.

³⁷ Ya gəgaŋ na Daya, siɗikke mənan aret ɗiy ɗarə. Teki məsam pak mənam tat ənziya aka ərba wili, sit mambrayɗe namə.

³⁸ Mənam tat məza məlĩ nam ɓa, məza məskəleŋɗe ɓa, məza deyeɗe nam ɓa. Gəla na Maŋgəlva nam tay əmpa naddam addəvən əpsuk əvəl nawzla kurmbuɗuk ɓa, nawtaw suk wəla zəga ɓa, na əvəl suko awaniɓa əzləsuk tursan ɓa, təki tay mədaɗɗa əvəl suk ka mərahgən mbəlembəle nok ɓa.

³⁹ Ya mənam tat əzzam ozok də makram nawɗi marava, də maɗɗulam na sahã, əkkomok kətafməgən va kəmna də əvəl nawzla kurmbuɗuk net ndergeyẽɗi net medgeɗgeɗe, may ndergeyẽɗ məkirit gabalɗe.

⁴⁰ Ataf marava nam va əzaɓ-Maŋgəlva nam mədə suk pay dəpaŋka, məɓe' sukgən makram taka. Ɗəf məs dətafuk arbə na ɗah wil ɓa.

⁴¹ Gəgaŋ na, də makram taka mədaynan mam nawɓe' suko, nawgagdokoko, nazzam azok də əkkama. Atafəm də neneke gəm də ulasahã, mədawsam ɗah aket wil əmpa ɓa.

⁴² Aw Daya, akõhgəm də taka naret sekeneɗ noko; aɗi ki iya noko.

⁴³ Aprikgin əraya gəm wil aket məɗɗaŋ səmən mbərayən pakə. Amõh əɓap gəm gagdak neti, aŋgrof gbəgboŋ neti.

⁴⁴ Dəsənnəngən na istə kaka' Daya gəm Maŋgəlva, istat əzəm məlĩ də gagdak aka dələv gərakə.

⁴⁵ Belemɗe na məlĩ məs dəzgetin zel sula addəv movoro na offo armanənək offo gidigidi də əgbo' melẽ may timbe na dəlva, may kiritseseme akani.

Gəlya net beyneŋgiɗ Daniel hoku

⁴⁶ Hərzləm offo asilik hã a disiŋ zəga na əɗi təl ɗəf kaklaw buhul kiyən sle'i.

⁴⁷ Waɓap əlma nawzle mə Babilonɗe məs dəssoŋ go'o aza movoro na offo vani.

⁴⁸ Ya maslay na Daya prik addəv offo a təki məs zel hoku assoŋgu. Ndən ana offo nak zargən a maŋgava,

⁴⁹ hã əttəm va kəmna səmyã məlhəɗən tay əɓla hayawwa, offo van tay ərəŋgit zel nek kpak ɓa may əzlet kpẽh ɓa.

Gəlya net gewleɗ hoku

⁵⁰ Addəv movoro na offo adaka, gewleɗ hoku nek əmpa təŋ iyaŋ gəlya sap addəv əkkaman Maŋgəlva:

⁵¹ Mənam tat əkkomoko aw Daya, Maŋgəlva net dihiŋgiɗmə.

⁵² Kəta iya nok gagdak salalaŋ dəsan məɗikiyən də gagdak hã faɗə.

⁵³ Kəta gəlyeɗe nalva dəyaŋ sən gagdak nok hã faɗə, ɗiy dəɗinən ki salala na əssa nok addəv gəla nok vani.

⁵⁴ A təki kəsok aka mazaŋga na məlĩ nok a disiŋ kiyit zəgeɗ məzəmiɗit məs persleket pak, kədawla afuŋ aka dələv net ɗiy mimtitiŋka. Ɗiy dəɗinən kiko, dəgagdakokun hã faɗə.

⁵⁵ Kaɗini kiyuk səka mazaŋga na məlĩ noko. Kawyay gəlyaɗe nalva sən gagdak nok hã faɗə.

⁵⁶ Kawɗini kiyuk ammba təki a disiŋ. Kawyay gəlyaɗe nalva sən gagdak nok hã faɗə.

⁵⁷ Məɗi ki Daya, mənokum zəgeɗ məzəməɗit pakə; məyə gəlya nawɗi kiya nani, məgagdakan hã faɗə.

⁵⁸ Disiŋ, aɗi ki Daya, ayə gəlya nawɗi kiyən, a gagdakan hã faɗə.

⁵⁹ Məɗi ki Daya mənokum maslayɗe na Daya baymokum; məyə gəlya nawɗi kiyən, məgagdakan hã faɗə.

⁶⁰ Məɗi ki Daya, mənokum iŋkile na balsən disiŋ; məyə gəlya nawɗi kiyən, məgagdakan hã faɗə.

⁶¹ Məɗi ki Daya, mənokum gbəgbonɗe na disiŋ pakə; məyə gəlya nawɗi kiyən, məgagdakan hã faɗə.

⁶² Məɗi ki Daya, pay də təla; məyə gəlya nawɗi kiyən, məgagdakan hã faɗə.

⁶³ Məɗi ki Daya, ŋgərzleɗ na disiŋ; məyə gəlya nawɗi kiyən, məgagdakan hã faɗə.

⁶⁴ Məɗi ki Daya, buwən dit minɗe; məyə gəlya nawɗi kiyən, məgagdakan hã faɗə.

⁶⁵ Məɗi ki Daya, səmyeŋge; məyə gəlya nawɗi kiyən, məgagdakan hã faɗə.

⁶⁶ Məɗi ki Daya, offo də təki hiriɓe; məyə gəlya nawɗi kiyən, məgagdakan hã faɗə.

⁶⁷ Məɗi ki Daya, səmyã keɓkeɓ də təki kəkahã; məyə gəlya nawɗi kiyən, məgagdakan hã faɗə.

⁶⁸ Məɗi ki Daya, minɗe dit ɓeɓrezle; məyə gəlya nawɗi kiyən, məgagdakan hã faɗə.

⁶⁹ Məɗi ki Daya, dəfɗa də kapaya, məyə gəlya nawɗi kiyən, məgagdakan hã faɗə.

⁷⁰ Məɗi ki Daya, əkeɗeɗe na kapaya də guzluyo; məyə gəlya nawɗi kiyən, məgagdakan hã faɗə.

⁷¹ Məɗi ki Daya, iŋkile mərma-ziti gəm səmyã keɓkeɓi; məyə gəlya nawɗi kiyən, məgagdakan hã faɗə.

⁷² Məɗi ki Daya, iŋkile mərma-ziti gəm ɓeɓrezle rizze; məyə gəlya nawɗi kiyən; məgagdakan hã faɗə.

⁷³ Məɗi ki Daya, offo na buna gəm barkataŋɗe; məyə gəlya nawɗi kiyən, məgagdakan hã faɗə.

⁷⁴ Dəlvafuŋ dəɗi ki Daya; dəyə gəlya nawɗi kiyən, dəgagdakan hã faɗə.

⁷⁵ Məɗi ki Daya, mossorgoɗe gugriɗe də təki ɗagarra pakə; məyə gəlya nawɗi kiyən, məgagdakan hã faɗə.

⁷⁶ Məɗi ki Daya, va gaslamba pakə; məyə gəlya nawɗi kiyən, məgagdakan hã faɗə.

⁷⁷ Meɗi ki Daya, bobokɗe dit məlpeŋge; məyə gəlya nawɗi kiyən, məgagdakan hã faɗə.

⁷⁸ Məɗi ki Daya, iŋkile nzõhõ; məyə gəlya nawɗi kiyən, məgagdakan hã faɗə.

⁷⁹ Məɗi ki Daya, kilfeŋge gugriɗe na pehe dit zəgeɗ məzəmiɗit na pehe; məyə gəlya nawɗi kiyən, məgagdakan hã faɗə.

⁸⁰ Məɗi ki Daya, biŋgiɗ pakə; məyə gəlya nawɗi kiyən, məgagdakan hã faɗə.

⁸¹ Məɗi ki Daya, gazlaŋɗe dit zəgeɗ nawra pakə; məyə gəlya nawɗi kiyən, məgagdakan hã faɗə.

⁸² Məɗi ki Daya, ɗiy naka dəlvafuŋ pakə; məyə gəlya nawɗi kiyən, məgagdakan hã faɗə.

⁸³ Məɗi ki Daya, ɗiy na Israyel; məyə gəlya nawɗi kiyən, məgagdakan hã faɗə.

⁸⁴ Məɗi ki Daya məsdəlveŋge na Daya; məyə gəlya nawɗi kiyən, məgagdakan hã faɗə.

⁸⁵ Məɗi ki Daya, məɗɗaŋ wəza na Daya; məyə gəlya nawɗi kiyən, məgagdakan hã faɗə.

⁸⁶ Məɗi ki Daya, ɗiy məzutafaŋ pakə; məyə gəlya nawɗi kiyən, məgagdakan hã faɗə.

⁸⁷ Məɗi ki Daya, ɗiy en mekret zay gəm salala; məyə gəlya nawɗi kiyən, məgagdakan hã faɗə.

⁸⁸ Məɗi ki Daya Hananiya, Azariyah, gəm Misahel; məyə gəlya nawɗi kiyən, məgagdakan hã faɗə. Akõhgəmək səka dələv net ɗiy mimtiti, akõhgəm səma gbəgboŋ na əmta. Agilgəmək səddəv movoro na offo nzilimnzilim, akõhgəm səma offo.

⁸⁹ Məgəɗ soko sən Daya, vi moggon nani gəm ulasahã nan məza aggrak ɓaŋka.

⁹⁰ Məɗi ki Daya, ɗiy məzugagdakanən pakə; məyə gəlya nawɗi ki Maŋgəlva net meŋgilveɗi, məgəɗ sən soko vi ulasahã na məza aggrak ɓaŋka.